ކަޅު ބާޒާރުގައި ފުޅާ ދާއިރާއެއްގައި ގަވާއިދާ ހިލާފަށް ޑޮލަރު މާރުކުރުމުގެ ވިޔަފާރިކުރާ ކަމަށް ލިބުނު މައުލޫމާތަކާ ގުޅިގެން 12 ބިދޭސީއެއްގެ މައްސަލަ ތަހުގީގުކުރަމުންދާ ކަމަށް ހޯމް މިނިސްޓަރު ޢަލީ އިޙްސާން މިއަދު ވިދާޅުވެއްޖެއެވެ.
ޑޮލަރުގެ މައްސަލަ ހައްލުކުރުމަށް ސަރުކާރުން އަޅަމުންދާ ފިޔަވަޅުތަކާ ގުޅޭގޮތުން މައުލޫމާތު ދެއްވުމަށް ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މިނިސްޓަރު ވިދާޅުވީ، ހުއްދަ ނެތި ބޭރު ފައިސާ މާރުކުރުމުގެ މުއާމަލާތްތައް ހިންގާ ފަރާތްތަކުގެ މައުލޫމާތު ހިއްސާކުރުމަށް ފުލުހުންގެ ޓާސްކްފޯހުން ހުޅުވާލި ހޮޓްލައިނަށް ލިބުނު މައުލޫމާތުތަކާ ގުޅިގެން މިހާތަނަށް 12 މީހެއްގެ މައްސަލަ ބަލަމުންދާ ކަމަށެވެ. އަދި އޭގެ ތެރެއިން ނުވަ މީހަކު މިހާރު ވަނީ އިމިގްރޭޝަން ޑިޓެންޝަނަށް ގެންގޮސްފައި ކަމަށްވެސް އެމަނިކުފާނު ފާހަގަކުރެއްވިއެވެ.
މިނިސްޓަރު ވިދާޅުވީ، މިފަދަ ކަންކަމުގައި ބިދޭސީން ހިފަހައްޓައި ޑިޓެންޝަނަށް ގެންދިއުމުން، އެ މީހުން ދޫކޮށްލުމަށް އެދި ދިވެހިން އަންނަ މައްސަލަ ފާހަގަކުރެވޭ ކަމަށެވެ. ބިދޭސީން ރާއްޖެ ގެނައުމަށްފަހު، އެ މީހުން ކުރާ ކަންކަން ނުބަލައި މަގުމައްޗަށް ދޫކޮށްލާފައި ބޭތިއްބުމަށްފަހު، ގާނޫނު ތަންފީޒުކުރަން ފެށުމުން އެ މީހުންގެ ޒިންމާ ނަގަން އައުމަކީ ބަލައިގަނެވޭނެ ކަމެއް ނޫން ކަމަށް ވެސް މިނިސްޓަރު ވަނީ ވިދާޅުވެފައެވެ.
”މީގެ ކުރީގެ ސަރުކާރުތަކުން ގާނޫނު ތަންފީޒުނުކޮށް އޮތުމަކީ އެ ގާނޫނުތައް މުގުރާލުމަށް ލިބޭ ލައިސަންސަކަށް ނުބަލާށޭ. ތަކުރާރުކޮށް ފެންނަމުންދޭ ބިދޭސީން ރާއްޖެއަށް ގެނެސް އޭނާ އުޅެމުންދަނީ ދިން ހުއްދަތަކާއެކު ނޫން. އެކަމުގެ އެބަޖެހޭ ގެންނަ މީހާ ޒިންމާވެސް ނަގަން،“ – މިނިސްޓަރު ވިދާޅުވިއެވެ.
މީގެއިތުރުން، ބައެއް ކަންމަތީ ފިހާރަތަކަކީ ޑޮލަރު މާރުކުރާ ތަންތަނުގެ ގޮތުގައި ބިދޭސީން ހިންގަމުންދާ ތަންތަންކަން ފާހަގަކުރެވިފައިވާ ކަމަށް ވަޒީރު ވިދާޅުވިއެވެ. އަދި ފުޅާ ދާއިރާއެއްގައި މިފަދަ ގަވާއިދާ ހިލާފު ވިޔަފާރިތައް ކުރާކަން ސާބިތުވެއްޖެނަމަ އެއްވެސް ލުޔެއް ދިނުމެއް ނެތި ފިޔަވަޅު އަޅުއްވާނެ ކަމަށާއި، ދިވެއްސެއްގެ ނިވާފަތްގަނޑުގައި މިކަން ކުރާނަމަ އެ ދިވެހި މީހާއާ މެދުވެސް ހަރުކަށި ގާނޫނީ ފިޔަވަޅު އަޅުއްވާނެ ކަމުގެ އިންޒާރު މިނިސްޓަރު ވަނީ ދެއްވައިފައެވެ.
