އަޕަރ ސައުތު ޕޮލިސް ޑިވިޒަންގައި ހިމެނޭ ރަށެއްގައި، އިތުބާރު ކުރެވޭ މަގާމެއްގައި ހުރި މީހަކު 13 އަހަރުގެ ކުޑަ އަންހެން ކުއްޖަކަށް ޖިންސީ ގޯނާކުރި މައްސަލައެއްގައި މީހަކު ހައްޔަރުކޮށްފިއެވެ.
މި މައްސަލައާ ގުޅިގެން ފުލުހުން ބުނީ، މި މައްސަލައަކީ 13 އަހަރުގެ އަންހެން ކުއްޖަކަށް ޖިންސީ ގޯނާކުރުމުގެ އިތުރުން ޖިސްމާނީ އަދި ނަފްސާނީ ގޮތުން ވެސް އެކިވަރުގެ އަނިޔާތައް ކޮށްފައިވާ ކަމަށް ތުހުމަތުކުރެވޭ މައްސަލައެއް ކަމަށެވެ. މި މައްސަލަ ފުލުހުންގެ އިދާރާއަށް ރަސްމީކޮށް ރިޕޯޓްކޮށްފައިވަނީ 2026 އޮގަސްޓް 31 ވަނަ ދުވަހުއެވެ.
މި މައްސަލައާ ގުޅިގެން ކޯޓު އަމުރެއްގެ ދަށުން ފުލުހުން ވަނީ 2026 ސެޕްޓެންބަރު 3 ވަނަ ދުވަހު އުމުރުން 41 އަހަރުގެ ދިވެހި ފިރިހެނަކު ހައްޔަރުކޮށްފައިވާ ކަމަށް ފުލުހުން ވަނީ ބުނެފައެވެ. ”އެކި އެމްވީ“ އަށް މައުލޫމާތު ލިބިފައިވާ ގޮތުގައި، ކުއްޖާއަށް ޖިންސީ ގޯނާ ކޮށްފައިވަނީ އެ ކުއްޖާގެ ބައްޕައެވެ.
ކުޑަކުދިންނަށް ކުރާ މިފަދަ އަނިޔާތަކާއި ޖިންސީ ގޯނާގެ މައްސަލަތަކަކީ ސީރިއަސް މައްސަލަތަކެއްގެ ގޮތުގައި ބަލަމުން އަންނަ ކަމެއްކަން ފާހަގަކުރަމުން، ފުލުހުން ބުނެފައިވަނީ މި މައްސަލަ އިތުރަށް ތަހުގީގު ކުރަމުން އަންނަ ކަމަށެވެ. ކުޑަކުދިންނަށް ކުރާ ޖިންސީ އަދި ޖިސްމާނީ ގޯނާގެ މައްސަލަތަކުގައި އަނިޔާ ލިބޭ ކުއްޖާގެ ކަރާމާތާއި ރައްކާތެރިކަން ދެމެހެއްޓުމުގެ ގޮތުން ކުއްޖާ އަދި އެ ކުއްޖާ ނިސްބަތްވާ ރަށުގެ މައުލޫމާތު ފުލުހުން ހާމައެއް ނުކުރެއެވެ.
ފާހަގަކޮށްލަންޖެހޭ ގޮތުގައި، އަމިއްލަ ދަރިފުޅަށް ޖިންސީ ގޯނާކޮށް އެ މަންޒަރު ވީޑިއޯ ކުރި މައްސަލައާ ގުޅިގެން މެދު ރާއްޖެތެރޭގެ ރަށަކަށް ނިސްބަތްވާ 28 އަހަރުގެ ފިރިހެނަކު ވެސް ވަނީ މި ފަހުން ހައްޔަރުކޮށްފައެވެ. އަދި މިކަމުގައި އެ ކުއްޖާގެ މަންމަގެ ބައިވެރިވުމެއް އޮތްތޯ ބެލުމުގެ މަސައްކަތް ވެސް ކަމާ ގުޅުންހުރި ފަރާތްތަކުން މިހާރު އަންނަނީ ކުރަމުންނެވެ.
