އިންޑިއާގެ ހުޅަނގު ބަންގާޅު (ވެސްޓް ބެންގޯލް) ގައި ވެރިކަންކުރާ ބީޖޭޕީ ސަރުކާރުން، އެ ސްޓޭޓުގައި ހިންގާ އިސްލާމީ ތަޢުލީމުދޭ މަރުކަޒުތަކަށް އަމާޒުކޮށް ހަރުކަށި ފިޔަވަޅުތަކެއް އަޅަން ފަށައި، 252 މަދަރުސާއެއް ބަންދުކުރުމަށް އަންގައިފިއެވެ. އަދި އިތުރު 100 އެއްހާ މަދަރުސާއަށް ވަނީ ސުވާލުކޮށް ނޯޓިސް ފޮނުވާފައެވެ.
ޖޫން މަހު ޗީފް މިނިސްޓަރު ސުވެންދޫ އަދިކާރީގެ އަމުރަށް ފެށި މި އޮޕަރޭޝަނުގައި، މަދަރުސާތަކުގެ ރަޖިސްޓްރޭޝަނާއި، ފަންޑު ހޯދާ ގޮތްތަކާއި، އަދި ހިންގުމުގެ ނިޒާމުތައް ވަނީ ބަލައި ފާސްކޮށްފައެވެ. ނަމަވެސް، ފާޑުކިޔާ ފަރާތްތަކުން ބުނާގޮތުގައި މިއީ ސީދާ މުސްލިމުންގެ ތަޢުލީމީ ނިޒާމާއި ދީނީ ވަޙުދަތު ނައްތާލުމަށް ސަރުކާރުން ރާވައިގެން ހިންގާ ޙަރަކާތެކެވެ.
މައިނޯރިޓީ އެފެއާޒް މިނިސްޓަރު ކްޝުދިރާމް ޓުޑޫ ވިދާޅުވި ގޮތުގައި، ބަންދުކުރަން އެންގި 252 މަދަރުސާއަކީ ސަރުކާރުގެ ރަސްމީ ހުއްދައެއް ނެތި، އަދި އަސާސީ ވަސީލަތްތައްވެސް ނެތި ހިންގަމުންދާ ތަންތަނެވެ. ރަސްމީ ހިސާބުތައް ދައްކާގޮތުން ހުޅަނގު ބަންގާޅުގައި ރަޖިސްޓްރީކޮށްގެން 2,132 މަދަރުސާ ހިންގާއިރު، ހުއްދަ ނެތި 2,400 އެއްހާ މަދަރުސާ ހިންގަމުންދެއެވެ.
އެންމެ ބޮޑަށް އަސަރުކުރި ސަރަޙައްދުތައް: މި ފިޔަވަޅުތަކުގެ އެންމެ ބޮޑު އަސަރެއް ކޮށްފައިވަނީ އަމިއްލަ ފަރާތްތަކުން ހިންގާ މަދަރުސާތަކަށެވެ. އެގޮތުން ބަންގްލަދޭޝްއާ ގުޅިފައިވާ ބޯޑަރު ސަރަޙައްދުތަކާއި މުސްލިމުން ގިނަ ޑިސްޓްރިކްޓްތައް ކަމަށްވާ މާލްޑާ އާއި މުރްޝިދާބާދުގެ ގިނަ މަދަރުސާތަކެއް ބަންދުކުރަން ވަނީ އަންގާފައެވެ.
ސްޓޭޓްގެ ޕަންޗާޔަތީ ރާޖް މިނިސްޓަރު ދިލީޕް ގޯޝް ވަނީ މި ނިންމުމަށް ތާއީދުކޮށް، ބައެއް މަދަރުސާތަކަކީ ޤައުމާ ދެކޮޅު ޙަރަކާތްތައް ހިންގުމަށް ބޭނުންކުރާ ތަންތަން ކަމަށް ތުހުމަތުކޮށްފައެވެ. އަދި ހައްދުފަހަނައެޅުމުގެ މައްސަލަތަކުގައި ހައްޔަރުކުރެވޭ ބައެއް މީހުންނަކީ މިފަދަ ތަންތަނުގައި ކިޔަވައިދޭން އުޅޭ މީހުންކަމަށް އޭނާ ބުންޏެވެ.
އިދިކޮޅު ޕާޓީ ޓީއެމްސީގެ އެމްއެލްއޭ ކުނާލް ގޯޝް ވަނީ ސަރުކާރުގެ މި ވާހަކަތައް ކުށްވެރިކޮށްފައެވެ. އޭނާ ބުނީ މަދަރުސާތަކަކީ ޓެރަރިސްޓުން އުފައްދާ ތަންތަން ކަމަށް ސިފަކުރުމަކީ ބަލައިގަނެވޭނެ ކަމެއް ނޫންކަމަށެވެ. ޙައްޤުތަކަށް ވަކާލާތުކުރާ ފަރާތްތަކުންވެސް ބުނަނީ، މަދު ބައެއްގެ މައްސަލައެއްގައި މުޅި މުސްލިމް މުޖުތަމަޢުގެ ބޮލުގައި ބޮޑެތި އިލްޒާމްތައް އެޅުވުމަކީ ބޭއިންސާފެއް ކަމަށެވެ.
މިއީ ހަމަ އެހެން ޤައުމުތަކުގައިވެސް ކަން ހިނގާ އުސޫލެވެ. މުސްލިމުންގެ ބަޔަކަށް އަނިޔާވެރިވުމަށް ބޭނުންކުރާ އެންމެ ބޮޑު ހަތިޔާރަކީ ’ހައްދުފަހަނައެޅުން’، ’ހަރުކަށި ފިކުރު‘, ’ޓެރަރިޒަމް‘ ފަދަ ލޭބަލްތަކެވެ. އެޔަށްފަހު ސަރުކާރުތަކުން އެ ލޭބަލްކުރާ ބަޔަކާ ދޭތެރޭ ކިތަންމެ ބޭއިންސާފުން ކަންތައްކުރިޔަސް އެކަމާ ދެކޮޅަށް ވަކާލާތުކުރާނެ ބަޔަކު ވަރަށް މަދެވެ. އެންމެ ބޮޑު ހިތާމައަކީ އިސްލާމްދީނާ މުސްލިމުންނާ ދެކޮޅަށް ކާފަރު ޤައުމުތަކުން ބޭނުންކުރަމުންދާ މިފަދަ ނުބައި މާފްހޫމްތައް މުސްލިމް ޤައުމުތަކުގެ ވެރިކަންތަކުންވެސް އަމިއްލަ މުސްލިމް އާބާދީތަކާ ދެކޮޅަށް ބޭނުންކުރުމެވެ. މީގެ ސަބަބުން އިސްލާމްދީނަށް ހުތުރު ނަން ލިބި، މުސްލިމުން ބައިބައިވެ ނިކަމެތިވެގެން ދިއުމެވެ.
