މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ސައްހަ ހުއްދައެއް ނެތި، ގަވާއިދާ ހިލާފަށް ބޭރު ފައިސާ މާރުކުރުމުގެ ވިޔަފާރި ހިންގާ ފަރާތްތަކާއެކު އެއްވެސް މުއާމަލާތެއް ނުކުރުމަށް އެ އޮތޯރިޓީން އިލްތިމާސްކޮށްފިއެވެ.
އެމްއެމްއޭއިން ނެރުނު ބަޔާނެއްގައި ބުނެފައިވަނީ، ރާއްޖޭގައި މަނީ ޗޭންޖިންގ ނުވަތަ ބޭރު ފައިސާ މާރުކުރުމުގެ އެންމެހައި ހިދުމަތްތައް ދޭންވާނީ އެ އޮތޯރިޓީން ދޫކޮށްފައިވާ ސައްހަ ލައިސަންސެއްގެ ދަށުން ކަމަށެވެ. ބޭރު ފައިސާއާބެހޭ ގާނޫނާއި، މަނީ އެކްސްޗޭންޖިންގ ވިޔަފާރި ހިންގުމުގެ ގަވާއިދު މިގޮތަށް ލާޒިމުކުރި ނަމަވެސް، އެ އޮތޯރިޓީގެ ހުއްދައަކާ ނުލައި ގާނޫނާ ހިލާފަށް މިފަދަ މުއާމަލާތްތައް ބައެއް ފަރާތްތަކުން ހިންގަމުންދާކަން ފާހަގަކުރެވިފައިވާ ކަމަށް އެމްއެމްއޭއިން ވަނީ ބުނެފައެވެ.
ލައިސެންސް ނެތި ބޭރު ފައިސާގެ މުއާމަލާތް ކުރުމަކީ ކަނޑައެޅިގެން ގާނޫނީ ކުށެއް ކަމުން، މިފަދަ މުއާމަލާތްތަކުގައި އެއްވެސް މިންވަރަކަށް ބައިވެރިނުވުމަށް އާންމު ރައްޔިތުންނަށާއި ވިޔަފާރިވެރިންނަށް އެމްއެމްއޭއިން ވަނީ ނަސޭހަތްތެރިވެފައެވެ.
މީގެއިތުރުން، ރާއްޖޭގައި ގާނޫނީ އިމުގެ ތެރެއިން ބޭރު ފައިސާ މާރުކުރުމުގެ ހުއްދަ ދޫކޮށްފައިވާ އެންމެހައި ފަރާތްތަކުގެ އަދާހަމަ ލިސްޓު އެ އޮތޯރިޓީގެ ރަސްމީ ވެބްސައިޓުގައި ޝާއިއުކޮށްފައިވާނެ ކަމަށްވެސް އެ ބަޔާނުގައިވެއެވެ. އެ ލިސްޓުގައިވާ ގޮތުން މިހާތަނަށް މި ވިޔަފާރި ހިންގުމުގެ ރަސްމީ ލައިސަންސް ދޫކޮށްފައިވަނީ ޖުމްލަ 59 ފަރާތަކަށެވެ.
ވީމާ، ބޭންކުތައް ފިޔަވައި އެހެނިހެން ފަރާތްތަކާއެކު ބޭރު ފައިސާގެ މުއާމަލާތްތައް ކުރުމުގެ ކުރިން، އެއީ އެމްއެމްއޭގެ ސައްހަ ލައިސަންސް އޮތް ފަރާތެއްތޯ ދުރާލާ ކަށަވަރުކުރުމަށާއި، ގައުމުގެ މާލީ ނިޒާމުގެ ރައްކާތެރިކަމަށްޓަކައި ގާނޫނާއި ގަވާއިދުތަކަށް ފުރިހަމައަށް ބޯލެނބުމަށް އެމްއެމްއޭއިން ވަނީ އިލްތިމާސްކޮށްފައެވެ.













