އެމެރިކާގެ ވޯރ ޑިޕާޓްމަންޓްގެ އިންސްޕެކްޓަރ ޖެނެރަލް ނެރުއްވި އާ ރިޕޯޓެއްގައި، އީރާނާ ދެކޮޅަށް އެމެރިކާއިން ކުރަމުންދާ ހަނގުރާމައިގެ ސަބަބުން މާލީ ގޮތުންނާއި އަސްކަރީ ވަސީލަތްތަކަށް ވަރަށް ބޮޑު ހީނަރުކަމެއް އައިސްފައިވާކަން ހާމަކޮށްފިއެވެ.
”އޮޕަރޭޝަން އެޕިކް ފިއުރީ“ ގެ ނަމުން ނަންދީފައިވާ މި ވަރުގަދަ އަސްކަރީ އޮޕަރޭޝަނަށް، ޖޫން 30، 2026 ގެ ނިޔަލަށް ގާތްގަނޑަކަށް 33.4 ބިލިއަން ޑޮލަރު ޚަރަދުވެފައިވާކަމަށް އިންސްޕެކްޓަރ ޖެނެރަލްގެ ރިޕޯޓުގައި ބަޔާންކޮށްފައިވެއެވެ. މި ބޮޑު ޚަރަދުގެ އިތުރުން، ގިނަ ޢަދަދެއްގެ ޒަމާނީ ހަތިޔާރު ބޭނުންކުރަން ޖެހުމުގެ ސަބަބުން، އެމެރިކާގެ އަސްކަރީ ގުދަންތަކުގައި ހުރި މިސައިލްތައް މަދުވެ، ދުނިޔޭގެ އެހެން ސަރަޙައްދުތަކުގައި އެމެރިކާގެ އަސްކަރީ ބާރުވެރިކަން ދެމެހެއްޓުމަށް ވަނީ ބޮޑެތި ގޮންޖެހުންތަކަކާ ކުރިމަތިވެފައެވެ.
ކޮންގްރެސްއަށް ހުށަހެޅި މި ރިޕޯޓުގައިވާ ގޮތުން، އީރާނުގެ ނިއުކްލިއަރ އަދި ބެލިސްޓިކް މިސައިލް ނިޒާމުތައް ފުނޑުފުނޑުކޮށްލުމަށް، އެމެރިކާގެ ސެންޓްރަލް ކޮމާންޑުން ވަނީ 36،000 އަށްވުރެ ގިނަ ވައިގެ ހަމަލާތައް ދީފައެވެ. މިކަމަށް 33.4 ބިލިއަން ޑޮލަރު ވަނީ ޚަރަދުވެފައެވެ.
މި ހަނގުރާމައިގައި އެމެރިކާއިން ވަނީ އެ ޤައުމުގެ އަތުގައި ހުރި ’ތާޑް‘ އަދި ’ޕެޓްރިއޮޓް‘ އިންޓަރސެޕްޓަރ މިސައިލްތަކުގެ ދެބައިކުޅަ އެއްބަޔަށްވުރެ ގިނައިން ބޭނުންކޮށްފައެވެ. މި ހަތިޔާރުތައް އަލުން އުފައްދައި ގުދަންތައް ފުރާލުމަށް 3 ނުވަތަ 5 އަހަރު ނަގާނެކަމަށް މާހިރުން ލަފާކުރެއެވެ.
މެދުއިރުމަތީގައި ގިނަ ޢަދަދެއްގެ ހަތިޔާރު ބޭނުންކުރަން ޖެހުމުން، ޔޫރަޕާއި އޭޝިއާގައި ތިބި އެމެރިކާގެ ވައިގެ ދިފާޢީ ފައުޖުތަކުގެ ހަތިޔާރުތައް ވަނީ މެދުއިރުމައްޗަށް ބަދަލުކޮށްފައެވެ. މީގެ ސަބަބުން ޗައިނާ ފަދަ ޤައުމުތަކާ ދެކޮޅަށް، ޚާއްޞަކޮށް ޕެސިފިކް ކަނޑުގެ ސަރަޙައްދުގައި އެމެރިކާގެ އަސްކަރީ ތައްޔާރީ ޙާލަތު ވަނީ ވަރަށް ބޮޑަށް ދަށްވެފައެވެ.
