ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމާ ހަވާލުވެ ވަޑައިގަތް ފަހުން، ކުޅިވަރުގެ ދާއިރާއިން ރާއްޖެއަށް ބައިނަލްއަގުވާމީ ފެންވަރުގައި ފާހަގަކޮށްލެވޭ ބޮޑެތި ކުރިއެރުންތަކަކާއި ކާމިޔާބީތަކެއް ހޯދައިފިއެވެ.
މިކަން ހާމަކުރެއްވީ މިހާރު ކުރިއަށްދާ ޕީއެންސީގެ މަތީ މަޖިލިސް ނުވަތަ ކޮންގްރެސްގައި ޔޫތް މިނިސްޓްރީގެ ސެޝަންގައި މިނިސްޓަރު ޢަބްދުﷲ ރާފިޢުއެވެ.
މިގޮތުން، ނޮވެމްބަރު 2023 އިން ފެށިގެން އޮގަސްޓް 2026 ގެ ނިޔަލަށް ރާއްޖޭގެ އެތުލީޓުން ވަނީ ބައިނަލްއަގުވާމީ އެކި މުބާރާތްތަކުން ޖުމްލަ 62 މެޑަލް ހޯދައި، ގައުމަށް ރީތި ނަން ހޯދައިދީފައެވެ. މީގެ ތެރޭގައި ހިމެނެނީ 17 ރަން މެޑަލް، 18 ރިހި މެޑަލް އަދި 27 ބްރޯންޒް މެޑަލްއެވެ. މި މުއްދަތުގެ ތެރޭގައި އެކި ކުޅިވަރުތަކުން ރާއްޖެއިން ހޯދި ފާހަގަކޮށްލެވޭ ކާމިޔާބީތަކަށް ބަލާއިރު:
- އެތުލެޓިކްސް: ފުރަތަމަ އިންޓަރނޭޝަނަލް އިންވިޓޭޝަން ރިލޭ މުބާރާތުގައި ވާދަކޮށް ރާއްޖޭގެ އެތުލީޓުން ވަނީ 1 ރަން މެޑަލް، 2 ރިހި މެޑަލް އަދި 2 ބްރޯންޒް މެޑަލް ހޯދާފައެވެ.
- ބޮޑީބިލްޑިންގ: 15 ވަނަ ސައުތު އޭޝިއަން ބޮޑީބިލްޑިންގ އެންޑް ފިޒީކް ޗެމްޕިއަންޝިޕުގައި ރާއްޖެއިން ވަނީ 1 ރަން މެޑަލް އަދި 2 ރިހި މެޑަލް ހާސިލުކޮށްފައެވެ.
- ޓޭބަލް ޓެނިސް: ސައުތު އޭޝިއަން ރީޖަނަލް އަންޑަރ 15 އަދި އަންޑަރ 19 ޓޭބަލް ޓެނިސް ޗެމްޕިއަންޝިޕް 2024 ގައި ވާދަކޮށް ރާއްޖޭގެ ޓީމުން ވަނީ 3 ރިހި މެޑަލް އަދި 4 ބްރޯންޒް މެޑަލް ހޯދާފައެވެ.
- ޝޫޓިންގ: އޭޝިއަން ރައިފަލް/ޕިސްޓަލް ޗެމްޕިއަންޝިޕްގައި ވާދަކޮށް ރާއްޖޭގެ ޝޫޓަރުން ވަނީ 4 ބްރޯންޒް މެޑަލް ހޯދާފައެވެ.
- ނެޓްބޯޅަ: 1 ވަނަ އޭޝިއަން ނެޓްބޯޅަ މުބާރާތުގައި ވާދަކޮށް ދިވެހި ޓީމުން ވަނީ މުބާރާތުގެ 3 ވަނަ ހޯދާފައެވެ.
- ބާސްކެޓްބޯޅަ: ފީބާ އަންޑަރ 18 އޭޝިއާ ކަޕް: ސާބާ ކޮލިފަޔަރސް 2026 ގައި ވާދަކޮށް ރާއްޖޭގެ ޒުވާން ޓީމުން ވަނީ ފަޚުރުވެރި 3 ވަނަ ހޯދާފައެވެ.
- ބޮޑީބޯޑިންގ: ބުރުނު ޝިކަރު ބޮޑީބޯޑިންގ ޗެލެންޖް 2026 (ޑަބްލިޔުއެންބީއެލް އިވެންޓް) ގައި ރާއްޖޭގެ އެތުލީޓުން ވަނީ މުޅި މުބާރާތް ޑޮމިނޭޓްކޮށް، 1 ވަނަ، 2 ވަނަ އަދި 3 ވަނަ ކާމިޔާބުކޮށްފައެވެ.
ކުޅިވަރުގެ ދާއިރާއިން މިފަދަ ބޮޑެތި ކާމިޔާބީތަކެއް ރާއްޖެއަށް ލިބެމުންދަނީ، ކުޅިވަރު ތަރައްގީކޮށް އެތުލީޓުންނަށް ބޭނުންވާ ފުރުސަތުތައް ފަހިކޮށްދިނުމަށް މި ސަރުކާރުން ދެއްވާ ޚާއްސަ އަހައްމިއްޔަތުކަމުގެ ސަބަބުންނެވެ.
