ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއާ ސީދާ ބައްދަލުކުރުމުގެ ފުރުސަތު ރައްޔިތުންނަށް ފަހިކޮށްދިނުމަށްޓަކައި، ރައީސުލްޖުމްހޫރިއްޔާގެ އޮފީހުން ކުރިއަށްގެންދާ ”ރައްޔިތުންގެ އަޑު“ ސިލްސިލާ ބައްދަލުވުންތަކުގެ ތެރެއިން، އިތުރު ހަ ދާއިރާއެއްގެ ރައްޔިތުންނަށް ނަން ނޯޓުކުރުމުގެ ފުރުސަތު ހުޅުވާލައިފިއެވެ.
މުޅި ރާއްޖެއަށް އަމާޒުކޮށްގެން ކުރިއަށްގެންދާ މި ސިލްސިލާގެ ދަށުން މިފަހަރު ފުރުސަތު ހުޅުވާލާފައިވަނީ؛ ބާރަށު ދާއިރާ، ކާށިދޫ ދާއިރާ، މަތިވެރި ދާއިރާ، ވިލިނގިލި ދާއިރާ، ހުޅުމާލެ ދެކުނު ދާއިރާ އަދި ގަލޮޅު އުތުރު ދާއިރާއަށް ނިސްބަތްވާ ރައްޔިތުންނަށެވެ.
މި ބައްދަލުވުމުގައި ބައިވެރިވުމަށް އެދޭ ފަރާތްތަކުން، ރައީސުލްޖުމްހޫރިއްޔާގެ އޮފީހުން މިކަމަށް ހާއްސަކޮށްފައިވާ ޕޯޓަލް މެދުވެރިކޮށް ރަޖިސްޓަރީ ކުރެވޭނެއެވެ. ނަން ނޯޓުކުރުމުގެ އެންމެ ފަހު ވަގުތަކީ މި މަހުގެ 22 ވާ އަންގާރަ ދުވަހުގެ ރޭ 00:00 އެވެ. މީގެއިތުރުން މި ބައްދަލުވުންތަކުގައި ބައިވެރިވުމުގެ އުސޫލު ވެސް ރައީސުލްޖުމްހޫރިއްޔާގެ އޮފީހުގެ ވެބްސައިޓުގައި ވަނީ ޝާއިއުކޮށްފައެވެ.
އާންމުކޮށްފައިވާ އުސޫލުގައިވާ ގޮތުން، މި ބައްދަލުވުމުގައި ބައިވެރިވާ ފަރާތްތަކަށް އަމިއްލަ ކަންކަމާއި، ނިސްބަތްވާ މުއައްސަސާތަކާ ގުޅޭ ވާހަކަތަކުގެ އިތުރުން މުޅި މުޖުތަމައުގެ މަސްލަހަތު ހިމެނޭ ކަންކަމާ ގުޅޭގޮތުން ވެސް ވާހަކަދެއްކުމުގެ ފުރުސަތު ލިބިގެންދާނެއެވެ. އަދި ރައީސުލްޖުމްހޫރިއްޔާއާ ބައްދަލުކުރާނެ ތާރީޚާއި ވަގުތު، ހުށަހަޅާފައިވާ މުވާސަލާތީ ވަސީލަތްތައް މެދުވެރިކޮށް އެ ފަރާތްތަކަށް އަންގާނެއެވެ.
މި އުސޫލުގެ ދަށުން ބައްދަލުވުމަށް ހާޒިރުވާ ކޮންމެ ފަރާތަކަށް ވެސް، އެ ފަރާތުގެ އަނބިމީހާ ނުވަތަ ފިރިމީހާ، އެއް ދަރިފުޅު، އަދި މަންމަ ނުވަތަ ބައްޕަ ބައިވެރިކުރުމުގެ އިޚުތިޔާރު ލިބިގެންވެއެވެ. އަދި ކޮންމެ ފަރާތަކަށް ވެސް ވާހަކަދެއްކުމަށް 10 މިނެޓުގެ ވަގުތެއް ލިބޭއިރު، ބައްދަލުވުމުގެ ބައިވެރިން އަދަބުވެރިކަމާއެކު އަމަލުތައް ބެހެއްޓުމަށް އުސޫލުގައި ބަޔާންކޮށްފައިވެއެވެ.
”ރައްޔިތުންގެ އަޑު“ ސިލްސިލާގެ ފަސް ބައްދަލުވުމެއް މިހާތަނަށް ބާއްވާފައިވާއިރު، ވަކިވަކި ދާއިރާތަކަށް ހާއްސަކޮށްގެން މީގެ ކުރިން ކުރިއަށްގެންދިޔަ ދެ ބައްދަލުވުމުގައި ޖުމްލަ 16 ދާއިރާއެއްގެ ރައްޔިތުންނަށް ވަނީ މި ފުރުސަތު ފަހިކޮށްދީފައެވެ.
