ބުރާސްފަތި ދުވަހު ބާއްވާ އިންޖިނިއަރިންގ އެވޯޑް ޙަފްލާގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށް އެވޯޑެއް ދޭން އުޅޭ ކަމަށް ބުނެ ”އަދަދު“ ނޫހުގައި ޝާއިޢުކޮށްފައިވާ ޚަބަރަކީ އެއްވެސް ޙަޤީޤަތެއް ނެތް ކަނޑައެޅިގެން ދޮގު ޚަބަރެއް ކަމަށް މިނިސްޓަރ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރ ޑރ. ޢަބްދުﷲ މުއްޠަލިބް ވިދާޅުވެއްޖެއެވެ.
މިނިސްޓަރު މުއްޠަލިބް މިހެން ވިދާޅުވީ، ބުރާސްފަތި ދުވަހު ބާއްވާ އިންޖިނިއަރިންގ އެވޯޑުގައި މިނިސްޓަރު ލައްވައި ރައީސް ޑރ. މުޢިއްޒަށް އެވޯޑެއް އެރުވުމަށް ހަމަޖެހިފައިވާ ކަމަށް ބުނެ ”އަދަދު“ ނޫހުން ގެނެސްދީފައިވާ ޚަބަރަކާ ގުޅިގެން ސޯޝަލް މީޑިއާގައި ކުރެއްވި ޕޯސްޓެއްގައެވެ.
އިންޖިންނިއަރިންގ އެވޯޑަކީ އުޞޫލު ގެޒެޓުކޮށް، އެޕްލައިކުރުމަށް ހުޅުވާލާ، ލިބުނު އެޕްލިކޭޝަންތައް މިނިވަން ކޮމިޓީއަކުން ބަލާ އިންޓަވިއުކޮށް އެވޯޑް ލިބޭ ފަރާތްތައް ކަނޑައަޅާފައިވާ އެވޯޑެކެވެ. ރައީސުލްޖުމްހޫރިއްޔާ ޑރ. މުޢިއްޒަށް އެވޯޑެއް ދޭ ވާހަކައަކީ ކަނޑައެޅިގެން ދޮގެކެވެ.… pic.twitter.com/almE0eQosK
— Abdulla Muththalib (@muththo) September 9, 2026
މި ޚަބަރަށް ރައްދު ދެއްވަމުން މިނިސްޓަރު މުއްޠަލިބް ވިދާޅުވީ، މި އެވޯޑަކީ އުޞޫލުތައް ގެޒެޓުކޮށް، ކުރިމަތިލުމަށް ޢާންމުކޮށް ހުޅުވާލައިގެން ކުރިއަށްގެންދިޔަ ކަމެއް ކަމަށެވެ. އަދި ލިބުނު އެޕްލިކޭޝަންތައް މިނިވަން ކޮމިޓީއަކުން ވަޒަންކޮށް، އިންޓަވިއު ކުރުމަށްފަހު އެވޯޑް ޙައްޤުވާ ފަރާތްތައް ކަނޑައަޅާފައިވަނީ ވަރަށް ދެފުށް ފެންނަ އިންޞާފުވެރި ނިޒާމެއްގެ ތެރެއިން ކަމަށްވެސް މިނިސްޓަރު ފާހަގަކުރެއްވިއެވެ. އެހެންކަމުން ރައީސުލްޖުމްހޫރިއްޔާއަށް މިފަދަ އެވޯޑެއް ދޭން އުޅޭ ކަމަށް ދެކެވޭ ވާހަކަތަކުގައި އެއްވެސް އަސާސެއް ނެތް ކަމަށް ވިދާޅުވިއެވެ.
”އަދަދު“ ނޫހުގެ މި ޚަބަރަށް ފާޑުވިދާޅުވަމުން މިނިސްޓަރު ވިދާޅުވީ، ”އެއްވެސް ޙަޤީޤަތެއް ނެތް މި ޚަބަރު ލިޔެފައި މިވަނީ ރައީސް ޑރ. މުޢިއްޒަކީ އިންޖިނިއަރިންގ ދާއިރާއިން ޤައުމަށް ނުހަނު އަގުހުރި ޚިދުމަތްތަކެއް ކުރައްވާފައިވާ ފަރާތަކަށް ވާތީ، އެވޯޑް ލިބުން ޙައްޤުކަމަށް ޢަދަދު ނޫހުން ޤަބޫލުކުރާތީ ކަމަށް އަޅުގަނޑު ދެކެމެވެ.“
ރައީސް މުޢިއްޒަކީ ޢިމާރާތްކުރުމާއި އިންޖިނިއަރިންގ ދާއިރާއިން ޕީއެޗްޑީ ޙާޞިލްކުރައްވައި، ރާއްޖޭގެ ތަރައްޤީގެ އެތައް ބޮޑެތި މަޝްރޫޢުތަކެއް ހިންގެވުމުގައި އިސް ދައުރެއް އަދާކުރައްވާފައިވާ ބޭފުޅެކެވެ. ނަމަވެސް ބުރާސްފަތި ދުވަހުގެ ޙަފްލާގައި އެމަނިކުފާނަށް އެވޯޑެއް އެރުވުމަށް އެއްވެސް އިރެއްގައި ނިންމާފައި ނުވާކަން މިނިސްޓްރީން ވަނީ ކަށަވަރުކޮށްދީފައެވެ.
