ވެރިކަންކުރާ މައި ޕާޓީ، ޕީޕަލްސް ނެޝަނަލް ކޮންގްރެސް (ޕީއެންސީ) ގެ މަތީ މަޖިލިސް ނުވަތަ ކޮންގްރެސްގައި، 2028 ވަނަ އަހަރު ބޭއްވުމަށް ހަމަޖެހިފައިވާ ރިޔާސީ އިންތިހާބުގައި އެ ޕާޓީގެ ފަރާތުން ވާދަކުރައްވާނެ ކެންޑިޑޭޓަކަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހަމަޖެއްސުމަށް އިއްތިފާގުން ނިންމައިފިއެވެ.
މި ނިންމުން ނިންމާފައިވަނީ ކޮންގްރެސްގެ މިއަދުގެ ޖަލްސާގައި، ފުވައްމުލަކު ދެކުނު ދާއިރާގެ ހާއްސަ މަންދޫބު ޢަބްދުﷲ އިބްރާހީމް ހުށަހެޅުއްވި ގަރާރަކާ ގުޅިގެންނެވެ. އެ ގަރާރުގައި ފާހަގަކޮށްފައިވަނީ، ރައީސް ޑރ. މުޢިއްޒު ގައުމަށް ކޮށްދެއްވަމުން ގެންދަވާ އަގުހުރި ހިދުމަތްތައް މެދުކެނޑުމެއްނެތި ކުރިއަށް ގެންދިއުމަށްޓަކައި އެމަނިކުފާނަށް ދެވަނަ ދައުރެއް ދިނުމަކީ ޕާޓީގެ މެންބަރުންނާއި އާންމު ރައްޔިތުންގެ ވެސް އެދުމެއް ކަމަށެވެ. މީގެއިތުރުން، ޕާޓީގެ އަސާސީ ގަވާއިދުގައިވާ ގޮތުގެ މަތިން، ޕާޓީގެ މެންބަރަކު ރައީސުލްޖުމްހޫރިއްޔާގެ މަގާމުގައި ހުންނަވައި ދެވަނަ ދައުރަކަށް އެދިވަޑައިގެންފިނަމަ، ޕްރައިމަރީއަކާ ނުލައި ޓިކެޓް އެރުވޭނެކަން ވެސް އެ ގަރާރުގައި ބަޔާންކޮށްފައިވެއެވެ.
މި ގަރާރު ފާސްކުރުމަށް ނެގުނު ފާޅުކަން ބޮޑު ވޯޓުގައި، ކޮންގްރެސްގައި ބައިވެރިވި 1،119 މަންދޫބުންގެ އިއްތިފާގުން ވަނީ މި ނިންމުމަށް ފުރިހަމަ ތާއީދު ދީފައެވެ.
ކޮންގްރެސްގެ ރިޔާސަތުގައި އިންނެވި ރައްޔިތުންގެ މަޖިލީހުގެ ރައީސް އަދި ޕީއެންސީގެ ޗެއަރޕާސަން ޢަބްދުއްރަޙީމް ޢަބްދުﷲ ވިދާޅުވީ، މިއީ މި ކޮންގްރެސްގެ އެންމެ ތާރީހީ އަދި މުހިންމު އެއް ނިންމުން ކަމަށެވެ. އެހެންކަމުން، މި ގަރާރަށް ފުޅާ ދާއިރާއެއްގައި ބަހުސްކުރުމުގެ ފުރުސަތު މަންދޫބުންނަށް ފަހިކޮށްދެއްވި ކަމަށް އެމަނިކުފާނު ފާހަގަކުރެއްވިއެވެ.
މި ގަރާރަށް ތާއީދުކުރައްވައި ވާހަކަދައްކަވަމުން ޕީއެންސީގެ ޕާލަމެންޓްރީ ގްރޫޕްގެ ލީޑަރު އިބްރާހީމް ފަލާހު ވިދާޅުވީ، މަޖިލީހުގެ ސުޕަ މެޖޯރިޓީ އޮތް ޕީއެންސީގެ 73 މެންބަރުންގެ ވެސް އެއްބަސްވުމަކީ 2028 ގެ ރިޔާސީ ޓިކެޓް ރައީސް މުޢިއްޒަށް އެރުވުން ކަމަށެވެ. އަދި ޕީއެންސީއަށް ވެރިކަން ކާމިޔާބުކުރެވުނީ އެއިރު ރާއްޖޭގެ މަސްރަހުގައި ހުންނެވި އެންމެ ގާބިލު ލީޑަރަކީ އެމަނިކުފާނު ކަމަށް ވުމުން ކަމަށާއި، މިއަދު ރައްޔިތުން ތިބީ އެ ނިންމުމުގެ ހެޔޮ ނަތީޖާއާއެކު ހިތްހަމަޖެހިގެން ކަމަށްވެސް ފަލާޙު ވިދާޅުވިއެވެ.
މި ގަރާރުގެ ބަހުސްގައި ރައީސުލްޖުމްހޫރިއްޔާގެ ނައިބު ޙުސައިން މުޙައްމަދު ލަޠީފާއި، ދިވެހިބަހާއި ސަގާފަތާއި ތަރިކައާ ބެހޭ ވަޒީރު ހީނާ ވަލީދުގެ އިތުރުން ޕާޓީގެ އިސް ލީޑަރުން ބައިވެރިވެވަޑައިގެން، ގަރާރަށް ފުރިހަމައަށް ތާއީދުކުރައްވާފައިވެއެވެ.
