ރާއްޖޭގެ އެންމެ ބޮޑު އެއް ވިޔަފާރި ކުންފުނި ކަމަށްވާ ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) އިން ރާއްޖޭގެ ދެކުނުގައި މަސައްކަތްކުރާ މުވައްޒަފުންނަށް ޚާއްޞަކޮށްގެން އަހަރަކު އެއްފަހަރު ބާއްވާ ”ދެކުނު ފޯރި“ ހަރަކާތް މިއަހަރުވެސް ވަރަށް ކުލަގަދަކޮށް އައްޑޫ ސިޓީގައި ބާއްވައިފިއެވެ.
ޖުމްލަ 6 ދުވަހުގެ މުއްދަތަށް ކުރިއަށް ގެންދިޔަ މި އިވެންޓުގައި އެސްޓީއޯގެ ލ. ފޮނަދޫ، ފުވައްމުލައް ސިޓީ، ގދ. ތިނަދޫ އަދި އައްޑޫ ސިޓީގެ އައުޓްލެޓްތަކުގައި މަސައްކަތްކުރާ ގިނަ އަދަދެއްގެ މުވައްޒަފުން ވަނީ ބައިވެރިވެފައެވެ.
މި ހަރަކާތުގެ މައިގަނޑު މަޤްޞަދަކީ ރާއްޖޭގެ އެކި ހިސާބުތަކުގައި މަސައްކަތްކުރާ މުވައްޒަފުން އެއްތަނަކުން ބައްދަލުވެ، އެކުވެރިކަން ބަދަހިކޮށް، އެއް ޓީމެއްގެ ގޮތުގައި މަސައްކަތްކުރުމުގެ ރޫޙު އާލާކުރުމާއި، ތަމްރީނާއި ޤާބިލުކަން މުވައްޒަފުންގެ ކިބައިގައި އަށަގެންނެވުމެވެ.
މި އިވެންޓުގެ ތެރެއިން މުވައްޒަފުންގެ ހުނަރު އިތުރުކުރުމަށް ތަފާތު ޓްރެއިނިންގ ޕްރޮގްރާމްތަކެއް ވަނީ ކުރިއަށް ގެންގޮސްފައެވެ. އޭގެ ތެރޭގައި:
- ފަސްޓް އެއިޑް ޓްރެއިނިންގ
- ފަޔަރ އެވެއަރނަސް ޓްރެއިނިންގ
- ފޯނުން މުއާމަލާތްކުރުމުގައި ގެންގުޅެންޖެހޭ އަދަބުތަކާއި އުސޫލުތައް
- ޓީމް ބިލްޑިންގ ހަރަކާތްތައް
- މަސައްކަތުގެ މާހައުލުގައި ޖިންސީ ފުރައްސާރައިން
- ރައްކާތެރިވުމާ ގުޅޭ ހޭލުންތެރިކަމުގެ ސެޝަންތައް ހިމެނެއެވެ.
މީގެއިތުރުން، މުވައްޒަފުންގެ މެދުގައި އެކުވެރިކަން ބަދަހިކުރުމުގެ ގޮތުން ޕޮއިންޓް ދޭ އުސޫލުން ތަފާތު ރެކްރިއޭޝަނަލް ކުޅިވަރު މުބާރާތްތައްވެސް ވަނީ ބާއްވާފައެވެ. އޭގެ ތެރޭގައި ވޮލީބޯޅަ، ޗެސް އަދި ކެރަމް މުބާރާތް ހިމެނެއެވެ. މި މުބާރާތްތަކުން އެއްވަނަ، ދެވަނަ އަދި ތިންވަނަ ހޮވައި ވަނަވަނައަށް ދިޔަ ފަރާތްތަކަށް ވަނީ އިނާމު ދީފައެވެ.
”ދެކުނު ފޯރި“ ނިންމުމުގެ ގޮތުން ޚާއްޞަ ޑިނަރ ނައިޓެއް ވަނީ ބާއްވާފައެވެ. މި ހަފުލާގައި އެސްޓީއޯގެ މެނޭޖިންގ ޑިރެކްޓަރާއި ކުންފުނީގެ އިސްވެރިންގެ އިތުރުން ގިނަ އަދަދެއްގެ މުވައްޒަފުން ބައިވެރިވެފައިވެއެވެ. މި ޑިނަރ ނައިޓުގައި ހަރަކާތްތަކުން ވަނަތައް ހޯދި މުވައްޒަފުންނާއި ޓީމުތަކަށް ވަނީ ހަނދާނީ ލިޔުމާއި އިނާމު ހަވާލުކޮށްފައެވެ.
