މިއަހަރުގެ އޮގަސްޓު މަހުގެ ނިޔަލަށް ދައުލަތަށް މުދަލު ޒަކާތުގެ ގޮތުގައި 104.4 މިލިއަނަށް ވުރެ ގިނަ ރުފިޔާ ލިބިފައިވާ ކަމަށް މޯލްޑިވްސް އިންލޭންޑް ރެވެނިއު އޮތޯރިޓީ (މީރާ) ގެ ތަފާސްހިސާބުތަކުން ދައްކައިފިއެވެ.
މީރާއިން އާންމުކޮށްފައިވާ މިއަހަރުގެ އޮގަސްޓު މަހުގެ މާލީ ރިޕޯޓުގައިވާ ގޮތުން، މުދަލު ޒަކާތުގެ ގޮތުގައި ޖުމްލަ 104,465,702 ރުފިޔާ ވަނީ ލިބިފައެވެ. މިދިޔަ އަހަރުގެ މި މުއްދަތުގައި މުދަލު ޒަކާތުގެ ގޮތުގައި ލިބިފައިވަނީ 82,163,911 ރުފިޔާއެވެ. މިއީ މިދިޔަ އަހަރާ އަޅާބަލާއިރު 27 އިންސައްތައިގެ ކުރިއެރުމެކެވެ.
ނަމަވެސް، ނިމިދިޔަ އޮގަސްޓު މަހު އެކަނި ޒަކާތުގެ ގޮތުގައި ލިބުނު އަދަދު ވަނީ ދަށްވެފައެވެ. އެގޮތުން އޮގަސްޓު މަހު ޒަކާތުގެ ގޮތުގައި ލިބިފައިވަނީ ހަތް މިލިއަން ރުފިޔާއެވެ. މިއީ މިދިޔަ އަހަރުގެ އޮގަސްޓު މަހު ލިބުނު އަށް މިލިއަން ރުފިޔާއާ އަޅާބަލާއިރު ދަށް އަދަދެކެވެ.
މުދަލު ޒަކާތަކީ އިސްލާމްދީނުގެ ރުކުނަކަށް ވާއިރު، އެމީހެއްގެ މުދަލުގައި ނިޞާބު ހަމަވެ، އެ މުދަލެއްގެ މައްޗަށް ހިޖުރީ ގޮތުން އަހަރެއް ފުރިހަމަވުމުން ޒަކާތް ނެރުމަކީ ދީނީ ގޮތުން ވާޖިބުވާ ކަމެކެވެ. މުދަލު ޒަކާތް އަހަރުގެ ކޮންމެ ދުވަސްވަރެއްގައި ވެސް ދެއްކޭނެ އިންތިޒާމު ވަނީ ހަމަޖެހިފައެވެ. މުދަލު ޒަކާތް ނެރުން ވާޖިބުވާ ނިޞާބަކީ، ތިމާގެ މުދަލުގައި އެ މިންވަރެއް ހުރުމުން ޒަކާތް ވާޖިބުވާ އެންމެ ދަށް މިންވަރެވެ. އެގޮތުން ފާއިތުވި އޮގަސްޓު މަހުގެ 20 ވަނަ ދުވަހުން ފެށިގެން ރާއްޖޭގައި މުދަލު ޒަކާތް ވާޖިބުވާ ނިޞާބުގެ މިންވަރަކީ 19,266.10 ރުފިޔާއެވެ.
ރާއްޖޭގައި މުދަލު ޒަކާތް ރަސްމީކޮށް ބަލައިގަންނަނީ ދައުލަތުގެ ޓެކްސް އިދާރާ، މީރާއިންނެވެ. އާންމުންނަށް ލުއިފަސޭހަކޮށްދިނުމުގެ ގޮތުން މީރާގެ އޮންލައިން ޕްލެޓްފޯމް މެދުވެރިކޮށް ޒަކާތް ދެއްކުމުގެ ފުރުސަތު ވަނީ ފަހިކޮށްދީފައެވެ. އަދި ކޮންމެ މީހަކުވެސް ދައްކަންޖެހޭ ޒަކާތުގެ މިންވަރު ހިސާބުކޮށްލުމުގެ ޚިދުމަތް މީރާގެ ރަސްމީ ވެބްސައިޓުން މިހާރު ލިބެން ހުންނާނެއެވެ.
