މެދުއިރުމަތީގެ މަސްރަޙު އިތުރަށް ގޯސްވަމުންދާ ދަނޑިވަޅެއްގައި، އިޒްރޭލުގެ ކަމާބެހޭ ފަރާތްތަކުން ވަނީ ފަލަސްޠީނުގެ 7 މީހަކަށް 6 މަސް ދުވަހުގެ މުއްދަތަށް މަސްޖިދުލް އަޤްޞާއަށް ވަނުން މަނާކޮށްފައެވެ. މި ފިޔަވަޅު އަޅާފައިމިވަނީ، އިޒްރޭލުގެ ފުލުހުންގެ ޙިމާޔަތުގައި އިސްތިއުމާރުކޮށް ފޭރިގެންފައިވާ ބިންތަކުގައި ނުޙައްޤުން ދިރިއުޅެމުން އަންނަ ގިނަ ޢަދަދެއްގެ ޔަހޫދީ އާބާދުވެރިން (ސެޓްލަރުން) ވިދިވިދިގެން އަޤްޞާއަށް ވަދެގަންނަމުންދާ ދުވަސްވަރެއްގައެވެ.
ސެޕްޓެންބަރު 16 ވީ ބުދަ ދުވަހު އަޤްޞާއަށް ވަނުން މަނާކުރި 7 މީހުންގެ ތެރޭގައި އެ މިސްކިތުގެ ގާޑެއްގެ ގޮތުގައި މަސައްކަތްކުރަމުން އައި ސާމިރް އަބޫ ޤުވައިދަރް ވެސް ހިމެނެއެވެ. މި މީހުންނަށް މިކަން އަންގާފައިވަނީ ވަޓްސްއެޕް މެސެޖުތަކެއް މެދުވެރިކޮށެވެ. އޭގައި އެމީހުންނަށް ދިއުން މަނާ ސަރަޙައްދުތަކާއި މަގުތައް ވަނީ ބަޔާންކޮށްފައެވެ.
ޔަހޫދީންގެ އައު އަހަރުގެ ޢީދާ ގުޅިގެން 600 އެއްހާ ސެޓްލަރުން އަޤްޞާއަށް ވަނުމަށްފަހު، އަންގާރަ ދުވަހުވެސް 165 އަށްވުރެ ގިނަ ޔަހޫދީ އާންމުންވަނީ ހަތިޔާރުއެޅި އިޒްރޭލު ފުލުހުންގެ ޙިމާޔަތުގައި ޙަރަމްފުޅަށް ވަދެގަނެފައެވެ.
1967 ގެ އެއްބަސްވުމާ ކަނޑައެޅިގެން ޚިލާފަށް، ސެޓްލަރުން ވަނީ ބާބުލް މަޣާރިބާ އިން ވަދެ ފާޅުގައި ޔަހޫދީންގެ ތަލްމޫދީ އަޅުކަންތައް ކޮށްފައެވެ. މިއީ މުސްލިމުންގެ ބިމެއްގައި ޔަހޫދީންގެ ބާރުވެރިކަން ދެއްކުމަށްޓަކައި ގަސްތުގައި ކުރަމުންދާ ކަމެއްކަމަށް މަސްރަހު ދިރާސާކުރާ ފަރާތްތަކުން ބުނެއެވެ.
ފަލަސްޠީނުގެ އިސްވެރިންނާއި އިސްލާމިކް ވަޤުފް އިން އިންޒާރުދޭ ގޮތުގައި، މުސްލިމުންނަށް މިސްކިތަށް ވަނުން މަނާކޮށް، ޔަހޫދީންނަށް ޙިމާޔަތްދީގެން ހިންގާ މި ޢަމަލުތަކަކީ އަޤްޞާގެ ތާރީޚީ އަދި އިސްލާމީ ވަޙުދަތު ފުނޑުފުނޑުކޮށްލުމަށް ރާވައިގެން ހިންގާ ނުރައްކާތެރި މަޝްރޫޢެކެވެ. ކުރިއަށް އޮތް ޔޯމް ކިޕޫރް ޢީދާ ގުޅިގެން މިފަދަ ވަދެގަތުންތައް އިތުރުކުރުމަށް ޔަހޫދީ ޖަމާޢަތްތަކުން ގޮވާލަމުންދާއިރު، މިއީ މުޅި ސަރަޙައްދުގައި ބޮޑު ހަމަނުޖެހުމެއް ފެށިދާނެކަމެކެވެ.
