ރަތް ކަނޑުގެ އައްސޭރީގައި އޮންނަ ސަޢުދީ ޢަރަބިއްޔާގެ މުހިންމު ބަނދަރެއް ކަމަށްވާ ޔަންބޫ ޕޯޓަށް ޔަމަނުގެ ޙޫތީން ވަރުގަދަ ޙަމަލާއެއް ދީފިއެވެ.
މި ޙަމަލާއާ ގުޅިގެން އެ ސަރަޙައްދުގައި ބޮޑެތި އަލިފާނުގެ ހާދިސާތަކެއް ހިނގަމުންދާކަމަށް ރިޕޯޓުތައް ބުނާއިރު، މީސްމީޑިއާގައި މިހާރު ދަނީ މީގެ މަންޒަރުތައް ފެންނަ ވީޑިއޯތައް ދައުރުވަމުންނެވެ.
ނާސާގެ ’ފަރމްސް‘ ސެޓެލައިޓް މަންޒަރުތަކުން ދައްކާ ގޮތުގައި އެ ސަރަޙައްދުގައި އަލިފާން ރޯވެފައިވާކަމުގެ ނިޝާންތައް ވަނީ ފެންނަން ފަށާފައެވެ. ބެލެވޭ ގޮތުގައި މިއަލިފާން ރޯވެފައިވަނީ ބަނދަރުގެ ތެޔޯ ރައްކާކުރާ ތާނގީތަކުގައެވެ. މިހާތަނަށް ރަސްމީ ސެޓެލައިޓް މަންޒަރުތައް އާންމުކޮށްފައި ނުވި ނަމަވެސް، އަލިފާނުގެ އަސަރުތައް ސާފުކޮށް ފެންނަން ހުރިކަމަށް ރިޕޯޓުތައް ބުނެއެވެ.
ޔަންބޫ ޕޯޓަކީ ހުރްމޫޒް ކަނޑުއޮޅީގެ ބޭރުން ސަޢުދީން ތެޔޯ އެކްސްޕޯޓުކުރުމަށް އޮތް އެންމެ ފަހުގެ، އަދި އެންމެ މުހިންމު މަގެވެ. ޙޫތީންގެ މި ޙަމަލާއަކީ އީރާނުގެ ކޮންޓްރޯލް އޮންނަ ހުރްމޫޒް ކަނޑުއޮޅި ފިޔަވައި، އެހެން މަގަކުން ތެޔޯ އެކްސްޕޯޓުކުރުމަށް ސަޢުދީން ބިނާކޮށްފައިވާ އުމްރާނީ ވަސީލަތްތަކަށް އަމާޒުކޮށް ޔަމަނުން ހިންގަމުންދާ ފުޅާ ކެމްޕޭނުގެ ދަށުން ދިން ޙަމަލާއެކެވެ.
ސަޢުދީ ޢަރަބިއްޔާގެ ތެލުގެ ވިޔަފާރި ހިމާޔަތްކުރުމަށްޓަކައި އެ ޤައުމުން ވަނީ ވޭތުވެދިޔަ ދިހަވަރަކަށް އަހަރުގެ ތެރޭގައި އެތައް ސަތޭކަ ބިލިއަން ޑޮލަރެއް ޚަރަދުކޮށްގެން ވަރުގަދަ އަސްކަރީ ނިޒާމެއް ބިނާކޮށްފައެވެ. ނަމަވެސް އެމެރިކާއިން ފޯރުކޮށްދީފައިވާ ޒަމާނީ މަތިންދާބޯޓުތަކާއި، ޕޭޓްރިއަޓް މިސައިލް ސިސްޓަމްތަކުގެ އިތުރުން، އެމެރިކާގެ ސީދާ މަދަދު ލިބެމުންދިޔަ ނަމަވެސް، ޔަމަނުން ފޮނުވާލި ޑްރޯން ޙަމަލާއެއް ހުއްޓުވުމުގައި އެ ނިޒާމުތައް ވަނީ ނުކުޅެދިފައެވެ. މިއާއެކު ސަޢުދީގެ އެކްސްޕޯޓުގެ އެންމެ މުހިންމު އެއް މަގުގައި މިވަނީ އަލިފާން ރޯކޮށްލާފައެވެ.
