ހުޅުމާލެ ދެވަނަ ފިޔަވަހީގައި ކާރަކާއި ސައިކަލެއް ޖެހި ހިނގި ނުރައްކާތެރި އެކްސިޑެންޓެއްގައި ސީރިއަސް އަނިޔާތަކެއް ލިބުނު މީހަކަށް ހޮސްޕިޓަލުގައި ފަރުވާދެމުން ދަނިކޮށް ނިޔާވެއްޖެއެވެ.
މި ހާދިސާގައި ނިޔާވެފައިވަނީ، ޅ. ކުރެންދުއަށް ނިސްބަތްވާ އުމުރުން 62 އަހަރުގެ މުޙައްމަދު އަފީފެވެ. އޭނާ ނިޔާވީ ޓްރީޓޮޕް ހޮސްޕިޓަލުގެ އައިސީޔޫގައި ފަރުވާދެމުން ދަނިކޮށެވެ.
ފުލުހުންގެ އިދާރާއިން މައުލޫމާތު ދެއްވި ގޮތުގައި، މި އެކްސިޑެންޓް ހިނގާފައިވަނީ މިދިޔަ މަހުގެ 31 ވަނަ ދުވަހު ހުޅުމާލެ ފޭސް 2 ގެ ދުނބުރިގަސްމަގާއި ހީނާމާހިނގުން ގުޅުނު ކަންމަތީގައެވެ. މި ހާދިސާ ހިނގި ވަގުތު ސައިކަލު ދުއްވަން އިނީ ނިޔާވި އަފީފެވެ. އަދި ސައިކަލުގެ ފަހަތުގައި އޭނާގެ 24 އަހަރުގެ ދަރިފުޅު އިން ކަމަށާއި، މި އެކްސިޑެންޓުގައި އެ ދެބަފައިންނަށްވެސް އެކިވަރުގެ އަނިޔާތައް ލިބުނު ކަމަށް ފުލުހުން ބުނެފައިވެއެވެ.
ނިޔާވި މުޙައްމަދު އަފީފަކީ މާލެއާއި ހުޅުމާލޭގެ ސްކޫލްތަކުގައި ޓީޗަރެއްގެ ގޮތުގައި ތަޢުލީމީ ދާއިރާއަށް ގިނަ އަހަރުތަކެއް ވަންދެން އަގުހުރި ޚިދުމަތްތަކެއް ކޮށްދެއްވާފައިވާ ބޭފުޅެކެވެ.
އަފީފުގެ މައްޗަށް ކުރެވޭ ކަށުނަމާދު ބޭއްވުމަށް ހަމަޖެހިފައިވަނީ މިއަދުގެ މެންދުރު ނަމާދަށްފަހު ހުޅުމާލެ ސަހަރާ މިސްކިތުގައެވެ.
