ނުކުޅެދުންތެރިކަން ހުންނަ ފަރާތްތަކަށް ނުރައްކާތެރި ހާލަތްތައް ވަގުތުން ދެނެގަނެވޭނެ ފަދަ ޒަމާނީ ވަސީލަތްތައް، ކުރިއަށް ހުރި ބޯހިޔާވަހިކަމުގެ މަޝްރޫއުތަކާއި މިހާރު މީހުން ދިރިއުޅެމުންދާ ފްލެޓްތަކުގައި ވެސް ގާއިމުކޮށްދެއްވުމަށް މަސައްކަތްޕުޅު ކުރައްވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒު ކުރިއަށް ގެންދަވާ ”ރައްޔިތުންގެ އަޑު“ ޕްރޮގްރާމްގެ ތެރެއިން، އިވުމުގެ ނުކުޅެދުންތެރިކަން ހުރި ދެމަފިރިއަކު ހުށަހެޅުއްވި ކަންބޮޑުވުންތަކަށް ރިއާޔަތްކުރައްވައި، ވިދާޅުވީ ކުއްލި ހާލަތްތައް ފަސޭހައިން އަންގައިދޭ ޒަމާނީ ނިޒާމުތައް މިހާރު ހުރި ފްލެޓްތަކާއި ކުރިއަށް ހުރި ބޯހިޔާވަހިކަމުގެ މަޝްރޫއުތަކުގައި ގާއިމުކޮށްދެއްވުމަށް މަސައްކަތްޕުޅު ކުރައްވާނެ ކަމަށެވެ.
އެ ދެމަފިރިން ރައީސާ ބައްދަލުކުރައްވައި ފާހަގަކުރެއްވި ގޮތުގައި، ދިރިއުޅޭ އިމާރާތެއްގައި އަލިފާނުގެ ހާދިސާއެއް ފަދަ ނުރައްކާތެރި ކަމެއް ދިމާވެއްޖެ ނަމަ، އެކަން ވަގުތުން ދެނެގަނެވޭނެ އެކަށީގެންވާ ވަސީލަތެއް ނެތުމަކީ ބޮޑު ކަންބޮޑުވުމަކާއި ބިރުވެރިކަމެކެވެ. އަދި ބަލި ބައްޕައެއް ބަލަމުންދާ ދަތި ހާލަތުގައި، އެހީއަކަށް އެދުމުގައި ހުރި ގޮންޖެހުންތަކާއި، ސްކޫލު ކުދިންގެ ކަންކަމުގައި ޓީޗަރުންނާ މުއާމަލާތު ކުރުމުގައި ދިމާވާ ދަތިތައް ވެސް އެ މީހުން ވަނީ އިޝާރާތުގެ ބަހުގެ ތަރުޖަމާނެއްގެ އެހީއާ އެކު ރައީސާ ހިއްސާކޮށްފައެވެ.
މި ކަންބޮޑުވުންތަކަށް ޖަވާބު ދެއްވަމުން ރައީސް ވިދާޅުވީ، ސަރުކާރުން އަލަށް ހިންގާ ބޯހިޔާވަހިކަމުގެ މަޝްރޫއުތަކުން ފްލެޓް ދޫކުރާއިރު ނުކުޅެދުންތެރިކަން ހުންނަ ފަރާތްތަކުގެ އާއިލާތަކަށް އެންމެ ތިރީ ފަންގިފިލާތައް ހާއްސަކޮށްދިނުމުގެ އިތުރުން، އެފަދަ ފަރާތްތައް މިހާރު ދިރިއުޅެމުންދާ ތަންތަނުގައި ވެސް ލުއިފަސޭހަ އަދި ރައްކާތެރި އިންތިޒާމުތަކެއް ހަމަޖެއްސުމަށް ހާއްސަ އިސްކަމެއް ދެއްވާނެ ކަމަށެވެ.
ދުނިޔޭގެ އެކި ގައުމުތަކުގައި ވެސް ނުކުޅެދުންތެރިކަން ހުންނަ ފަރާތްތަކަށް ހާއްސަކޮށްގެން އުފައްދާފައިވާ ބޯހިޔާވަހިކަމުގެ ޒަމާނީ ޔުނިޓުތަކުގައި، އަލިފާނުގެ ހާދިސާތަކާއި އެހެނިހެން ނުރައްކާތައް އަންގައިދިނުމަށް އަލިގަދަ ބައްތިތަކާއި، ވަރުގަދަ އަށް ތުރުތުރުއަޅާ ވައިބްރޭޝަން ޑިވައިސްތަކާއި، އަދި ހާއްސަ މެސެޖިން ނިޒާމުތައް ބޭނުންކުރެއެވެ.
ރާއްޖޭގެ ފްލެޓްތަކުގައި ވެސް މިފަދަ ނިޒާމުތައް ހަރުކުރުމަކީ މިފަދަ ފަރާތްތަކުގެ ސަލާމަތާއި ރައްކާތެރިކަން ކަށަވަރުކުރުމަށް އެޅޭ މުހިންމު ފިޔަވަޅަކަށް ވެގެންދާނެ އެވެ.
