ޓައިވާނުގެ ދަރިވަރުންތަކެއް އުކާލެވޭ އޮއިސްޓާ ޝެލްސް (އިތާ) ތޮށްޓާއި މުރަކަ ކުނި ބޭނުންކޮށްގެން، ހަލާކުވެފައިވާ މުރަކަ ފަރުތައް އާލާކުރުމަށް އެހީތެރިވެދޭ 3ޑީ-ޕްރިންޓެޑް އޮނިގަނޑުތަކެއް އުފައްދައިފިއެވެ.
”ރީފްވައިވް“ގެ ނަމުން ނަންދީފައިވާ މި މަޝްރޫއުގެ ދަށުން އުފައްދާފައިވާ އޮނިގަނޑުތަކަކީ އާންމުކޮށް އުކާލެވޭ ތަކެތި ބޭނުންކޮށްގެން، މުރަކަ ފެޅުމަށް އެކަށީގެންވާ ހަރުދަނާ ބިންގަލެއް ގާއިމުކޮށްދޭ ތަކެއްޗެވެ. ޖޭމްސް ޑައިސަން އެވާޑުން ހާމަކޮށްފައިވާ ގޮތުގައި، މި އޮނިގަނޑުތައް މިހާރު ވަނީ ކަނޑުގެ އަޑީގައި ސާމްޕަލްގެ ގޮތުގައި ބަހައްޓައިގެން ޓެސްޓުކޮށްފައެވެ.
ނެޝަނަލް ޓައިވާން ނޯމަލް ޔުނިވަސިޓީ އަދި ނެޝަނަލް ޓައިވާން އޯޝަން ޔުނިވަސިޓީއާ ގުޅިގެން ކުރިއަށްދިޔަ މި ދިރާސާގައި، އާންމުކޮށް އާޓިފިޝަލް ރީފް ހެދުމަށް ބޭނުންކުރާ ސިމެންތީގެ ބަދަލުގައި ބޭނުންކޮށްފައިވަނީ މުގުރާފައިވާ އޮއިސްޓާ ތޮށްޓާއި މުރަކަ ކުނި އެއްކޮށްގެން އުފެއްދި ހާއްސަ މެޓީރިއަލްއެކެވެ. މި މެޓީރިއަލް 3ޑީ ޕްރިންޓަރަށް ފީޑުކޮށްގެން ތައްޔާރުކުރި އޮނިގަނޑުތަކުގެ ބޭރުފުށް ހަދާފައިވަނީ ކުދި މުރަކަތައް ފަސޭހައިން ހިފަހައްޓައި އަދި އާލާވުމަށް މަގުފަހިވާނޭހެން ކަންކަށިކޮށެވެ. މިއީ ކުނި މަދުކުރުމާއި ކަނޑުގެ ދިރުންތައް އާލާކުރުމަށް ލިބުނު ބޮޑު ކުރިއެރުމެކެވެ.
މި އޮނިގަނޑުގެ ޑިޒައިން ފަރުމާކުރުމުގައި ދަރިވަރުން ބަލާފައިވަނީ ސިކުނޑި މުރަކަ (ބްރެއިން ކޯރަލް) ގެ ބައްޓަމާއި އޭގެ މަތީގައި ހުންނަ އެކި ކަހަލަ ރާޅު ކޫރުތަކަށެވެ. އެކި މޮޑެލްތައް ޓެސްޓުކުރުމަށްފަހު އެންމެ ފަހުން ނިންމި ޑިޒައިންގައި، އެއް އޮނިގަނޑު އަނެއް އޮނިގަނޑުމަތީގައި އަތުރާލެވޭނެހެން ބޮޑު ތިން ލޯވަޅު ހިމެނެއެވެ. އަދި އޮއިވަރުގެ ސަބަބުން ގުޑައިގެން ނުދާނެހެން އަރިމަތީގައި ފަތްޖެހި ރިޖްތަކެއް ހިމަނާފައިވާއިރު، ވެލިގަނޑު މަތީގައި ހުރަހެއްނެތި ހިފެހެއްޓުމަށް ތިން ފައި ކަހަލަ ބައިތަކެއް ވަނީ ހިމަނައިފައެވެ. މިއީ އެއްވެސް އިތުރު ކްލިޕެއް ނުވަތަ ހާއްސަ އެއްޗެއް ބޭނުންނުކޮށް، އެކި ބައިތައް ގުޅުވައިގެން ބޮޑު ފަރުތަކެއް ބިނާކުރެވޭ ގޮތަށް ހަދާފައިވާ މޮޑިއުލާ ސިސްޓަމެކެވެ.
ކަނޑުގެ އަޑީގައި ކުރިއަށްގެންދިޔަ ޓެސްޓުތަކުގައި މި އޮނިގަނޑުތަކުގައި 28 މުރަކަކޮޅު ހަރުކުރެވުނުއިރު، އޭގެ ތެރެއިން ހުރިހާ މުރަކައެއްވެސް ވަނީ ސަލާމަތުން ދިރިހުރެ ބޮޑުވާކަން ކުރެވިފައެވެ. މި ހުރިހާ މުރަކައެއް ސަލާމަތުން އިތުރުވުމަކީ 100 އިންސައްތައިގެ ކާމިޔާބީއެކެވެ. އޭގެ އިތުރުން، މި އޮނިގަނޑުތައް ބެހެއްޓިތާ ކުރު މުއްދަތެއްގެ ތެރޭގައި ވިނައާއި، މަހާއި، އިއްސާއި، ކަނޑުގެ އެހެނިހެން ކުދި ދިރުންތަކުގެ އިތުރުން އޮކްޓޯޕަސް ފަދަ ތަކެތިވެސް އެ ސަރަހައްދުގައި ދިރިއުޅެން ފަށާފައިވާކަން ވަނީ ފާހަގަކުރެވިފައެވެ.
ރީފްވައިވް ޓީމުގެ އަމާޒަކީ މި ޓެސްޓުތައް އިތުރު ސަރަހައްދުތަކަށް ފުޅާކޮށް، މުރަކަ އާލާކުރުމުގެ މަސައްކަތް އަގުހެޔޮކޮށް އަދި ފުޅާދާއިރާއެއްގައި ކުރިއަށްގެންދެވޭނެ ގޮތަށް މި ޑިޒައިން އިތުރަށް ފުރިހަމަކުރުމެވެ. މި މަޝްރޫއަށް ވަނީ ޖޭމްސް ޑައިސަން އެވާޑުގެ ޓައިވާން ރީޖަންގެ ނޭޝަނަލް ރަނަރ-އަޕް ލިބިފައެވެ. އަދި 2026 ވަނަ އަހަރުގެ ޔަންގް ޕިން ޑިޒައިން އެވާޑަށްވެސް މި މަޝްރޫއު ވަނީ ހުށަހަޅައިފައެވެ.
