އިންޑިއާގެ އުތުރު ކޮލްކަތާގައި އޮންނަ، މުސްލިމުންގެ އާބާދީ ބޮޑު ޗިޓްޕޫރް ޖިޔޯތިނަގަރ ކޮލަނީން މުނިސިޕަލް ފެނުގެ ޚިދުމަތް ކަނޑާލާފައިވާތާ 46 ދުވަހަށްވުރެ ގިނަ ދުވަސްވެއްޖެއެވެ. މިކަމުގެ ސަބަބުން އެ ސަރަޙައްދުގައި ދިރިއުޅޭ 5,000 އެއްހާ މީހުންނަށް ވަނީ އިންތިހާއަށް ބޮޑެތި ދަތިތަކަކާ ކުރިމަތިލާންޖެހިފައެވެ.
ޖުލައި މަހުގެ ފަހުކޮޅު ކޮލްކަތާ މުނިސިޕަލް ކޯޕަރޭޝަން (ކޭއެމްސީ) އިން އެ ސަރަޙައްދުގައި ހިންގި ހޮޅިވަޅުލުމުގެ މަސައްކަތްތަކަކަށްފަހު، އެ ކޮލަނީގައި ހުރި އާންމު 5 އިސްކުރުން ވަނީ ފެން އައުން ހުއްޓިފައެވެ. ކޮލަނީގެ ރައްޔިތުންނާއި އިންސާނީ ޙައްޤުތަކަށް މަސައްކަތްކުރާ ފަރާތްތަކުން ތުހުމަތުކުރާ ގޮތުގައި، މިއީ ސިޔާސީ ގޮތުން ބަދަލުހިފުމަށާއި، އަދި އެތަނުން މީހުން ގަދަކަމުން ބޭރުކުރުމަށްޓަކައި ދީނީ ތަފާތުކުރުންތަކާއެކު ރާވައިގެން ހިންގަމުންދާ ލާއިންސާނީ ޢަމަލެކެވެ.
ޚިދުމަތް ކަނޑާލުމާއި ރައްޔިތުންގެ ޙާލަތު
’އޯލްޓް ނިއުސް‘ އިން ކަށަވަރުކޮށްދޭ ގޮތުގައި، ޖުލައި 26 އާއި 28 އާ ދެމެދު ކޭއެމްސީ އިން ވަނީ އެ ކޮލަނީ ފެށޭ ހިސާބާއި ނިމޭ ހިސާބު ކޮނެފައެވެ. އޭގެފަހުން ޖުލައި 28 ގެ ރޭގަނޑުން ފެށިގެން އެ ސަރަޙައްދަށް ފެން ލިބުމެއް ނެތެވެ. އެންމެ ފާހަގަކޮށްލެވޭ ކަމަކީ، ފެން ކަނޑާލާފައިވާ 150 މީޓަރުގެ ސަރަޙައްދުން ބޭރުގައި، ހިންދޫން ދިރިއުޅޭ ސަރަޙައްދުތަކުގައި ހުރި އިސްކުރުތަކުން ބަރާބަރަށް ފެން ލިބެމުންދިއުމެވެ.
އަސާސީ ޙައްޤުތަކުން މަޙުރޫމްކޮށްފައިވުމުގެ ސަބަބުން، އާމްދަނީ މަދު މި ކޮލަނީގެ ރައްޔިތުންނަށް މަޖުބޫރުވެފައިވަނީ ބޮޑު އަގުދީފައި ޓޭންކަރުތަކުން ފެން ގަތުމަށެވެ. ނުވަތަ ކައިރީގައި އޮންނަ ގަންގާ ކޯރުގެ ނުތާހިރު ފެން ބޭނުންކުރުމަށެވެ. މީގެ ސަބަބުން ގިނަ ބަޔަކަށް ހަމުގެ ބަލިތައް ޖެހެމުންދާކަމަށް ރިޕޯޓުތައް ބުނެއެވެ.
ދީނީ ތަފާތުކުރުމާއި ސިޔާސީ ބަދަލުހިފުމުގެ ތުހުމަތު
ރައްޔިތުން ތުހުމަތުކުރާ ގޮތުގައި، މި ފިޔަވަޅަކީ ފާއިތުވި އިންތިޚާބުގައި އެ ސަރަޙައްދުގެ ވެރިކަންކުރާ ބީޖޭޕީގެ އެމްއެލްއޭ ރިތޭޝް ތިވާރީއަށް ވޯޓު ނުދިނުމުގެ ސަބަބުން އޭނާ ހިފަމުންދާ ބަދަލެކެވެ. ރިޕޯޓުތައް ބުނާގޮތުން، ތިވާރީ ވަނީ އޭނާއަށް ވޯޓު ނުދޭތީ މުސްލިމުންނަށް އެއްވެސް ކަމެއް ކޮށްނުދޭނެކަމަށް ފާޅުގައި ބުނެފައެވެ.
އެ ސަރަޙައްދަކީ ބަނދަރުގެ ބިމެއް ކަމަށްވާއިރު، ހަމަ އެ ބިމުގައި ދިރިއުޅޭ މުސްލިމް ނޫން އެހެން ފަރާތްތަކަށް ކަރަންޓާއި ފެނުގެ ޚިދުމަތް އެއްވެސް މެދުކެނޑުމެއްނެތި ދަނީ ލިބެމުންނެވެ.
ޤާނޫނީ މައްސަލައާއި ގަދަކަމުން ބޭރުކުރުން
ޖިޔޯތިނަގަރ ކޮލަނީ އޮންނަނީ ސިޔާމާ ޕްރަސާދު މުކަރްޖީ ޕޯޓްގެ ބިމެއްގައެވެ. ބަނދަރުގެ ފަރާތުން ވަނީ އެތަނުގައި ދިރިއުޅޭ މީހުންނަކީ ”ޤަވާއިދާ ޚިލާފަށް“ އުޅޭ ބައެއްކަމަށް ކަނޑައަޅައި، އެތަން ހުސްކުރުމަށް ފެބްރުއަރީ މަހު އަމުރުކޮށްފައެވެ.
އޮގަސްޓް 19 ގައި ކަލްކަތާ ހައިކޯޓުން ވަނީ ސެޕްޓެންބަރު 18 އާ ހަމައަށް އެ މީހުން އެތަނުން ނުނެރުމަށް ވަގުތީ އަމުރެއް ނެރެދީފައެވެ. ނަމަވެސް ރައްޔިތުން ބުނާގޮތުގައި، ފެނާއި ކަރަންޓް ކަނޑާލައިގެން ކަމާބެހޭ ފަރާތްތަކުން މި މަސައްކަތްކުރަނީ ކޯޓުގެ ޙުކުމަކާ ނުލައި އެ މީހުންނަށް މަޖުބޫރުކޮށްގެން އެތަނުން ބޭރުކުރުމަށެވެ.
