ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) ގެ ބެލުމުގެ ދަށުގައިވާ އެއްމެދު އިމާރާތްތަކުގެ ސަލާމަތާއި ރައްކާތެރިކަން އިތުރަށް ހަރުދަނާކުރުމުގެ ގޮތުން، އެ އިމާރާތްތަކުގެ ކުޑަދޮރުތަކާއި ބެލްކަނީ ރެއިލިންގ ފަދަ ތަންތަން މަރާމާތުކުރުމަށް އެހީތެރިކަން ފޯރުކޮށްދިނުމަށް އެ ކޯޕަރޭޝަނުން ނިންމައިފިއެވެ.
އެޗްޑީސީން ބުނީ، މި ނިންމުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިރުޝާދާއި ލަފާފުޅުގެ މަތިން ނިންމާފައިވާ ނިންމުމެއް ކަމަށެވެ. މި މަސައްކަތުގެ މައިގަނޑު މަޤްޞަދަކީ ފްލެޓްތަކުގައި ދިރިއުޅޭ ރައްޔިތުންގެ ސަލާމަތާއި ރައްކާތެރިކަން ކަށަވަރުކުރުމާއި، ކުޑަދޮރުތަކާއި ބެލްކަނީ ރެއިލިންގ ފަދަ ތަންތަން ހުރީ ޤަވާޢިދާ އެއްގޮތަށްތޯ ބަލައި، އެފަދަ ތަންތަން މަރާމާތުކުރުމުގައި އާންމު ރައްޔިތުންނަށް އެހީތެރިވުމެވެ. މި އެހީތެރިކަން ފޯރުކޮށްދިނުމަށް ހަމަޖެހިފައިވަނީ އެޗްޑީސީގެ ކޯޕަރޭޓް ސޯޝަލް ރެސްޕޮންސިބިލިޓީ (ސީއެސްއާރު) ގެ ދަށުންނެވެ.
އެހެންކަމުން، އެޗްޑީސީގެ ބެލުމުގެ ދަށުގައިވާ އެއްމެދު އިމާރާތްތަކުގައި ހިމެނޭ އެޕާޓްމަންޓުތަކުގެ ކުޑަދޮރުތަކާއި ބެލްކަނީ ރެއިލިންގ ފަދަ ތަންތަން މަރާމާތުކުރުމަށް އެހީތެރިކަން ބޭނުންވާ ފަރާތްތަކުން އެޗްޑީސީން އާންމުކޮށްފައިވާ ގޫގުލް ފޯމް މެދުވެރިކޮށް، 30 ސެޕްޓެމްބަރުގެ ކުރިން ހުށަހެޅުމަށް އެ ކޯޕަރޭޝަނުން ވަނީ އެދިފައެވެ.
އެޗްޑީސީގެ ބެލުމުގެ ދަށުގައިވާ އެއްމެދު އިމާރާތްތަކުގެ ރައްކާތެރިކަން ކަށަވަރުކުރުމާގުޅޭ.
އިތުރު މައުލޫމާތު: https://t.co/lv0JZwS1Kv#WithHDC#SeatoSilverShores#HDC25 pic.twitter.com/cSPbq9sN9i
— Housing Development Corporation (@hdcmaldives) September 3, 2026
މަރާމާތުގެ މި އެހީއަށް އެދި ހުށަހަޅާ ފޯމުތައް ދިރާސާކުރުމަށްފަހު، އިމާރާތްތަކުގެ ހާލަތު ބަލައި އަމަލީ މަސައްކަތްތައް ވީ އެންމެ އަވަހަކަށް ފަށާނެ ކަމުގެ ޔަގީންކަން އެޗްޑީސީން ވަނީ ދީފައެވެ. އަދި މިއީ ހުޅުމާލޭގެ އެއްމެދު އިމާރާތްތަކުގައި ދިރިއުޅޭ ރައްޔިތުންނަށް ރައްކާތެރި، އަމާން މާހައުލެއް ގާއިމުކޮށްދިނުމަށް އެޅިގެންދިޔަ މުހިންމު ފިޔަވަޅެއްގެ ގޮތުގައި އެ ކޯޕަރޭޝަނުން ފާހަގަކުރެއެވެ.
