ރާއްޖޭގެ 5 ރަށެއްގައި ތަރައްގީގެ މުހިންމު މަޝްރޫއުތަކެއް ހިންގުމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އާ މިއަދު ހަވާލުކޮށްފިއެވެ.
މިކަމަށްޓަކައި ބޭއްވި ހާއްސަ ރަސްމިއްޔާތެއްގައި ހައުސިންގ މިނިސްޓްރީގެ ފަރާތުން މި އެއްބަސްވުންތަކުގައި ސޮއިކުރެއްވީ އެ މިނިސްޓްރީގެ ސްޓޭޓް މިނިސްޓަރު އިސްމާޢީލް ޙަމީދެވެ. އަދި އެމްޓީސީސީގެ ފަރާތުން އެއްބަސްވުންތަކުގައި ސޮއިކުރައްވާފައިވަނީ އެ ކުންފުނީގެ ޑެޕިއުޓީ މެނޭޖިންގ ޑިރެކްޓަރ މުޙައްމަދު ޖަމްޝީދެވެ.
އެމްޓީސީސީއާ މިއަދު ހަވާލުކުރެވުނު މަޝްރޫއުތަކުގެ ތެރޭގައި ފ. ދަރަބޫދޫ ގޮނޑުދޮށް ހިމާޔަތް ކުރުމުގެ މަޝްރޫއު ހިމެނެއެވެ. ޖުމްލަ 360 ދުވަހުގެ ތެރޭގައި ނިންމުމަށް ކަނޑައަޅައި ހަވާލުކުރި މި މަޝްރޫއުގެ ދަށުން، ރަށުގެ ގޮނޑުދޮށް ހިމާޔަތްކުރުމަށްޓަކައި 635 މީޓަރުގެ ސަރަހައްދެއްގައި ބޮޑު ހިލައިގެ ލޯކްރެސްޓް ބްރޭކްވޯޓަރ ޖެހުމާއި، 65 މީޓަރުގެ ސަރަހައްދެއްގައި 4 ބޮޑު ހިލައިގެ ލޯކްރެސްޓް ބްރޭކްވޯޓަރ ޖެހުމުގެ އިތުރުން 6 ބޮޑު ހިލައިގެ ގްރޮއިން ޖެހުމުގެ މަސައްކަތް ކުރިއަށްދާނެއެވެ.
އެ ކުންފުނިން ކުރިއަށްގެންދާ 2 ވަނަ މަޝްރޫއަކީ ކ. ގާފަރު ބަނދަރު މަރާމާތުކުރުމުގެ މަޝްރޫއެވެ. މި މަޝްރޫއުގެ މައިގަނޑު މަސައްކަތްތަކުގެ ތެރޭގައި ބަނދަރާއި ނެރު ފުންކުރުމާއި، 420 މީޓަރުގެ ބޮޑުހިލައިގެ ބޭރުތޮށިލުމާއި، 17 މީޓަރުގެ ސަބްމާރޖްޑް ބޭރުތޮށި ލުން ހިމެނެއެވެ. އަދި މިހާރު ބޭނުންކުރަމުންދާ އެއްގަމުތޮށިން 468 މީޓަރުގެ ސަރަހައްދެއް މަރާމާތުކުރުމާއެކު، 220 މީޓަރު ދިގު، 4 މީޓަރު ފުޅާ ކޮންކްރީޓް ޖެޓީއެއް އެޅުމަށް ވަނީ ހަމަޖެހިފައެވެ.
ހަމައެހެންމެ 3 ވަނަ މަޝްރޫއެއްގެ ގޮތުން، ށ. ފުނަދޫ ބިން ހިއްކުމާއި ގޮނޑުދޮށް ހިމާޔަތްކުރުމުގެ މަޝްރޫއުގެ 2 ވަނަ ފިޔަވަހީގެ މަސައްކަތް ވެސް ވަނީ އެމްޓީސީސީއާ ހަވާލުކޮށްފައެވެ. މި މަޝްރޫއުގެ ދަށުން 26.55 ހެކްޓަރުގެ ބިން ހިއްކުމާއި، ހިއްކާ ސަރަހައްދު ހިމާޔަތްކުރުމަށްޓަކައި 3،284 މީޓަރުގެ ޖިއޯ ބޭގް ރިވެޓްމަންޓް ޖެހުމުގެ އިތުރުން 50 މީޓަރުގެ ޖިއޯ ބޭގް ގްރޮއިން ޖެހުމުގެ މަސައްކަތް ހިމެނެއެވެ.
މީގެ އިތުރުން، ގދ. މަޑަވެލި ބަނދަރު އަޕްގްރޭޑް ކުރުމުގެ މަޝްރޫއުގެ ދަށުން ބަނދަރާއި ނެރު ފުންކުރުމާއި، ދޯނި އެހެލާ ސަރަހައްދު ތަރައްގީކުރުމާއި، 253 މީޓަރުގެ ބޮޑުހިލައިގެ ބޭރުތޮށިލުމާއި، 537 މީޓަރުގެ ސޭންޑްފިލް ބްރޭކްވޯޓަރ ބޮޑުހިލައިގެ ރިވެޓްމަންޓް ޖެހުމާއި، 535 މީޓަރުގެ ބޮޑުހިލައިގެ ރިވެޓްމަންޓް ޖެހުމަށް ވަނީ ހަމަޖެހިފައެވެ. އަދި ކުރީގެ އެއްގަމުތޮށިން 367 މީޓަރު މަރާމާތުކުރުމާއި، 383 މީޓަރުގެ އާ އެއްގަމުތޮއްޓެއްލުމާއި، 11 މީޓަރު ގުނަ 11 މީޓަރުގެ ރޭމްޕެއް ހެދުމާއި، 150 މީޓަރު ދިގު، 2 މީޓަރު ފުޅާ ކޮންކްރީޓް ޖެޓީއެއް ހެދުމާއި، 20 މީޓަރު ދިގު، 3 މީޓަރު ފުޅާ ކޮންކްރީޓް ބްރިޖެއް އެޅުމުގެ މަސައްކަތް ހިމެނެއެވެ. އަދި ޕޭވްމަންޓް ހެދުމާއި، 2 ނެރު ބައްތި އަދި 24 މަގުބައްތި ހަރުކުރުމުގެ މަސައްކަތް ވެސް މި މަޝްރޫއުގެ ތެރޭގައި ހިމެނިފައިވެއެވެ.
އެއާއެކު، ކ. މާފުށީގެ ބިން ހިއްކުމާއި ގޮނޑުދޮށް ހިމާޔަތްކުރުމުގެ މަޝްރޫއުގެ ދެވަނަ ފިޔަވަހީގެ އެއްބަސްވުމުގައި ވެސް މިއަދު ވަނީ ސޮއިކޮށްފައެވެ. މި މަޝްރޫއުގެ ދަށުން 25 ހެކްޓަރުގެ ބިން ހިއްކުމާއި، ގޮނޑުދޮށް ހިމާޔަތްކުރުމަށްޓަކައި 724 މީޓަރުގެ ބޮޑުހިލަ ރިވެޓްމަންޓް ޖެހުމާއި، 162 މީޓަރުގެ ބޮޑުހިލަ ބްރޭކްވޯޓަރ ޖެހުމުގެ އިތުރުން 356 މީޓަރުގެ ބޮޑުހިލައިގެ ގްރޮއިން ޖެހުމުގެ މަސައްކަތް ކުރިއަށްގެންދިއުމަށް ވަނީ ހަމަޖެހިފައެވެ.
