ހުޅުމާލޭ ދެވަނަ ފިޔަވަހީގައި ފަހި ދިރިއުޅުން ކޯޕަރޭޝަން (އެފްޑީސީ) އިން ތަރައްޤީކޮށްފައިވާ ”އަމާން އުދަރެސް“ އަދި ”އަމާން ދޯދި“ ޓަވަރުތަކުގައި ދިރިއުޅޭ ރައްޔިތުންގެ ސަލާމަތާއި ރައްކާތެރިކަން ކަށަވަރުކުރުމުގެ ގޮތުން، އެޕާޓްމެންޓްތަކުގެ ކުޑަދޮރުތައް ހުޅުވޭ މިންވަރު ކުޑަކުރުމުގެ މަސައްކަތް އެ ކޯޕަރޭޝަނުން ފަށައިފިއެވެ.
އެފްޑީސީން މައުލޫމާތު ދިން ގޮތުގައި، މިއީ އެ ޓަވަރުތަކުގައި ދިރިއުޅޭ ފަރާތްތަކުގެ، ހާއްސަކޮށް ކުޑަކުދިންގެ ރައްކާތެރިކަން އިތުރަށް ހަރުދަނާކުރުމަށްޓަކައި އިސްނަގައިގެން ފެށި މުހިއްމު މަސައްކަތެކެވެ. މިގޮތުން ކުޑަދޮރުތަކުގެ ސަލާމަތީ ފިޔަވަޅުތައް ވަރުގަދަކުރުމަށް ބޭނުންވާ ފަންނީ އަދި އަމަލީ އެހީތެރިކަން އެ ކޯޕަރޭޝަނުން މިހާރު ދަނީ ފޯރުކޮށްދެމުންނެވެ.
މި ބަދަލާއެކު، ކުރިން ފަސް އިންޗިއަށް ހުޅުވޭ ގޮތަށް ހުރި ކުޑަދޮރުތަކުގައި ސްޓޮޕާ ހަރުކޮށް، ދޮރު ހުޅުވޭ މިންވަރު ހަތަރު އިންޗިއަށް ކުޑަކުރެވިގެންދާނެއެވެ. ދޮރު ހުޅުވޭ މިންވަރަށް މި ބަދަލު ގެނައި ނަމަވެސް، އެޕާޓްމެންޓްތަކަށް އެކަށީގެންވާ ވަރަށް ވައި ދައުރުވުމަށް އެއްވެސް ހުރަހެއް ނޭޅޭނެ ކަމުގެ ޔަގީންކަން އެ ކުންފުނިން ދެއެވެ.
ހުޅުމާލޭގެ ހިޔާ އަދި ވިނަރެސް ފްލެޓްތަކުގެ ސަލާމަތީ ކަންކަން ހަރުދަނާކުރުމަށް އެޗްޑީސީން ވެސް ހާއްސަ ފިޔަވަޅުތަކެއް އަޅަމުންދާ މި ދަނޑިވަޅުގައި، އެފްޑީސީން ގެނައި މި ބަދަލަކީ އުސް އިމާރާތްތަކުގައި ދިރިއުޅޭ އާއިލާތަކުގެ ރައްކާތެރިކަމަށް ލިބިގެންދިޔަ އިތުރު ހިތްހަމަޖެހުމެކެވެ.
