މެލޭޝިޔާގެ ބޮޑުވަޒީރު އަންވަރު އިބްރާހީމް ރާއްޖެއަށް ކުރެއްވި ފުރަމާނަ ދަތުރުފުޅަކީ ދެ ގައުމުގެ ގުޅުމުގައި އާ ބާބެއް ހުޅުވިގެންދިޔަ ތާރީހީ ދަތުރުފުޅެއް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ވިދާޅުވެއްޖެއެވެ.
މީސް މީޑިއާގައި ހިއްސާކުރެއްވި ޕޯސްޓެއްގައި ރައީސް ވިދާޅުވީ، މި ދަތުރުފުޅުގައި ބޭއްވުނު ރަސްމީ މަޝަވަރާ ބައްދަލުވުންތަކަކީ ނަތީޖާ ނެރެވުނު، އަދި ކުރިމަގަށް ވަރުގަދަ ބިންގަލެއް އެޅިގެންދިޔަ މަޝްވަރާތަކެއް ކަމަށެވެ. މި މަޝްވަރާތަކުގައި ވިޔަފާރިއާއި އިންވެސްޓްމަންޓް، ތައުލީމާއި ސިއްހަތު، ފަތުރުވެރިކަމާއި ދެމެހެއްޓެނިވި ތަރައްގީ، އިސްލާމީ ކަންކަން އަދި ދިފާއީ ދާއިރާއިން ދެ ގައުމުގެ ގުޅުން އިތުރަށް ބަދަހިކުރުމަށް ވަނީ އެއްބަސްވުންތަކެއް ގާއިމުކުރެވިފައެވެ.
It was an absolute honour to host you, dear Prime Minister @anwaribrahim, on your landmark State Visit to the Maldives.
Our fruitful official talks have laid a strong foundation for the future, reaffirming our shared commitment to expanding cooperation in key areas, including… https://t.co/T7Io5zsPgB pic.twitter.com/iLTQvQdjY1
— Dr Mohamed Muizzu (@MMuizzu) September 18, 2026
މި ދަތުރުފުޅުގެ ތެރެއިން ދެ ގައުމުގެ މަރުކަޒީ ބޭންކުތައް މެދުވެރިކޮށް، ކުރު މުއްދަތުގެ 100 މިލިއަން އެމެރިކާ ޑޮލަރުގެ ކަރަންސީ ސްވަޕް ފެސިލިޓީއެއް ދިނުމާމެދު ވިސްނަވާނެ ކަމަށް މެލޭޝިޔާ ސަރުކާރުން ނިންމެވި ނިންމެވުމަށް ރައީސް ވަނީ ހާއްސަ ޝުކުރެއް އަދާކުރައްވައިފައެވެ. މީގެއިތުރުން، ދެ ގައުމުގެ ދެމެދުގައި ޕްރިފަރެންޝަލް ޓްރޭޑް އެގްރީމެންޓެއް (ޕީޓީއޭ) އެކުލަވާލުމުގެ މަޝްވަރާތައް ފެށުމަށް މެލޭޝިޔާ ސަރުކާރުން އުސޫލެއްގެ ގޮތުން އެއްބަސްވެފައިވާތީ އެކަމަށް ވެސް ރައީސް މަރުހަބާ ވިދާޅުވިއެވެ. މިއީ ދެ ގައުމުގެ އިގްތިސާދީ ގުޅުން ވަރުގަދަކޮށް، ވިޔަފާރިތަކަށާއި ރައްޔިތުންނަށް އާ ފުރުސަތުތަކެއް ހުޅުވިގެންދާނެ ކަމެއް ކަމުގައި އެމަނިކުފާނު ފާހަގަކުރެއްވިއެވެ.
ހަމައެއާއެކު، ޕީއެންސީގެ ގައުމީ މަހާސިންތާއަށް މެލޭޝިޔާގެ ބޮޑުވަޒީރު ފޮނުއްވި ހިތްވަރުގެ މެސެޖަށް ވެސް ރައީސް މުޢިއްޒު ވަނީ ޝުކުރު އަދާކުރައްވައިފައެވެ.
ރައީސް މުޢިއްޒު ވިދާޅުވީ، މި ދަތުރުފުޅުގެ ސަބަބުން ދެ ގައުމުގެ ދެމެދުގައިވާ ޒަމާންވީ އެކުވެރިކަމާއި އަހުވަންތަކަމުގެ ގުޅުން އިތުރު އުސްމިންތަކަކަށް ވާސިލުވެ، ދެ ޤައުމުގެ ރައްޔިތުންނަށް އޭގެ ލާބައާއި މަންފާ ލިބިގެންދާނެ ކަމުގެ ފުރިހަމަ ޔަގީންކަން އެބައޮތް ކަމަށެވެ. އަދި ކުރިއަށް އޮތް އަހަރުތަކުގައި މި ގުޅުން އިތުރަށް ބަދަހިވެގެންދިއުމަށް ރައީސް ވަނީ އެދިވަޑައިގެންފައެވެ.
