ޣައްޒާގައި އިޒްރޭލުގެ ހަމަލާތަކުގައި ކުރިން ބޮޑެތި ގެއްލުންތަކެއް ލިބިފައިވާ އިމާރާތެއް ނުރައްކާތެރި ގޮތަކަށް ވެއްޓި މަދުވެގެން 20 މީހުން މަރުވެ، ސިމެންތި ކުނިފުނިތަކުގެ ދަށުގައި ގިނަ ބަޔަކު ތާށިވެއްޖެ އެވެ.
ޣައްޒާ ސިޓީގެ ތަލް އަލް-ހަވާ ސަރަހައްދުގައި ހުރި ހަ ބުރީގެ މި އެޕާޓްމަންޓް އިމާރާތް ރޭގަނޑުގެ ވަގުތެއްގައި ވެއްޓުނީ ކައިރީގައި ހުރި ގެތަކާއި ރެފިއުޖީން ތިބި ޓެންޓުތަކުގެ މައްޗަށެވެ.
މި ހާދިސާގައި މަރުވި މީހުންގެ ތެރޭގައި ފަސް ކުޑަކުދިން ހިމެނޭ އިރު، ގާކުނޑިތަކުގެ ދަށުގައި ތާށިވެފައިވާ މީހުން ހޯދުމުގެ މަސައްކަތް ރެސްކިއު ޓީމުތަކުން ކުރަމުންދަނީ ނުރައްކާތެރި ހާލަތެއްގައެވެ.
ޣައްޒާގެ ސިވިލް ޑިފެންސް އޭޖެންސީން ބުނި ގޮތުގައި، އިޒްރޭލުން ކުރިން ދިން ހަމަލާތަކުގައި އޮނިގަނޑަށް ބޮޑެތި ގެއްލުންތަކެއް ލިބިފައިވާތީ އެތަނުގައި މީހުން ނޫޅެން އިންޒާރު ދީފައިވީ ނަމަވެސް، ގެދޮރު ގެއްލިފައިވާ އާންމުން އެތަނުގައި ދިރިއުޅުނީ ހިޔާވަހިކަމެއް ހޯދާނެ އެހެން އިޚްތިޔާރެއް ނެތުމުންނެވެ.
ސަލާމަތްކުރުމުގެ މެޝިނަރީއާއި ބަރު އާލާތްތައް ޣައްޒާއަށް ވަދެވޭނެ މަގު އިޒްރޭލުން ބަންދުކޮށްފައިވުމުން، މީހުން ހޯދުމުގެ އޮޕަރޭޝަންތައް ކުރިއަށްދަނީ އާދައިގެ ކުދި އާލާތްތައް ބޭނުންކޮށްގެން ވަރަށް ދަތިކޮށެވެ.
އދ. އިން ހާމަކުރާ ގޮތުގައި ޣައްޒާގައި ހިނގަމުންދާ ހަނގުރާމައިގައި އާންމުންގެ ގެދޮރުގެ ބޮޑު ބަޔަކަށް ވަނީ ބޮޑެތި ގެއްލުންތަކެއް ލިބިފައެވެ.
އެގޮތުން މުޅި ޣައްޒާގައި ހަލާކުވެފައިވާ 2،000 އަށްވުރެ ގިނަ އިމާރާތުގައި މިހާރުވެސް ނުރައްކާތެރި ހާލަތެއްގައި އާންމުން ދިރިއުޅެމުންދާއިރު، ކުރިއަށް އޮތް ފިނިމޫސުމާއެކު ވާރޭވެހި އިތުރު 400 އަށްވުރެ ގިނަ އިމާރާތް ވެއްޓުމުގެ ނުރައްކާ ބޮޑުކަމަށް އަންދާޒާކުރެވެއެވެ.
އޮކްޓޫބަރު 7، 2023 ގައި ފެށުނު ހަނގުރާމައަށްފަހު ޣައްޒާގައި އުފެދިފައިވާ 61 މިލިއަން ޓަނުގެ ގާކުނޑިތައް ސާފުކުރުމަށް މަދުވެގެން ހަތް އަހަރު ނަގާނެ ކަމަށް އދ. އިން ވަނީ ލަފާކޮށްފައެވެ.
