މީގެ 12 އަހަރު ކުރިން މަރާލާފައިވާކަމަށް ޤާނޫނީ ގޮތުން ކަނޑައަޅައި، އެ މައްސަލައިގައި ފިރިމީހާ އާއި ޢާއިލާގެ 7 މީހަކު ޖަލަށްލެވުނު އަންހެނަކު، އިންޑިއާގެ ޖާރްކަންޑް ސްޓޭޓުގައި އޭނާގެ ލޯބިވެރިޔާއާއެކު ދިރިއުޅެމުންދަނިކޮށް ފުލުހުން ހޯދައިފިއެވެ.
2014 ވަނަ އަހަރު އިންޑިއާގެ ބިހާރު ސްޓޭޓްގެ ރޮހްޓާސް އަވަށުގައި ގެއްލުނު ސަރަސްވަތީ ދޭވީ (ކާންތީ ދޭވީ) ދާދިފަހުން ފެނިފައިވަނީ ޖާރްކަންޑްގެ ގަރްވާ ޑިސްޓްރިކްޓްގައެވެ. އޭނާ މަރާލާފައިވާކަމަށް ބުނެ ކުރިން އޭނާގެ ފިރިމީހާގެ ޢާއިލާގެ 8 މީހަކު ޖަލަށްލެވިފައިވުމުން، މިއީ ފުލުހުންގެ ތަޙުޤީޤީ ނިޒާމުގައި ހުރި ބޮޑެތި މައްސަލަތަކެއް ހާމަވެގެންދިޔަ ކަމެކެވެ.
2014 ވަނަ އަހަރު ސަރަސްވަތީ ދޭވީ ވަނީ ޢާއިލާއަށް އެންގުމަކާނުލައި ރައްޓެއްސަކާ (ރައްޓު ސިންގް) އެކު ފިލައިގެން ގޮސްފައެވެ. އޭނާ ގެއްލުނުތާ ކުޑަ ދުވަސްކޮޅެއް ފަހުން، ކާކުކަން ނޭނގޭ އަންހެނެއްގެ ހަށިގަނޑެއް ކޯރަކުން ފެނުނެވެ. ސަރަސްވަތީގެ ބޭބެ އާއި ރަށުގެ ޗައުކީދާރު ވަނީ އެއީ ސަރަސްވަތީގެ ހަށިގަނޑުކަމަށް ބުނެ ފުލުހުންނަށް މަޢުލޫމާތު ދީފައެވެ. މި ނުބައި މަޢުލޫމާތުގެ މައްޗަށް ބިނާކޮށް، ސަރަސްވަތީގެ ފިރިމީހާ އާއި ބަފައިބެ ހިމެނޭހެން 8 މީހެއްގެ މައްޗަށް މީހަކު މެރުމުގެ ދަޢުވާ އުފުލައި ޖަލަށްލިއެވެ. އެމީހުން ޖަލުން ސަލާމަތްވީ ސަރަސްވަތީގެ ޢާއިލާއަށް 3 ލައްކަ ރުޕީސް ދިނުމަށްފަހުގައެވެ.
2026 ވަނަ އަހަރު ސަރަސްވަތީގެ ބަފައިބެއަށް، އޭނާ ދިރިހުރިކަމާއި ޖާރްކަންޑްގައި ދިރިއުޅެމުންދާކަމުގެ މަޢުލޫމާތު ލިބުނެވެ. ވަގުތުން ރޯހްތާސްގެ ސްޕްރިންޓެންޑެންޓް އޮފް ޕޮލިސް ރާޖްއަށް މިކަން އެންގުމުން، ފުލުހުންގެ ޓީމެއް ފޮނުވައިގެން ވަނީ އޭނާ ހޯދާފައެވެ. ފުލުހުންނަށް އޮޅުވާލުމުގެ ކުށުގައި އޭނާގެ މައްޗަށް މައްސަލައެއް ރަޖިސްޓްރީކޮށް، ހޮނިހިރު ދުވަހު ސާސާރާމްގެ ކޯޓަކަށް ވަނީ ހާޒިރުކޮށްފައެވެ. މިއާއެކު 2014 ވަނަ އަހަރު ކޯރުން ފެނުނު ހަށިގަނޑަކީ ކާކުކަން ދެނެގަތުމަށް ފުލުހުން ވަނީ އާ ތަޙުޤީޤެއް ފަށާފައެވެ.
