މައްކާގައި މިވަގުތު ތިބި ދިވެހި އުމްރާވެރިންގެ ހާލު ރަނގަޅު ކަމަށާއި އެ ފަރާތްތަކަށް އެއްވެސް ނުރައްކަލެއް ނެތް ކަމަށް އިސްލާމީ ކަންތައްތަކާއި އައުޤާފާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.
ވަޒީރު މި މޭރުމުން ވިދާޅުވީ، ސަޢޫދީ ޢަރަބިއްޔާއަށް އަމާޒުކޮށް ދެމުންދާ ހަމަލާތަކާ ގުޅިގެން، މައްކާގެ މުގައްދަސް ބިމަށާއި ޖިއްދާ އަދި ޠާއިފަށް ހަމަލާއެއް އަތުވެދާނެ ކަމުގެ އިންޒާރެއް ނެރުމާ ގުޅިގެން ކަންބޮޑުވުން އުފެދިފައިވާ ދަނޑިވަޅެއްގައެވެ. އެހެންނަމަވެސް، މި އިންޒާރުތައް ވަނީ މާ ގިނައިރުތަކެއް ނުވެ ކަމާބެހޭ ފަރާތްތަކުން އުވާލައިފައެވެ.
މިއީ މެދުއިރުމަތީގެ މަސްރަޙު ގޯސްވެ ހަނގުރާމަ ފެށުނު ފަހުން މައްކާގެ ސަރަޙައްދަށް މިފަދަ އިންޒާރެއް ނެރުނު ފުރަތަމަ ފަހަރެވެ. މި އިންޒާރާ ގުޅިގެން ސަޢޫދީގެ މަދަނީ ދިފާއުން ފަހުން ވަނީ، މި ސަރަހައްދުތަކަށް އެޅި ރައްކާތެރިކަމުގެ ކުއްލި ފިޔަވަޅުތައް މިހާރު ނިމުމަކަށް އައިސްފައިވާކަން ކަށަވަރުކޮށްދީ، ޢާންމު ހާލަތަކަށް ރުޖޫއަވެފައިވާކަން ހާމަކޮށްފައެވެ.
މި އިންޒާރުތައް ނެރެފައި މިވަނީ، ޔަމަނުގެ ސަރަޙައްދުން ފޮނުވައިލި ބެލިސްޓިކް މިސައިލާއި ޑްރޯން ހަމަލާތަކެއްގައި ސަޢޫދީގެ ދެކުނުގެ ސަރަޙައްދުތަކުން 13 މީހުން ޒަހަމްވިތާ އެއް ދުވަސް ފަހުންނެވެ.
ޔަމަނުން ދެމުންދާ މިފަދަ ހަމަލާތަކުގެ ސަބަބުން ސަޢޫދީ ޢަރަބިއްޔާގެ މުހިންމު ސަރަޙައްދުތަކާއި އުމްރާނީ ވަސީލަތްތަކުގެ ރައްކާތެރިކަމާމެދު ވަނީ ބޮޑެތި ކަންބޮޑުވުންތަކެއް އުފެދިފައެވެ. އަދި މިފަދަ ހަމަލާތައް ހުއްޓުވައި، ސަރަހައްދީ އަމަންއަމާންކަމާއި ސުލްހަ މަސަލަސްކަން ގާއިމުކުރުމަށްޓަކައި މެދުއިރުމަތީގެ ގައުމުތަކުންނާއި ބައިނަލްއަގުވާމީ މުޖުތަމައުން ދަނީ ގިނަގުނަ މަސައްކަތްތަކެއް ކުރަމުންނެވެ.













