ރާއްޖެއަށް އެއް ލީޓަރާއި އެއަށްވުރެ ކުދި ޕްލާސްޓިކް ފުޅީގައި ފެން ބަންދުކޮށްގެން އެތެރެކުރުމާއި، އުފެއްދުން އަދި ބާޒާރުގައި ވިއްކުން މަނާކުރުމަށް ކަނޑައަޅާފައިވާ ތާރީޚު 2030 ވަނަ އަހަރުގެ ޖޫން މަހުގެ 1 ވަނަ ދުވަހަށް ފަސްކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމަވައިފިއެވެ.
މި ބަދަލު ގެންނަވާފައިވަނީ އެންވަޔަރަމަންޓް މިނިސްޓްރީއާއި ޓޫރިޒަމް މިނިސްޓްރީގެ މަޝްވަރާއާއި ލަފާގެ މަތިން، ’ތިމާވެށްޓަށް ގެއްލުންދޭ ސިންގަލް-ޔޫސް ޕްލާސްޓިކުގެ ބާވަތްތަކުގެ ލިސްޓު ކަނޑައެޅުމުގެ ޤަރާރު‘ އަށް އިޞްލާޙު ގެންނަވައި ނެރުއްވި ޚާއްސަ ޤަރާރަކުންނެވެ.
ކުރިން އޮތް ގޮތުންނަމަ އެއް ލީޓަރާއި 500 މިލިލީޓަރާ ދެމެދުގެ ޕްލާސްޓިކް ފުޅީގައި ފެން ބަންދުކޮށްގެން އެތެރެކުރުމާއި އުފެއްދުން އަންނަ އަހަރުގެ ޑިސެމްބަރު މަހުގެ 1 ވަނަ ދުވަހުން ފެށިގެން މަނާވާނެއެވެ.
މީގެއިތުރުން، އެ ޤަރާރުގެ ލިސްޓަށް ގެނެވުނު އިތުރު އިޞްލާޙަކާއެކު، 250 މިލިލީޓަރަށްވުރެ ކުދި ޕްލާސްޓިކް ފުޅީގައި ބަންދުކޮށްފައި ހުންނަ ފެން ފިޔަވައި އެހެނިހެން ތައްޔާރީ ބުއިންތައް މިއަދުން ފެށިގެން ރާއްޖެއަށް އެތެރެކުރުމާއި، އުފެއްދުމާއި އަދި ބާޒާރަށް ނެރުން ވަނީ މަނާކޮށްފައެވެ.
ސިންގަލް-ޔޫސް ޕްލާސްޓިކް މަދުކުރުމަށް ސަރުކާރުން އެކުލަވާލާފައިވާ ސިޔާސަތުގެ ދަށުން، ތިމާވެށްޓަށް ގެއްލުންދޭ 14 ބާވަތެއްގެ ޕްލާސްޓިކް މަރުޙަލާކޮށްގެން މަނާކުރުމުގެ މަސައްކަތް މީގެ ކުރިންވެސް ވަނީ ފަށާފައެވެ.
މީގެ ކުރިންވެސް އެކި މަރުޙަލާތަކުގައި ކުދި ޕްލާސްޓިކް ފުޅީގައި ފެން ބަންދުކުރުމާއި އެތެރެކުރުން މަނާކުރާ ތާރީޚުތަކަށް އެކި ފަހަރު މަތިން ބަދަލުތައް ގެނެސް، އަމަލުކުރަން ފަށާ ތާރީޚުތައް ވަނީ ފަސްކޮށްފައެވެ.
