ގައުމީ ބޭންކް، ބޭންކް އޮފް މޯލްޑިވްސް (ބީއެމްއެލް) ގެ ކާޑުތައް މެދުވެރިކޮށް މި އަހަރު ކުރާ ޑޮލަރުގެ މުއާމަލާތްތައް، ނިމިދިޔަ އަހަރަށްވުރެ ގާތްގަނޑަކަށް 30 މިލިއަން ޑޮލަރު އިތުރުވާނެ ކަމަށް އެ ބޭންކުން ލަފާކޮށްފިއެވެ. މިއީ ރާއްޖޭގައި ޑޮލަރުގެ ތާށިކަން ބޮޑުވެފައިވާ ދަނޑިވަޅެއްގައި، އާންމުންގެ ފަރާތުން ބޭރު ފައިސާއަށް އޮތް ޑިމާންޑް އިންތިހާއަށް ބޮޑުވެފައިވާކަން ހާމަކޮށްދޭ ކަމެކެވެ.
ދައުލަތުގެ މީޑިއާ، ޕީއެސްއެމްގެ ޕްރޮގްރާމެއްގައި ވާހަކަދައްކަވަމުން ބީއެމްއެލްގެ ހެޑް އޮފް ބްރޭންޑް އެންޑް މާކެޓް ސްޓްރެޓެޖީ މުޙައްމަދު ސައީދު ވިދާޅުވި ގޮތުގައި، މިދިޔަ އަހަރަކީ ބޭންކުގެ ތާރީޚުގައި ވެސް އެންމެ ގިނައިން ކާޑުތަކަށް ޑޮލަރު ދޫކުރި އަހަރެވެ. އެގޮތުން މިދިޔަ އަހަރުގެ ނިޔަލަށް 390 މިލިއަން ޑޮލަރުގެ މުއާމަލާތް ކާޑުތަކުން ކޮށްފައިވާއިރު، މި އަހަރުގެ އޮގަސްޓު މަހުގެ ނިޔަލަށް އެކަނިވެސް 304 މިލިއަން ޑޮލަރު ވަނީ ކާޑުތަކަށް ވިއްކާފައެވެ.
ސައީދު ފާހަގަކުރެއްވި ގޮތުގައި މިހާރު ކާޑުތަކުން ކުރެވޭ މުއާމަލާތްތަކުގެ ނިސްބަތަށް ބަލާއިރު، އަހަރު ނިމޭއިރު މިދިޔަ އަހަރަށްވުރެ 30 މިލިއަނެއްހާ ޑޮލަރު އިތުރަށް ވިއްކޭނެކަމަށް އަންދާޒާކުރެވެއެވެ. މީގެ މައިގަނޑު ސަބަބަކީ ރާއްޖެއިން ބޭރުގެ އެކި ޚިދުމަތްތަކާއި މުދާ ހޯދުމަށް ކާޑު ބޭނުންކުރާ ކަސްޓަމަރުންގެ އަދަދު ދުވަހުން ދުވަހަށް އިތުރުވަމުން ދިޔުމެވެ.
ބޭންކުގެ ތަފާސްހިސާބުތައް ދައްކާގޮތުން، މަހެއްގެ މައްޗަށް 270،000 ކަސްޓަމަރުން އޮންލައިންކޮށް ފައިސާގެ މުއާމަލާތްތައް ކުރެއެވެ. ޚާއްސަކޮށް ޓީމޫ، އަލީބާބާ، އެޕަލް އަދި އެމެޒޯން ފަދަ ބައިނަލްއަގުވާމީ އީ-ކޮމާސް ޕްލެޓްފޯމްތަކުގައި ސިކުންތަކު 70 އަށްވުރެ ގިނަ މުއާމަލާތް ހިނގަމުންދާކަން އޭނާ ފާހަގަކުރެއްވިއެވެ. ކޮންމެ ދުވަހެއްގެ ހެނދުނު 7:00 ގައި ބީއެމްއެލްގެ އީ-ކޮމާސް ލިމިޓް އާވާއިރު، މި ލިމިޓުގެ ބޭނުން ގިނަ ބަޔަކު ހިފަމުންދެއެވެ.
ބީއެމްއެލްއިން ހާމަކޮށްފައިވާ ގޮތުގައި ކާޑުތަކުގެ މުއާމަލާތްތަކަށް އެވްރެޖްކޮށް މަހެއްގެ މައްޗަށް 38 މިލިއަން ޑޮލަރު ހޭދަވާއިރު، ހުރިހާ ދާއިރާއެއް އެއްކޮށް ބަލާނަމަ ކަސްޓަމަރުންނަށް މަހަކު 81 މިލިއަން ޑޮލަރު ބޭންކުން ހަމަޖައްސައިދެއެވެ. މީގެ ތެރޭގައި ސިއްހީ އަދި ތައުލީމީ ބޭނުންތަކަށް ވަކި ފަންޑެއް ހަމަޖައްސާފައިވުމަކީ، ޒަރޫރީ ބޭނުންތަކަށް ބުރޫނާރާނެހެން ފައިސާ ދެއްކޭނެ އިންތިޒާމު ފަހިކޮށްދިނުމަށް އެޅިފައިވާ މުހިންމު ފިޔަވަޅެކެވެ.
ކާޑުތަކުން ކުރެވޭ މުއާމަލާތްތައް މިހާ ބޮޑަށް އިތުރުވެފައިވާއިރު، ރާއްޖެއަށް މިހާރު ކުރިމަތިވެފައިވާ ބޭރު ފައިސާގެ ތާށިކަމާ ގުޅިގެން ކަސްޓަމަރުންނަށް ޑޮލަރު ދޫކުރުމުގައި ބޭންކަށް ވަނީ ބޮޑެތި ގޮންޖެހުންތަކަކާ ކުރިމަތިލާން ޖެހިފައެވެ. ދާދި ފަހުން ވެސް ރުފިޔާ އެކައުންޓުތަކަށް ދޫކޮށްފައިވާ ކާޑުތަކުން ބޭރު ފައިސާގެ މުއާމަލާތް ނުކުރެވޭ ގޮތަށް ބީއެމްއެލްއިން ގެނައި ކުއްލި ބަދަލާ ގުޅިގެން އާންމުންގެ ބޮޑެތި ފާޑުކިޔުންތަކެއް އަމާޒުވުމުން، އެ ނިންމުން ވަނީ އަނބުރާ ގެންގޮސްފައެވެ. ކަސްޓަމަރުންގެ ކާޑު ލިމިޓްތައް މެނޭޖްކުރުމަށާއި، ބޭންކަށް ލިބޭ ޑޮލަރުގެ ނިސްބަތުން ހަމަހަމަކޮށް އެ ފައިސާ ފޯރުކޮށްދިނުމަށް ބީއެމްއެލްއިން އަންނަނީ އެކި ފިޔަވަޅުތައް އަޅަމުންނެވެ. އަދި އާންމު ދިރިއުޅުމުގެ ޚަރަދުތަކާއި ވިޔަފާރިތަކަށް ބޭނުންވާ ޑޮލަރު ހޯދުމުގައި ގިނަ ބަޔަކު ބޮޑަށް ބަރޯސާވަނީ ބީއެމްއެލްގެ ކާޑުތަކަށް ކަމަށްވުމުން، މިއީ މުޅި އިގްތިސާދާ ވެސް ގުޅިފައިވާ ނުހަނު މުހިންމު މައްސަލައެކެވެ.
