ޒަމާނީ ޑިޖިޓަލް މާހައުލުގައި އުފެދިފައިވާ މަލްޓި-ބިލިއަން ޑޮލަރުގެ ’އެޑަލްޓް ކޮންޓެންޓް‘ (ފާޙިޝް ޖިންސީ ނަހަމަ ގުޅުންތައް ދައްކައިދޭ) ޕްލެޓްފޯމްތަކަކީ ’މިނިވަންކަމާއި އަމިއްލަބާރުވެރިކަމުގެ‘ ނަމުގައި މާކެޓްކުރެވޭ ތަންތަން ކަމުގައި ވިޔަސް، އެ މުޑުދާރު ފާޙިޝް ސިނާޢަތުގެ އެންމެ އަޑީގައިވަނީ މުޖުތަމަޢު ފަސްކޮށްލާފަދަ ނުރައްކާތެރި ނިޒާމެކެވެ. އޮންލައިން ޕްލެޓްފޯމްތަކުގައި ކުރިން އިސްކޮށް އުޅުނު، ޚާއްޞަކޮށް ’އޮންލީފޭންސް‘ ގެ މެނޭޖަރުކަމާއި ރެކްރޫޓްކުރުމުގެ މަސައްކަތް ކޮށްފައިވާ ފަރާތްތަކުން މިހާރު ހާމަކުރާ ގޮތުގައި، މިފަދަ ޕްލެޓްފޯމްތަކަކީ އިންސާނުންގެ ނަހަމަ ބޭނުން ހިފައި، މުޅި އިންސާނީ ފިތުރަތް ކިލަނބުކޮށް އޭގެ މައްޗަށް ޣަރަޤުވެގެންދާ ނިމުމެއް ނެތް ވަޅުގަނޑެކެވެ. މިފަދަ ނިޒާމުތައް މަސައްކަތްކުރާގޮތް ދިރާސާކޮށްލުމުން އެނގެނީ، މިއީ ބައިވެރިވާ ފަރާތްތަކަށް ނަފްސާނީ ބޮޑެތި ގެއްލުންތައް ލިބި، ޚާއްޞަކޮށް ފިރިހެން ކޮންސިއުމަރުންގެ ވިސްނުމާއި ފިކުރަށް ނުރައްކާތެރި އަސަރުތަކެއް ކުރަމުންދާ ސިނާޢަތެއް ކަމެވެ.

ޑިޖިޓަލް ވަޞީލަތްތައް ނަހަމަ ބޭނުންކުރުމުގެ ކޯޕަރޭޓް އޮނިގަނޑު

މިއީ މުނިފޫހިފިލުވުމުގެ އާދައިގެ ކުދި ވިޔަފާރިތަކެއް ނޫނެވެ. މިއީ އެކައުންޓް މެނޭޖްމަންޓާއި، އަލްގޮރިތަމް މާކެޓިންގ އަދި ހަރުކަށި ރެކްރޫޓްކުރުމުގެ ނިޒާމުތައް އެކުލެވިގެންވާ އަޑިނުބައި ބޮޑެތި ލާދީނީ އެޖެންސީތަކަކުން ހިންގާ ފާޙިޝް ވިޔަފާރިތަކެކެވެ.

މި ލާދީނީ އެޖެންސީތަކުން ޓިކްޓޮކާއި އިންސްޓަގްރާމް ފަދަ ސޯޝަލް މީޑިއާ ޕްލެޓްފޯމްތައް މެދުވެރިކޮށް ޒުވާން އަންހެނުންނަށް އަމާޒުކޮށްގެން ބޮޑެތި މަސައްކަތްތައް ކުރެއެވެ. އެގޮތުން އެއްފަހަރާ ގިނަ އެކައުންޓްތައް ހިންގުމަށާއި، ކޮންމެ ދުވަހަކު ގިނަ އަދަދަކަށް ’ޕްރޮވޮކޭޓިވް‘ ވީޑިއޯތައް އަޕްލޯޑުކުރުމަށް ބާރުއަޅައި، ވައިރަލް ވުމަށް މަގުފަހިކުރެއެވެ.

ޑިޖިޓަލް އާލަތްތައް ބޭނުންކޮށްގެން ހިންގާ ހަޑިމުޑުދާރު ޢަމަލުތަކާއި، ހަށިވިއްކުވާ އެސްކޯޓް ކުރުމާއި، އަދި ފިކުރާ ކުޅެލުމަށް ސައިބަރ-ސެކިއުރިޓީ މަސައްކަތްތައް ’ކްރިއޭޓަރ އިކޮނޮމީ‘ ނުވަތަ ’ޖިންސީ މިނިވަންކަން‘ ފަދަ ޒަމާނީ ރީތި ނަންނަމުގައި މި މުޑުދާރު ސިނާޢަތުން ސިފަކުރެއެވެ. ނަމަވެސް ޙަޤީޤަތުގައި މިއީ މާލީ ދަތިކަމާއި، ޒުވާންކަމުގެ ނާޒުކުކަމުގެ ފައިދާނަގައި، ނަފްސާނީ އަނިޔާ އާއި މަޖުބޫރުކަމުގެ ތެރެއަށް މީހުން ވައްޓާލާ ކަމެކެވެ. އަދި އޭގެ ސަބަބުން ފަހުން ފޮހެލަން ނުކުޅެދޭފަދަ އަމިއްލަ ނަފްސު ފާޟީޙަތްވެފައިވާ ޑިޖިޓަލް ފާޙިޝީ ބާޠިލު ރެކޯޑުތަކެއް އުފެދިގެންދެއެވެ.

މުޖުތަމަޢަށާއި ފިރިހެނުންނަށް ލިބޭ ބޮޑެތި ގެއްލުންތައް

މި ސިނާޢަތުގެ ފާޅުކަން ބޮޑުބައިން ފާޙިޝް ފޮޓޯތަކާ ވީޑިއޯ ކޮންޓެންޓުތަކުގެ އުފެއްދުންތެރިންނަށް އަސަރުކުރާއިރު، އޭގެ އަޑީގައިވާ ވިޔަފާރީގެ އޮނިގަނޑު ސީދާ އަމާޒުކޮށްފައިވަނީ މުޖުތަމަޢުގެ ނަފްސާނީ ނާޒުކުކަމަށެވެ. ޚާއްޞަކޮށް ފިރިހެނުންނަށް އޭގެ ސަބަބުން ނުރައްކާތެރި އަސަރުތަކެއް ކުރެއެވެ.

ޒަމާނީ އަލްގޮރިތަމްތަކާއި ސަބްސްކްރިޕްޝަން ޗެޓް ނިޒާމުތައް ފަރުމާކޮށްފައިވަނީ ފިރިހެނުންގެ އެކަހެރިކަމާއި، އެކަނިވެރިކަމާއި، އަދި އެކަމުގެ ތެރެއިން އުފެދޭ ޖިސްމާނީ އެދުންތަކުގެ ނަހަމަ ފައިދާ ނެގުމަށެވެ. ފައިސާދީގެން ލިބޭ ލޯތްބާއި ގާތްކަމުގެ ސިފަތަކުން މިއީ ފިރިހެނުން އިތުރަށް އެކަހެރިކުރުވާ ކަމެކެވެ.

ޕޯނޮގްރަފީ އާންމުވުމުގެ ސަބަބުން އެބަލާ މީހުންގެ އަޚްލާޤީ އަދި ނަފްސާނީ ބިންގާ ހަލާކުވެގެންދެއެވެ. އިންސާނީ ލޯތްބާއި ގުޅުންތަކާމެދު ޚިޔާލީ، ޤުދުރަތާ ޚިލާފު މިންގަނޑުތަކެއް އުފެދި، ޙަޤީޤީ ގުޅުންތައް ދެމެހެއްޓުމުގެ ޤާބިލުކަން ގެއްލިގެންދެއެވެ.

މިފަދަ ޑިޖިޓަލް ވަސީލަތްތައް ދިރިއުޅުމުގެ ޤާބިލު މަގުތަކެއްގެ ގޮތުގައި އާންމުވުމުން، އަންނަން އޮތް ޖީލުތަކަށް ދެވެނީ ނުރައްކާތެރި މެސެޖެކެވެ. އިންސާނީ ހަށިގަނޑު ވިޔަފާރި މުދަލަކަށް ހެދުން އާންމުވެ، މުޖުތަމަޢުގެ ތެރޭގައި ނަފްސާނީ އަނިޔާއާއި، އިތުބާރު ގެއްލުމާއި، އިޖުތިމާޢީ އެކަހެރިކަމާ ފަސާތައް އިތުރުވެގެންދެއެވެ.

އިސްލާމީ ނަޒަރިއްޔާތު: ފާޙިޝްކަމުގެ ނުބައިކަން

އިސްލާމްދީނަކީ އިންސާނާގެ ކަރާމާތާއި، އަޚްލާޤާއި، އަދި ނަފުސުގެ ޠާހިރުކަން އެންމެ މަތީ ދަރަޖައަށް ހިފަހައްޓައިދޭ ދީނެވެ. ﷲ ސުބުޙާނަހޫ ވަތަޢާލާ ޤުރްއާނުގައި ވަނީ ފާޙިޝް ޖިންސީ އެދުންވެރިކަމާއި، އެކަމަށް މަގުފަހިވާ އެންމެހައި ކަންކަމުން ދުރުހެލިވުމަށް އަންގަވާފައެވެ. މާތް ނަބިއްޔާ މުޙައްމަދު ﷺ ޙަދީޘްކުރައްވާފައިވާ ފަދައިން، ލަދުރަކިކަމާއި ޢިއްފަތްތެރިކަމަކީ އީމާންތެރިކަމުގެ އެންމެ މުހިންމު އެއް ބައެވެ.

ޕޯނޮގްރަފީގެ ސިނާޢަތަކީ އިންސާނާގެ ލޮލާއި، ކަންފަތާއި، ހިތް ފާޙިޝް ޢަމަލުތަކަށް ހުށަހަޅައި، އޭނާގެ ހަށިގަނޑާއި ސިކުނޑި އަޅުވެތިކޮށްލާ ބޮޑު ވަބާއެކެވެ. މިއީ ﷲ ތަޢާލާ އިންސާނާއަށް ދެއްވި ލޯތްބާއި، ބުއްދި އާއި، އަދި ޝަޙްވަތުގެ ނިޢުމަތް ނަހަމަގޮތުގައި ހިފައި، އަމިއްލަ ނަފުސާއި މުޖުތަމަޢު ފަސާދަކޮށްލާ ނުބައިކަން ބޮޑު މުޑުދާރު ޢަމަލެކެވެ.

ޕޯނޮގްރަފީ ނައްތާލުމުގައި އިސްލާމްދީނަކީ ހަމައެކަނި އޮތް ސަލާމަތް

ޒަމާނީ ސައިކޮލޮޖީއާއި ސެކިއުލަރ ދުނިޔެ ވަނީ ޕޯނޮގްރަފީއަށް ދެވިހިފުން (އެޑިކްޝަން) ހުއްޓުވުމުގައި ޤަބޫލުކުރެވޭ ހަރުދަނާ ދާއިމީ ޙައްލެއް ހޯދުމުގައި ނުކުޅެދިފައެވެ. ނަމަވެސް، އިސްލާމްދީނުގައި މިކަމަށް ވަނީ ވަރަށް ފުރިހަމަ، ފަރުދީ އަދި އިޖުތިމާޢީ ސަލާމަތީ ނިޒާމެއް ޤާއިމުކޮށްދީފައެވެ.

ޤުރުއާނުގައި (އައްނޫރު ސޫރަތުގެ 30 ވަނަ އާޔަތުގައި) މުއުމިނު ފިރިހެނުންނަށް އަންގަވާފައިވަނީ އެމީހުންގެ ބެލުންތައް ތިރިކުރުމަށެވެ. މިއީ ފާޙިޝްކަމުގެ ދޮރުތައް ފުރަތަމަ މަރުޙަލާގައި ބަންދުކޮށްދޭ އެންމެ ވަރުގަދަ އާލަތެވެ. އިސްލާމްދީނަކީ ކުށްކުރެވުނު ކަމުގައިވިޔަސް، އެކަމުން އެނބުރި އައިސް ތަޢުބާވުމުގެ ދޮރު އަބަދުވެސް ހުޅުވާލާފައިވާ ދީނެކެވެ. ﷲ ގެ މަތިވެރި ރަޙްމަތަށް އެދި، ނަފުސު ޠާހިރުކުރުމަށް ކުރެވޭ މަސައްކަތަކީ އިންސާނާއަށް ލިބޭ ނަފްސާނީ އަދި ރޫޙާނީ ބޮޑު ޝިފާއެކެވެ. އިސްލާމްދީނުގައި ޖިންސީ އެދުންތައް ފުއްދުމަށް ކަނޑައަޅާފައިވަނީ ޙަލާލު ޒަވާޖީ ޙަޔާތުގެ (ކައިވެނީގެ) ނިޒާމެވެ. މިއީ އިންސާނާގެ ޠަބީޢީ އެދުންތައް ޢަދުލުވެރިކަމާއެކު، ލޯތްބާއި ކަރާމާތާއެކު އަދާކުރުމަށް މަގުފަހިކޮށްދޭ ހަމައެކަނި ނިޒާމެވެ.

ޚުލާޞާއަކީ، ޕޯނޮގްރަފީގެ ނުބައި ސިނާޢަތުން އިންސާނިއްޔަތު ސަލާމަތްކުރެވޭނީ ހަމައެކަނި ޤާނޫނީ ފިޔަވަޅުތަކަކުން ނޫނެވެ. އިސްލާމްދީނުގެ ޢިއްފަތްތެރިކަމާއި، އަޚްލާޤީ މިންގަނޑުތަކާއި، އަދި ﷲ ގެ މަގަށް ރުޖޫޢަވުމަކީ މިފަދަ ޑިޖިޓަލް ވަބާތަކުން ފަރުދުންނާއި މުޖުތަމަޢު މުޅިން ސަލާމަތްކޮށްދޭނެ ހަމައެކަނި މަގެވެ.