މި ސަރުކާރުގެ އަމާޒަކީ 2033 ވަނަ އަހަރު އަންނަންވާއިރަށް، އަހަރަކު 5 މިލިއަން ފަތުރުވެރިން ރާއްޖެއަށް ޒިޔާރަތްކުރާނެ މަގު ފަހިކޮށްދިނުން ކަމުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ޕީއެންސީގެ ކޮންގްރެސް ނިންމުމުގެ ރަސްމިއްޔާތުގައި ވާހަކަފުޅު ދައްކަވަމުން ރައީސް ވިދާޅުވީ ރާއްޖޭގެ ފަތުރުވެރިކަމުގެ ސިނާއަތް ސިންދަފާތުކޮށް އެ ދާއިރާ އިތުރަށް ފުޅާކުރުމަށް ސަރުކާރުން ހާއްސަ އިސްކަމެއް ދީގެން މަސައްކަތް ކުރަމުންދާ ކަމަށާއި، މި މަސައްކަތްތަކުގެ ނަތީޖާއެއްގެ ގޮތުން ރާއްޖެއަށް ޒިޔާރަތްކުރާ ފަތުރުވެރިންގެ ނިސްބަތް އަހަރުން އަހަރަށް އިތުރުވަމުން އަންނަނަކަމަށެވެ.
އަންނަ އަހަރުގެ ’ވިޒިޓް މޯލްޑިވްސް އިޔަރ‘ ގައި ފަތުރުވެރިންގެ ނިސްބަތް އިތުރުކުރެވި، އަހަރަކަށްވުރެ އަހަރެއް އައު ރިސޯޓުތައް ހުޅުވުމާއި، ބޭނުންވާ އެކިކަހަލަ އުމްރާނީ ވަސީލަތްތައް ގާއިމުކޮށް، އެކި ގޮތްގޮތުން ފަހިކޮށްދެވޭ ކަންކަމާއެކު، އަހަރަކު ފަސް މިލިއަން ޓޫރިސްޓުން ރާއްޖެ އަންނަ މިންވަރަށް ފަތުރުވެރިކަމުގެ ދާއިރާ 2033 އާ ހަމައަށް ދާންވާއިރަށް، ސަރުކާރުގެ އަދި ޕާޓީގެ ސިޔާސަތުގެ ތެރެއިން ހަގީގަތަކަށް ހަދައިދޭނެ ކަމަށް ރައީސް މުއިއްޒު ވިދާޅުވިއެވެ.
ރާއްޖޭގައި ފަތުރުވެރިކަން ފެށުނުތާ 55 އަހަރު ފުރޭ މުނާސަބަތާ ގުޅުވައިގެން، އަންނަ އަހަރަކީ ’ފަތުރުވެރިކަމުގެ އަހަރު‘ ގެ ގޮތުގައި ފާހަގަކުރުމަށް ރައީސުލްޖުމްހޫރިއްޔާ ވަނީ ނިންމަވާފައެވެ.
ފަތުރުވެރިކަމާ ބެހޭ ވުޒާރާގެ އެންމެ ފަހުގެ ތަފާސްހިސާބުތައް ދައްކާގޮތުން، މިއަހަރުގެ މިހާތަނަށް ރާއްޖެއަށް 1،484،097 (އެއް މިލިއަން ހަތަރު ލައްކަ އަށްޑިހަ ހަތަރު ހާސް ނުވަދިހަ ހަތެއް) ފަތުރުވެރިން ވަނީ ޒިޔާރަތްކޮށްފައެވެ.
މެދުއިރުމަތީގެ ހަމަނުޖެހުންތަކާ ގުޅިގެން މިއަހަރުގެ ކުރީކޮޅު ރާއްޖެއަށް ފަތުރުވެރިން އައި މިންވަރު ކޮންމެވެސް ވަރަކަށް ދަށްވި ނަމަވެސް، މިހާރު މި ސިނާއަތަށް ވަނީ ބޮޑު ކުރިއެރުމަކާއި ދިރުމެއް ލިބެން ފަށާފައެވެ.
ފަތުރުވެރިކަމުގެ ދާއިރާ ސިންދަފާތުކޮށް، ދާއިރާއަށް މަޑުޖެހުމެއް އަޔަނުދިނުމަށްޓަކައި ސަރުކާރުން ދަނީ ހަރުދަނާ ފިޔަވަޅުތަކެއް އަޅަމުންނެވެ.
އެގޮތުން، ރާއްޖެއަށް އައު އެއާލައިންތަކުގެ ދަތުރުތައް ފެށުމާއި، ފަތުރުވެރިން އަންނަ މާކެޓުތައް އިތުރުކުރުމަށް ކުރެވުނު މަސައްކަތްތަކުގެ ހެޔޮ ނަތީޖާ މިހާރު ފެންނަމުންދާ ކަމަށް މި ސިނާއަތުގެ ތަޖުރިބާކާރުން ފާހަގަކުރައްވައެވެ.
