މާލެއާއި ހުޅުމާލެ ގުޅުވައިދޭ ސިނަމާލެ ބްރިޖުގެ ތަނބެއްގައި އޮޔާދިޔަ ދެ ބޯޓު ޖެހި ހިނގި ހާދިސާއާ ގުޅިގެން، ބްރިޖަށް ލިބުނު ގެއްލުންތައް ދެނެގަތުމަށްޓަކައި ޚާއްޞަ އިންސްޕެކްޝަނެއް ހެދުމުގެ މަސައްކަތް ފަށާފައިވާ ކަމަށް ގެދޮރުވެރިކަމާއި ބިނާރާ ބެހޭ ވުޒާރާއިން ހާމަކުރައްވައިފިއެވެ.
މި ހާދިސާ ހިނގާފައިވަނީ ރޭގެ ވަގުތެއްގައެވެ. މަޢުލޫމާތު ލިބިފައިވާ ގޮތުގައި ބްރިޖުގައި ޖެހުނު ދެ ބޯޓަކީ މޯލްޑިވްސް ކަސްޓަމްސް ސަރވިސްގެ ބެލުމުގެ ދަށުގައި ހިފަހައްޓާފައި އޮތް ތެޔޮ އުފުލާ ޒާތުގެ ދެ ދަގަނޑު ބޯޓެވެ. މި ދެ އުޅަނދު އޮޔާދިޔައީ މޫސުން ގޯސްވެ، އަޅާފައި އޮތް ނަގިލި ކަހާލުމުގެ ސަބަބުންނެވެ. އެގޮތުން މާލޭގެ އިރުމަތީ ފަރާތުން އޮޔާދިޔަ މި ދެ ބޯޓު ގޮސް ޖެހިފައިވަނީ ސިނަމާލެ ބްރިޖުގެ ސުޕަރ ސްޓްރަކްޗަރގެ މައި ތަނބެއްގައެވެ.
ގެދޮރުވެރިކަމާއި ބިނާރާ ބެހޭ ވަޒީރު ޑރ. ޢަބްދުﷲ މުއްޠަލިބް ދަޢުލަތުގެ މީޑިއާ އަށް މަޢުލޫމާތު ދެއްވަމުން ވިދާޅުވީ، މި ހާދިސާއާ ގުޅިގެން ރެއިން ފެށިގެން އެ ސަރަޙައްދު ބަލައި، އިންސްޕެކްޝަންގެ މަސައްކަތް ކުރިއަށްދާ ކަމަށެވެ. އަދި މިކަމާ ގުޅިގެން ހަދަންޖެހޭ ޓެކްނިކަލް އެސެސްމަންޓްތައް ނިމުމުން، ލިބުނު ގެއްލުމުގެ ތަފްޞީލީ މަޢުލޫމާތު ޢާންމުކުރައްވާނެ ކަމަށް ވިދާޅުވިއެވެ.
މި އިންސްޕެކްޝަން މަސައްކަތް ކުރިއަށްގެންދަނީ ސިނަމާލެ ބްރިޖު އެޅި ޗައިނާގެ ސީސީސީސީ ސެކަންޑް ހާބާ އިންޖިނިއަރިންގ ކުންފުނީގެ ފަންނީ މާހިރުންގެ އެހީތެރިކަމާއެކުގައެވެ. ބްރިޖުގެ މަސައްކަތް ނިމުމަށްފަހުވެސް، އޭގެ ބެލެހެއްޓުމާއި މެއިންޓަނަންސްގެ މަސައްކަތްތައް ކުރިއަށް ގެންދަނީ އެ ކުންފުނީގެ އެހީތެރިކަމާއެކުގައެވެ.
މުޅި ޖުމްލަ 200 މިލިއަން ޑޮލަރު ޚަރަދުކޮށްގެން ތަރައްޤީކުރި ސިނަމާލެ ބްރިޖަކީ 1.4 ކިލޯމީޓަރުގެ ދިގު ބްރިޖެކެވެ. މޫދުގައި 7 މައި ތަނބު ޖަހައިގެން ހަދާފައިވާ މި ބްރިޖު ރަސްމީކޮށް ހުޅުވާފައިވަނީ 2018 ވަނަ އަހަރުގެ އޮގަސްޓް މަހުގެ ތެރޭގައެވެ.
