ފޯޅަވަހި ނުވަތަ ޗާގޯސް ޖަޒީރާގެ ސިޔާދަތީ މިލްކުވެރިކަމާ ގުޅޭގޮތުން އިނގިރޭސިވިލާތާއި ދިވެހިރާއްޖެއާ ދެމެދު ރަސްމީ ސިފައެއްގައި މަޝްވަރާތައް ފެއްޓެވުމަށް، އިނގިރޭސިވިލާތުގެ ބޮޑުވަޒީރު ދަ ރައިޓް ހޮނަރަބަލް އެންޑީ ބާރންހަމްއަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދައުވަތު ދެއްވައިފިއެވެ.
ރައީސް މުޢިއްޒު މި ދައުވަތު ދެއްވާފައިވަނީ، ފޯޅަވަހީގެ ސިޔާދަތީ ބާރުތައް މޮރިޝަސްއާ ހަވާލުކުރުމަށް އިނގިރޭސި ސަރުކާރުން ނިންމަވައި، އެކަމާ ގުޅޭ މަސައްކަތްތައް ކުރިއަށް ގެންދަވާތީ އެކަމުގެ ކަންބޮޑުވުން ފާޅުކުރައްވައި އިނގިރޭސި ބޮޑުވަޒީރަށް ފޮނުއްވި ހާއްސަ ސިޓީފުޅެއްގައެވެ.
ރައީސްގެ ސިޓީފުޅުގައި ފާހަގަކުރައްވާފައިވާ ގޮތުގައި، ތާރީހީ ގޮތުންނާއި ސަގާފީ ގޮތުން ބެލިނަމަވެސް ފޯޅަވައްސަކީ ދިވެހިރާއްޖެއާ ވަރަށް ބޮޑަށް ގުޅިފައިވާ އަދި ރާއްޖޭގެ ތަނެއްކަން ސާބިތުވާން އެބައޮތެވެ. އަދި ޖިއޮގްރަފީ ގޮތުން ބަލާއިރުވެސް، މޮރިޝަސްއަށްވުރެ ބޮޑަށް ފޯޅަވަހި އޮތީ ދިވެހިރާއްޖޭގެ ސަރަހައްދާ މާ ކައިރީގައެވެ.
ކަން މިހެން އޮތުމުން ދިވެހިރާއްޖޭގެ މަސްލަހަތާއި ސަރަހައްދީ ހައްގުތައް އެކުލެވިގެންވާ މިފަދަ މުހިންމު ނިންމުމެއް ނިންމާއިރު، ރާއްޖެއަށް އެއްވެސް މަޝްވަރާއެއް ކުރުމަކާ ނުލައި، އެ ރަށްތަކުގެ ސިޔާދަތީ ބާރު މޮރިޝަސްއަށް ދޫކޮށްލަން ނިންމެވި ނިންމެވުމާމެދު ދިވެހި ސަރުކާރުން އިންތިހާއަށް ކަންބޮޑުވާކަން އެމަނިކުފާނުގެ ސިޓީފުޅުގައި ވަނީ ބަޔާންކުރައްވައިފައެވެ.
މީގެއިތުރުން، އެ ސިޓީފުޅުގައި އިނގިރޭސިވިލާތާއި ދިވެހިރާއްޖެއާ ދެމެދު އޮތް ޒަމާންވީ އެކުވެރި ގުޅުމަށް އަލިއަޅުއްވާލައްވައި، ކުރިއަށް އޮތް ތަނުގައިވެސް އެ ގުޅުން އިތުރަށް ބަދަހިކުރެއްވުމަށް ރާއްޖެއިން މަސައްކަތް ކުރާނެކަމުގެ ފުރިހަމަ ޔަގީންކަން ރައީސް ވަނީ ދެއްވައިފައެވެ. އަދި ދިވެހި ގައުމާއި ދިވެހި ރައްޔިތުންގެ ހައްގުތައް އެންމެ ފުރިހަމައަށް ރައްކާތެރިކުރެވޭނެ އުސޫލަކުން، ފޯޅަވަހީގެ މައްސަލައަށް ހައްލެއް ހޯދުމަށްޓަކައި އިނގިރޭސި ސަރުކާރަށް ފުރިހަމަ އެއްބާރުލުން ދެއްވާނެކަމަށް ވެސް އެމަނިކުފާނު ވިދާޅުވިއެވެ.
ފޯޅަވަހީގެ މައްސަލައިގައި ދިވެހި ދައުލަތުގެ މަސްލަހަތު ގެއްލޭގޮތަށް ކުރީ ސަރުކާރުން ނިންމާފައިވާ ނިންމުންތައް މުރާޖައާކޮށް، ދިވެހިރާއްޖޭގެ ކަނޑުގެ ސަރަހައްދުން ގެއްލުނު ބައި އަނބުރާ ހޯދުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން އެންމެ ބޮޑު އިސްކަމެއް ދެއްވައިގެން ކުރިއަށްގެންދަވާ އެއް މަސައްކަތް ކަން ފާހަގަކޮށްލަންޖެހެއެވެ.
