ސްރީލަންކާގެ ޖޫނިއާ ޗެމްޕިއަން ބަލިކުރުމަށްފަހު، ރާއްޖޭގެ ޒުވާން ރާޅާއެޅުންތެރިޔާ އާލިޔާ މުޙައްމަދު ލަޠީފް، ”ލަންކާ އިންޓަނޭޝަނަލް ސާފިންގ ޗެމްޕިއަންޝިޕް“ ގެ ޖޫނިއަރ ބައިން ފަހުރުވެރި އެއްވަނަ ހޯދައި ރާއްޖެއަށް ރީތި ނަން ހޯދައިދީފިއެވެ.
ދުނިޔޭގެ އެކި ގައުމުތަކުން ގިނަ އަދަދެއްގެ އެތުލީޓުން ވާދަކުރި މި މުބާރާތުގެ ފައިނަލް ހީޓުގައި، އުމުރުން އެންމެ ނުވަ އަހަރުގެ އާލިޔާ ވާދަކޮށްފައިވަނީ ލަންކާގެ މިދިޔަ އަހަރުގެ ޖޫނިއަރ ޗެމްޕިއަން ސަޔުނީ އަންޖަނާއާއެވެ. މި ކެޓަގަރީގެ ތިންވަނަ މަގާމު ހާސިލުކުރީ ސްވިޒަލެންޑުގެ ކެމީލް އެޓާއެވެ.
އާލިޔާ ހޯދި މި ފަހުރުވެރި ކާމިޔާބީއާ ގުޅިގެން މޯލްޑިވްސް ސާފިންގ އެސޯސިއޭޝަން (އެމްއެސްއޭ) އިން ވަނީ އޭނާއަށް މަރުހަބާ ކިޔައިފައެވެ. އެ އެސޯސިއޭޝަނުން ފާހަގަކުރި ގޮތުގައި، އުމުރުން ދޮށީ އެތުލީޓުންނާ ވާދަކޮށް އާލިޔާ ވަނީ އާދަޔާހިލާފު ހުނަރަކާއި ވަރުގަދަ އަޒުމެއް ދައްކުވައިދީފައެވެ. އަދި ކުރިމަގުގައި އާލިޔާ މިއަށްވުރެ ފާހަގަކޮށްލެވޭ ބޮޑެތި ކާމިޔާބީތައް ރާއްޖެއަށް ހޯދައިދޭނެ ކަމަށް އުންމީދުކުރާ ކަމަށް ވެސް އެމްއެސްއޭއިން ބަޔާންކޮށްފައިވެއެވެ.
ފާހަގަކޮށްލެވޭ ގޮތުގައި، އާލިޔާ ވަނީ މިދިޔަ އަހަރު ބޭއްވުނު ގައުމީ ޖޫނިއަރ ސާފިންގ ޗެމްޕިއަންޝިޕްގެ އަންހެން ޑިވިޒަންގެ ޗެމްޕިއަންކަން ވެސް ހޯދައިފައެވެ. މިއީ ބައިނަލްއަގުވާމީ މައިދާނެއްގައި އޭނާ ހޯދި ފުރަތަމަ ރަން ވަނައެވެ.
”ލިޓްލް ސޯލްޓް ވޯޓާ ޕްރިންސެސް“ ގެ ނަމުން މަޝްހޫރުވެފައިވާ އާލިޔާ ރާޅާއަޅަން ފެށީ އުމުރުން އެންމެ ތިން އަހަރުގައެވެ. މަޝްހޫރު ރާޅާއެޅުންތެރިއެއް ކަމަށްވާ އޭނާގެ މަންމަގެ ފިޔަވަޅުމަތިން، އާލިޔާ ވެސް ވަނީ ވަރަށް ކުޑައިރު މި ކުޅިވަރުގެ ތެރެއަށް ނިކުމެފައެވެ.
