ދިވެހިރާއްޖޭގެ ޝަރުއީ ދާއިރާގައި 20 އަހަރަށްވުރެ ދިގު މުއްދަތަކަށް ހިދުމަތް ކުރެއްވުމަށްފަހު، ދިވެހިރާއްޖޭގެ ހައިކޯޓުގެ ފަނޑިޔާރު އަލްއުސްތާޛު އިބްރާހިމް މާހިރު ޝަރަފުވެރިކަމާއެކު މަގާމުން ރިޓަޔާ ކުރައްވައިފިއެވެ.
ފަނޑިޔާރު މާހިރު މަގާމުން ރިޓަޔާވެވަޑައިގަތުމަށް އެދިވަޑައިގެން ޖުޑީޝަލް ސަރވިސް ކޮމިޝަން (ޖޭއެސްސީ) އަށް ހުށަހަޅުއްވާފައިވަނީ މިދިޔަ އޮގަސްޓް މަހުގެ ތެރޭގައެވެ.
ހައިކޯޓުން މީސް މީޑިއާގައި ހިއްސާކުރި ޕޯސްޓެއްގައި ބުނެފައިވަނީ ފަނޑިޔާރު އިބްރާހިމް މާހިރު ރިޓަޔާ ކުރެއްވިކަން ރަސްމީކޮށް އިއުލާނު ކުރައްވާފައިވާ ކަމަށެވެ. އަދި ޝަރުއީ ދާއިރާއަށާއި ހައިކޯޓަށް ފަނޑިޔާރު މާހިރު ކޮށްދެއްވާފައިވާ އަގުހުރި އިހުލާސްތެރި ހިދުމަތްތައް ފާހަގަކުރައްވައި، ހައިކޯޓުގެ ފަރާތުން ވަނީ ފަނޑިޔާރަށް ހާއްސަ ޝުކުރެއް އަދާކުރައްވައިފައެވެ.
ފަނޑިޔާރު މާހިރު ހައިކޯޓުގެ ފަނޑިޔާރު ކަމުގެ މަގާމަށް އައްޔަނު ކުރައްވާފައިވަނީ 25 ސެޕްޓެމްބަރު 2025 ވަނަ ދުވަހުގައެވެ. އޭގެ ކުރިން އޭނާ ވަނީ ދަށު ކޯޓުތަކުގައި ގިނަ އަހަރުތަކެއް ވަންދެން ފަނޑިޔާރުކަން ކުރައްވައިފައެވެ. އެގޮތުން، އެންމެ ފުރަތަމަ ފަނޑިޔާރު ކަމުގެ މަގާމަށް ވަޑައިގަތީ 9 ނޮވެމްބަރު 2005 ވަނަ ދުވަހު މަދަނީ ކޯޓުގެ ގާޒީއެއްގެ ގޮތުގައެވެ. އޭގެފަހުން 23 މޭ 2010 ގައި ފެމިލީ ކޯޓުގެ ގާޒީ ކަމަށް ބަދަލުވެވަޑައިގެންނެވި އިރު، 2022 ވަނަ އަހަރުގެ އޮކްޓޫބަރު މަހުގެ ތެރޭގައި އޭނާ ވަނީ ފެމިލީ ކޯޓުގެ އިސް ގާޒީގެ މަގާމު ފުރުއްވައިފައެވެ.
ދިވެހިރާއްޖޭގެ ހައިކޯޓަކީ 11 ފަނޑިޔާރުންގެ މައްޗަށް އެކުލެވިގެންވާ ކޯޓެކެވެ. ހައިކޯޓުގެ އިސް ފަނޑިޔާރަކަށް މިހާރު ހުންނެވީ ފަނޑިޔާރު އަބްދުﷲ ޖަމީލް މޫސާއެވެ.
މީގެ އިތުރުން އެ ކޯޓުގެ ފަނޑިޔާރުންގެ ބެންޗުގައި މިހާރު ތިއްބަވަނީ ފަނޑިޔާރު ހުސައިން މަޒީދު، ފަނޑިޔާރު ހަސަން ޝަފީއު، ފަނޑިޔާރު ފާތިމަތު ފަރްހީޒާ، ފަނޑިޔާރު ހުޒައިފާ މުހައްމަދު، ފަނޑިޔާރު ދީބަނާޒް ފަހުމީ، ފަނޑިޔާރު މުހައްމަދު ޝަނީޒް އަބްދުﷲ، ފަނޑިޔާރު އަބްދުލްމާނިއު ހުސައިން، ފަނޑިޔާރު އިސްމާއިލް ޝަފީއު އަދި ފަނޑިޔާރު އަބްދުއްރައޫފް އިބްރާހީމްއެވެ.
