މަސްތުވާތަކެތީގެ އަމަލުތައް ހިންގަން ތަން ދޫކުރި މީހަކު ފުރަތަމަ ފަހަރަށް ޖަލަށްލައިފިމަސްތުވާތަކެތި ބޭނުން ކުރުމާއި ވިޔަފާރި ކުރުމުގެ އަމަލުތައް ހިންގުމަށް ތަނެއް ދޫކޮށްފައިވާ މައްސަލައެއްގައި، އެ ތަނުގެ ވެރިފަރާތުގެ މައްޗަށް ކުށް ސާބިތުވެ ދިހަ އަހަރަށް ޖަލަށްލުމަށް ކްރިމިނަލް ކޯޓުން ހުކުމްކޮށްފި އެވެ.
މި މައްސަލާގައި ދައުލަތުން ދައުވާކޮށްފައިވަނީ ގަލޮޅު ޕެލިކަން ގޭގައި ކުއްޔަށް ދީފައި ހުރި ތަނެއްގައި މަސްތުވާތަކެތި ފެނުނު މައްސަލައާ ގުޅިގެން އެ ގޭގެ ވެރިފަރާތް ކަމަށްވާ އިބްރާހިމް ނާޒިމްގެ މައްޗަށެވެ. އޭނާގެ މައްޗަށް އުފުލީ މަސްތުވާއެއްޗެއް ޓްރެފިކް ކުރުމަށް ނުވަތަ ޕެޑްލް ކުރުމަށް ނުވަތަ ބޭނުން ކުރުމަށް ނުވަތަ އުފެއްދުމަށް އެއިން ކަމެއް ކުރާކަން ގަބޫލުކުރެވޭ ހާލަތުގައި، އެ ތަނެއްގެ ވެރިފަރާތުން ހުއްދަ ދިނުން ނުވަތަ ހުއްދަ ކުރުމުގެ ދައުވާއެވެ.
ކްރިމިނަލް ކޯޓުން މި މައްސަލައިގެ ހުކުމް އިއްވާފައިވަނީ އިއްޔެ އެވެ. ކޯޓުން މައްސަލަ ބެލުމަށްފަހު ފާހަގަކޮށްފައިވާ ގޮތުގައި 2014 ވަނަ އަހަރުން ފެށިގެން އެ ތަނުގައި މަސްތުވާތަކެތި ބޭނުންކޮށް އެ ތަކެތީގެ ވިޔަފާރި ކުރުމުގެ މައްސަލަތައް ފެންމަތިވެފައިވެ އެވެ. އަދި އެކި ފަހަރުމަތިން އެ ތަން ފާސްކޮށް، އެކަން ހުއްޓުވުމަށް ފުލުހުން ވަނީ އެ މީހާއަށް އަންގާފަ އެވެ.
އެ ތަން އެހެން ފަރާތްތަކަށް ކުއްޔަށް ދީފައިވީ ނަމަވެސް، އެ ތަނުގައި ކުށުގެ އަމަލުތައް ހިންގާކަން ފުލުހުން ތަކުރާރުކޮށް އެންގުމުންވެސް ކުލީގެ އެއްބަސްވުން އޭނާ ބާތިލުކޮށްފައި ނުވާކަން ހެކިތަކުން އެނގޭ ކަމަށް ކޯޓުގެ ހުކުމުގައިވެ އެވެ. އެގޮތަށް އަމަލުކުރުމުގެ ސަބަބުން އެ ތަނުގައި މަސްތުވާތަކެތީގެ ވިޔަފާރި އަދ މަނާ އަމަލުތައް ހިންގުމަށް އޭނާ ފުރުސަތު ދީފައިވާ ކަމަށް ބަލަންޖެހޭ ކަމަށް ކޯޓުން ނިންމާފައިވެ އެވެ.
މި މައްސަލައިގައި ކުށް ސާބިތުވުމާ ގުޅިގެން، މަސްތުވާތަކެއްޗާބެހޭ ގާނޫނުގެ ދަށުން އިބްރާހިމް ނާޒިމް ދިހަ އަހަރަށް ޖަލަށްލުމަށް ކްރިމިނަލް ކޯޓުން ވަނީ ހުކުމްކޮށްފަ އެވެ.
މަސްތުވާތަކެތީގެ އަމަލުތައް ހިންގުމަށް ތަންތަން ދޫކުރާ ފަރާތްތަކުގެ މައްޗަށް މިފަދަ ހުކުމެއް އައިސްފައިވާ މީ ފުރަތަމަ ފަހަރެވެ.
