ހޮރްމޫޒް ކަނޑުއޮޅި މިހާރު އޮތީ ’އެއްކޮށް ބަންދުކުރެވިފައި‘ ކަމަށާއި، އެ ކަނޑުއޮޅީގެ ވަށައިގެން ’ރެސްޓްރިކްޓެޑް ޒޯން‘ (ވަނުން މަނާ ސަރަޙައްދެއް) ކަނޑައަޅަން ނިންމާފައިވާކަމަށް އީރާނުގެ ސެކިއުރިޓީ ކައުންސިލުގެ އިސް އޮފިޝަލް މުޙްސިން ރިޒާއީ ޢިއުލާންކޮށްފިއެވެ.
ރިޒާއީ ބުނީ، އީރާނުގެ ހުއްދައާ ނުލައި އެ ސަރަޙައްދަށް ވަންނަ އެއްވެސް އުޅަނދެއް އީރާނުގެ ބްލެކްލިސްޓަށް ލައި، އެ ކަނޑުއޮޅިން ދަތުރުކުރުން އެއްކޮށް މަނާކުރެވޭނެ ކަމަށެވެ. އަދި ވޭތުވެދިޔަ 48 ގަޑިއިރުގެ ތެރޭގައި އީރާނުގެ އަސްކަރީ މަނަވަރަކުން އަމިއްލައަށް އުފައްދާފައިވާ އައު މިސައިލެއް އެމެރިކާގެ މަނަވަރަކަށް އަމާޒުކޮށް ފުރަތަމަ ފަހަރަށް ޓެސްޓްކޮށްފައިވާކަމަށްވެސް އޭނާ ބުންޏެވެ.
ހޮރްމޫޒް ކަނޑުއޮޅިން މިހާރު ދުވާލަކު ދަތުރުކުރަނީ އެންމެ 7 ނުވަތަ 8 ބޯޓު ކަމަށާއި، އެމެރިކާގެ އަސްކަރިއްޔާއިން ޙިމާޔަތްދީގެން ގެންދާ ބޯޓުތަކަށްވެސް ޙަމަލާތައް އަމާޒުވާކަމަށް އީރާނުން ބުނެއެވެ. އީރާނުން ވަނީ އެޤައުމުގެ ޑިސްޓްރޯޔަރު މަނަވަރަކުން އެމެރިކާގެ މަނަވަރަކަށް އައު މިސައިލެއް ފޮނުވާލައި، އަސްކަރީ ޤާބިލުކަން އިތުރުވެފައިވާކަން ހާމަކޮށްފައެވެ.
އީރާނުގެ އިޤްތިޞާދަށް ކުރާ އަސަރުތަކާ ގުޅޭގޮތުން ވާހަކަދައްކަމުން ރިޒާއީ ބުނީ، ޤައުމުގައި ކާބޯތަކެއްޗާއި މުހިންމު ތަކެތީގެ ރިޒާވް އެބައޮތް ކަމަށާއި، ތެޔޮ ވިއްކައިގެން ލިބެންޖެހޭ ފައިސާ ލިބެމުންދާ ކަމަށެވެ.
