ސަރުކާރުގެ ޕަބްލިކް ސެކްޓަރ އިންވެސްޓްމަންޓް ޕްރޮގްރާމް (ޕީއެސްއައިޕީ) ގެ ދަށުން، ތ. ވޭމަންޑޫގެ މަގުތައް ޒަމާނީ ފެންވަރަށް ތަރައްޤީ ކުރުމަށް ކުރިއަށްގެންދާ މަޝްރޫޢުގެ ތެރެއިން އެ ރަށު ގާޒީ މަގުގައި ކޭބަލް ޖަންކްޝަން ބެހެއްޓުމުގެ މަސައްކަތް ބާރަށް ކުރިއަށްދާ ކަމަށް ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އިން ހާމަކޮށްފިއެވެ.
ވޭމަންޑޫގެ މަގުތަކުގައި ފެންބޮޑުވުމުގެ މައްސަލައަށް ދާއިމީ ހައްލެއް ހޯދައިދީ، ރައްޔިތުންނަށް ފަސޭހަކަމާއެކު ދަތުރުފަތުރު ކުރެވޭނެ އިންތިޒާމު ހަމަޖެއްސުމުގެ ބޭނުމުގައި ސަރުކާރުން މި މަޝްރޫޢު ހަވާލުކޮށްފައިވަނީ އާރްޑީސީއާއެވެ.
އާރްޑީސީން މަޢުލޫމާތު ދޭ ގޮތުގައި މިހާރު ކުރިއަށްދަނީ މަގުތައް ޒަމާނީ ފެންވަރަށް ހެދުމުގެ ކުރިން އަޅަންޖެހޭ އަސާސީ ވިއުގަތަކުގެ މަސައްކަތްތަކެވެ. އެގޮތުން، ގާޒީ މަގުގައި ކޭބަލް ޖަންކްޝަންތައް ވަޅުލުމާއި، ކޭބަލް އެޅުމަށްޓަކައި ހޮޅިވަޅުލުމުގެ މުހިންމު މަސައްކަތްތައް މިހާރު ދަނީ ތާވަލާ އެއްގޮތަށް ކުރެވެމުންނެވެ.
މި މަޝްރޫޢުގެ ދަށުން ވޭމަންޑޫގެ މައި މަގުތަކުގައި ތާރު އެޅުމާއި، މަގުތަކުގައި ފެންހިންދާ ނިޒާމު ޤާއިމުކުރުމާއި، މަގުބައްތި ޖެހުމުގެ އިތުރުން ޕޭވްމަންޓް ހެދުމުގެ މަސައްކަތްތައް ކުރިއަށްދާނެއެވެ.
މި މަޝްރޫޢު ނިމުމުން، ވޭމަންޑޫގެ މަގުތަކުގެ ފެންވަރު ރަނގަޅުވެ، ރަށުގެ އިޤްތިޞާދީ އަދި އިޖުތިމާޢީ ތަރައްޤީއަށް ބޮޑު ކުރިއެރުމެއް ލިބިގެންދާނެ ކަމަށް ބެލެވެއެވެ. ސަރުކާރުގެ އަމާޒަކީ މި މަޝްރޫޢުގެ މަސައްކަތް ވީހާވެސް އަވަހަކަށް ނިންމައި ރައްޔިތުންނަށް އޭގެ ލުއިފަސޭހަކަން ފޯރުކޮށްދިނުމެވެ.
