ސަރުކާރު ހިއްސާވާ ކުންފުނިތަކުގެ މަސައްކަތްތައް ހަރުދަނާކޮށް، ޚަރަދު ކުޑަ އަދި އެފިޝަންޓް ނިޒާމެއްގެ ތެރެއިން ރައްޔިތުންނަށް ޚިދުމަތް ދިނުމަށްޓަކައި މުހިންމު ފިޔަވަޅުތަކެއް އަޅުއްވަމުން ގެންދަވާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ވިދާޅުވެއްޖެއެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ރައީސް ވިދާޅުވީ، ސަރުކާރުގެ ކުންފުނިތަކާ ގުޅޭ ބޮޑެތި މަސައްކަތްތަކެއް ސަރުކާރުގެ ކަމާގުޅޭ މުއައްސަސާތަކުން ވަރަށް ބާރު ސްޕީޑުގައި މިހާރު ކުރިއަށް ގެންދަވާ ކަމަށެވެ. އަދި މި މަސައްކަތްތަކުގެ މައިގަނޑު މަޤްޞަދަކީ ރައްޔިތުންނަށް ދެވޭ ޚިދުމަތްތައް ޚަރަދު ކުޑަ އަދި ހަލުވި ނިޒާމެއްގެ ތެރެއިން ފޯރުކޮށްދެވޭނެ ގޮތަށް ކުންފުނިތައް ބައްޓަންކުރުން ކަމަށް އެމަނިކުފާނު ފާހަގަކުރެއްވިއެވެ.
ރައީސް ޑރ. މުޢިއްޒު ވިދާޅުވި ގޮތުގައި، މި ބަދަލުތަކާއެކު ސަރުކާރުން ކުރަމުންދާ ޚަރަދުތައް ވެސް ޒިންމާދާރުކަމާއެކު ކުޑަކުރެވެމުންދާނެއެވެ. އަދި މީގެ އިތުރުން ސަރުކާރުގެ ވުޒާރާތަކާއި އެކި އިދާރާތަކުގެ ހިންގުން ހަރުދަނާކޮށް، މުވައްޒަފުންގެ އޮނިގަނޑަށް ވެސް އެކަށީގެންވާ ބަދަލުތަކެއް ގެނައުމުގެ މަސައްކަތް ކުރެވެމުންދާނެ ކަމަށް ވިދާޅުވިއެވެ.
ހަމައެއާއެކު، ސަރުކާރުގެ ފަރާތުން ފޯރުކޮށްދޭ އެކި އެހީތަކާއި ޚިދުމަތްތައް، އެ ޚިދުމަތަކަށް އެންމެ ބޭނުންޖެހިފައިވާ (ނީޑީ) ރައްޔިތުންނަށް ޓާގެޓްކޮށްގެން ސީދާ އެ ފަރާތްތަކަށް ލިބޭނެ ގޮތަށް އިންތިޒާމުތައް ބަދަލުކުރުމަކީ މި ނިޒާމު ހަރުދަނާކުރުމުގެ ތެރެއިން ޚާއްޞަ އިސްކަމެއް ދީގެން ކުރިއަށްގެންދާނެ ކަމެއް ކަމުގައި ރައީސުލްޖުމްހޫރިއްޔާ ވިދާޅުވިއެވެ.
ރައީސް ވިދާޅުވީ، މި އިޞްލާޙީ ބަދަލުތަކުގެ ސަބަބުން ދަޢުލަތުގެ ބަޖެޓުން އިސްރާފުވަމުންދާ ޚަރަދުތައް ހުއްޓުވި، ރައްޔިތުންނަށް ސަރުކާރުން ލިބިދޭ ޚިދުމަތްތަކުގެ ފެންވަރު އިތުރަށް ރަނގަޅުވެގެންދާނެ ކަމަށެވެ.
