ސްޓެލްކޯ ފުރަގަހުން މާލޭ ބޮޑުތަކުރުފާނު މަގުގައި ހުންނަ ބަސް ސްޓޮޕުގައި ހަރުކޮށްފައި ހުރި ދެ ޓީވީގެ ތެރެއިން އެއް ޓީވީ ވަގަށް ނެގި މީހަކު ހޯދުމުގެ މަސައްކަތް ދިވެހި ފުލުހުންގެ ހިދުމަތުން ފަށައި، އެ މީހާގެ ވީޑިއޯ އާންމުކޮށްފިއެވެ.
ފުލުހުން އާންމުކުރި ސީސީޓީވީ ފުޓޭޖުން ފެންނަ ގޮތުގައި، ބަސް ސްޓޮޕުގައި މީހުން ތިއްބައި، އެއްވެސް ޖެހިލުމެއްނެތި ފާރުގައި ހަރުކޮށްފައި ހުރި ޓީވީ ނައްޓާލައިގެން އެ ހިފައިގެން އެ މީހާ ހިނގައިގަންނަ މަންޒަރު ވަރަށް ސާފުކޮށް ފެނެއެވެ. މި މައްސަލައާ ގުޅިގެން ފުލުހުން ބުނީ، ވީޑިއޯއިން ފެންނަ މީހާއަކީ ހެންވޭރު ޕޮލިހުން ތަހުގީގު ކުރަމުންދާ ވައްކަމުގެ މައްސަލައަކާ ގުޅިގެން ހޯދަން ބޭނުންވެ، އެއީ ކާކުކަން މިހާތަނަށް ދެނެގަނެވިފައި ނުވާތީ ހޯދިފައިނުވާ މީހެއް ކަމަށެވެ.
އެހެންކަމުން، މި ވީޑިއޯއިން ފެންނަ މީހާއާ ބެހޭ އެއްވެސް މައުލޫމާތެއް ލިބިފައިވާ ފަރާތެއް ވާނަމަ، ހެންވޭރު ޕޮލިސް އިންވެސްޓިގޭޝަން ނަންބަރު 9400053 އަށް ގުޅައި އެ މައުލޫމާތު ހިއްސާކުރުމަށް ފުލުހުން ވަނީ އެދިފައެވެ. ފުލުހުން ވަނީ ކުށްކުރާ މީހުން ހޯދުމުގައި އާންމު ރައްޔިތުންގެ ފަރާތުން ލިބެމުންދާ އެއްބާރުލުމާއި އެހީތެރިކަން ފާހަގަކޮށް، ޝުކުރު އަދާކޮށްފައެވެ.
މާލޭ ސަރަޙައްދުގައި ވައްކަމާއި ފޭރުމުގެ މައްސަލަތައް ފަހަކަށް އައިސް އިތުރުވަމުންދާތީ، އާންމު މުދަލާއި އަމިއްލަ މުދަލުގެ ރައްކާތެރިކަމަށް ހާއްސަ ސަމާލުކަމެއް ދިނުމަށް ކަމާބެހޭ އިދާރާތަކުން އަބަދުވެސް އިލްތިމާސްކުރެއެވެ.
