ލިތުއޭނިއާގެ ދެވަނައަށް އެންމެ ބޮޑު ސިޓީ ކަމަށްވާ ކައުނަސްގެ މިސްކިތެއްގައި ހުކުރު ނަމާދު ކުރަމުންދަނިކޮށް، ގާތްގަނޑަކަށް 100 އެއްހާ ސައިކަލު ދުއްވާ މީހުންގެ (ބައިކަރުންގެ) ގްރޫޕަކުން ގޮސް އަޑުގަދަކޮށް، އޫރު ބޮލެއް ދައްކައި ހަމަނުޖެހުން ހިންގަން މަސައްކަތްކޮށްފިއެވެ.
މި މައްސަލައާ ގުޅިގެން ލިތުއޭނިއާގެ ފުލުހުން ވަނީ ނަފްރަތު އުފެއްދުމުގެ ކުށުގެ ދަށުން ޖިނާއީ ތަޙުޤީޤެއް ފަށާފައެވެ. އަދި މިކަމާ ގުޅިގެން މުސްލިމް މުޖުތަމަޢުގެ އިސްވެރިން ވަނީ ސަލާމަތީ ފިޔަވަޅުތައް ވަރުގަދަކޮށްދިނުމަށް ސަރުކާރަށް ގޮވާލާފައެވެ.
ސެޕްޓެންބަރު 11 ވީ ހުކުރު ދުވަހުގެ މެންދުރުގެ ވަގުތެއްގައި، މިސްކިތް ކައިރީގައި އޮންނަ ރަމީބެސް ޕާކަށް މި ގްރޫޕް އެއްވެ، ސައިކަލުތަކުގެ އިންޖީނުގެ އަޑުގަދަކޮށް، ބާރަށް ލަވަޖަހައި އަދި ”ލިތުއޭނިއާ“ އަށް ގޮވައި ނަމާދަށް ހުރަސްއަޅަން ވަނީ މަސައްކަތްކޮށްފައެވެ.
މުސްލިމުންނަށް ޖެއްސުންކޮށް ރުޅިއެރުވުމުގެ ގަސްތުގައި މި ގްރޫޕުން ވަނީ ކަނޑާފައިވާ އޫރެއްގެ ބޯ އެތަނަށް ގެންގޮސް ދައްކާފައެވެ. މިފަދަ ބޮޑު ގޯނާއެއް ކުރިމަތިވި ނަމަވެސް، މިސްކިތުގައި ތިބި މުސްލިމުން ވަނީ ސާބިތުކަމާއެކު ނަމާދު ނިންމާލާފައެވެ.
ލިތުއޭނިއާގެ މުފްތީ އަލެކްސަންދްރާސް ބެގަންސްކާސް ވަނީ މި ޢަމަލު ކުށްވެރިކުރޮށް، މުސްލިމުންގެ ސަލާމަތްތެރިކަން ކަށަވަރުކުރުމަކީ ސަރުކާރުގެ ޒިންމާއެއްކަން ހަނދާންކޮށްދީފައެވެ. އަދި މިސްކިތުގެ ވަށައިގެން ފެންސު ޖެހުމަށާއި، ދީނީ ނަފްރަތު އުފެއްދުމާ ދެކޮޅަށް ހަރުކަށި ފިޔަވަޅުތަކެއް އެޅުމަށް އޭނާ ވަނީ ގޮވާލާފައެވެ.
ކައުނަސްގެ ފުލުހުން ވަނީ ޢާންމު އެއްވުންތަކާބެހޭ ޤާނޫނާ ޚިލާފުވި މައްސަލައިގެ އިތުރުން، ބަޔަކާމެދު ނަފްރަތު އުފެއްދުމުގެ ކުށުގެ ދަށުން ޖިނާއީ ތަޙުޤީޤެއް ފަށާފައެވެ.
