ގެއްލިގެން އާއިލާގެ ފަރާތުން ރިޕޯޓްކުރުމާ ގުޅިގެން ފުލުހުން ހޯދަމުންދިޔަ މަރްޔަމް މާއީ ޖަމީލް (25އ) މިއަދު އަމިއްލައަށް ފުލުހުންގެ އިދާރާއަށް ހާޒިރުވެއްޖެއެވެ.
ފުލުހުން މައުލޫމާތު ދެއްވި ގޮތުގައި، މިވަގުތު މާލޭގައި ދިރިއުޅެމުން އަންނަ މާއީ ގެއްލިގެން ފުލުހުންނަށް ރިޕޯޓުކޮށްފައިވަނީ މި ހިނގާ މަހުގެ 1 ވަނަ ދުވަހުގެ ފަތިހުގެ ވަގުތެއްގައެވެ. އެ މައްސަލައާ ގުޅިގެން އޭނާ ހޯދުމުގެ މަސައްކަތް ފުލުހުން ކުރަމުން ދަނިކޮށް، މިއަދު އޭނާ ވަނީ އަމިއްލައަށް ހެންވޭރު ޕޮލިސް ސްޓޭޝަނަށް ގުޅުމަށްފަހު އެ ސްޓޭޝަނަށް ހާޒިރުވެފައެވެ.
ފުލުހުން ވިދާޅުވީ، ޕޮލިސް ސްޓޭޝަނަށް ހާޒިރުވި އިރު މާއީގެ ހާލު ރަނގަޅު ކަމަށެވެ.
އަދި އޭނާ ގެއްލެން މެދުވެރިވި ސަބަބާއި، މި މައްސަލައާ ގުޅިގެން އިތުރަށް ބަލަންޖެހޭ ކަންކަން ފުލުހުން ދަނީ ތަހުގީގު ކުރަމުންނެވެ.
