ކ. ތިލަފުށީގައި ތަރައްގީކުރުމަށް ހަމަޖެހިފައިވާ ބައިނަލްއަގުވާމީ ވިޔަފާރި ބަނދަރަކީ 100 އިންސައްތަ ދިވެހި ރައްޔިތުންގެ މިލްކިއްޔާތެއް ކަމަށް އިކޮނޮމިކް މިނިސްޓަރު މުޙައްމަދު ސަޢީދު ވިދާޅުވެއްޖެއެވެ.
މިނިސްޓަރު ސަޢީދު ވިދާޅުވީ، ރާއްޖޭގެ މައި ވިޔަފާރި ބަނދަރު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތަރައްގީކޮށްދެއްވާނީ ދިވެހި ރައްޔިތުންގެ ފުރިހަމަ މިލްކުވެރިކަން އޮތް، މި ގައުމުގެ އެންމެ އަގުހުރި އެއް ހަރުމުދަލުގެ ގޮތުގައި ކަމަށެވެ. އަދި އެކަމުގެ ފުރިހަމަ ޔަގީންކަން ރައްޔިތުންނަށް އަރުވާ ކަމަށްވެސް މިނިސްޓަރު ވިދާޅުވިއެވެ. މިނިސްޓަރު ވިދާޅުވީ، މިކަމުގެ ސަބަބުން ދިވެހިންނަށް އިގުތިސާދީ ގޮތުން ބޮޑެތި ކުރިއެރުންތަކެއް ވެސް ލިބިގެންދާނެ ކަމަށެވެ.
ތިލަފުށީގައި ޤާއިމްކުރާ ބައިނަލްއަޤްވާމީ ވިޔަފާރި ބަނދަރަކީ ދިވެހި ރަައްޔިތުންގެ %100 މިލްކެއް. ރާއްޖޭގެ މައި ވިޔަފާރި ބަނދަރު ރައީސް ޑރ. މުޢިއްޒު ބިނާކޮށްދެއްވާނީ ދިވެހި ރައްޔިތުންގެ ފުރިހަމަ މިލްކުވެރިކަން އޮތް، މި ޤައުމުގެ އެންމެ އަގުހުރި އެއް ހަރުމުދަލުގެ ގޮތުގައި. އެކަމުގެ…
— Mohamed Saeed (@em_saeed) August 30, 2026
މާތްﷲ ގެ ވާގިފުޅާއެކު، ރައީސް މުޢިއްޒުގެ ސަރުކާރުގެ ފުރަތަމަ ދައުރުގެ ތެރޭގައި ފަށައި، އަދި ފުރިހަމަކޮށް ނިންމާނެ އެންމެ ބިޔަ އަދި ދިވެހި ރައްޔިތުންނަށް އެންމެ މަންފާހުރި މަޝްރޫއަކަށް ތިލަފުށީގައި ތަރައްގީކުރާ ބައިނަލްއަގުވާމީ ވިޔަފާރި ބަނދަރު ވެގެންދާނެ ކަމަށް މިނިސްޓަރު ސަޢީދު ވަނީ ވިދާޅުވެފައެވެ. އަދިހަމައެހެންމެ މި މަޝްރޫއު ނިމިގެންދިއުމުން އިގުތިސާދަށް ހެޔޮ ބަދަލުތަކެއް އަންނާނެ ކަމަށް ވެސް މިނިސްޓަރު ވިދާޅުވިއެވެ.
ތިލަފުށީގައި ތަރައްގީކުރާ ވިޔަފާރި ބަނދަރާ ގުޅޭގޮތުން ދެކެވެމުންދާ ވާހަކަތަކަށް ރައްދު ދެއްވަމުން މިނިސްޓަރު ސަޢީދު ވަނީ، މިފަދަ ބޮޑު ހަގީގަތެއް ގަބޫލުކުރަން ބޭނުންނުވާ ފަރާތްތަކުން، ތިލަފުށީ ބަނދަރާ މެދު ބުހުތާނު ދޮގު ވާހަކަތައް ނުފެތުރުމަށް އިލްތިމާސްކުރައްވައިފައެވެ. މިނިސްޓަރު ސަޢީދު މި މޭރުމުން ވިދާޅުވީ، ކުރީގެ ރައީސް ޢަބްދުﷲ ޔާމީން ޕީއެންއެފްގެ ޓައުން ހޯލް ޖަލްސާއެއްގައި ދެއްކެވި ވާހަކަފުޅަކާ ގުޅިގެން އެމަނިކުފާނަށް ރައްދުދެއްވަމުންނެވެ.
ރައީސް ޔާމީން ވިދާޅުވި ގޮތުގައި، މި ސަރުކާރުން ވަނީ ބައިނަލްއަގުވާމީ ވިޔަފާރި ބަނދަރު އިންޑިއާގެ ކުންފުންޏަކަށް ދީފައެވެ. އަދި އެ ކުންފުންޏާއެކު ވެފައިވާ އެއްބަސްވުމުގެ ތަފްސީލު އެނގިވަޑައިނުގަންނަވާ ކަމަށާއި، މާލޭ ވިޔަފާރި ބަނދަރުގައި ކުރެވޭނެ ކަންތަކާއި ނުކުރެވޭނެ ކަންތައްތައް އެނގިވަޑައިގަންނަވާނީ އެ ތަފްސީލުތައް އަތްޕުޅަށް ލިބިވަޑައިގަތުމުން ކަމަށް އެމަނިކުފާނު ވިދާޅުވިއެވެ.
ތިލަފުށީގައި ޒަމާނީ ފެންވަރުގެ ބައިނަލްއަގުވާމީ ބަނދަރެއް ތަރައްގީކުރުމަކީ ރާއްޖޭގެ އިގުތިސާދު ފުޅާކޮށް، ވިޔަފާރީގެ ދާއިރާއަށް އިންގިލާބީ ބަދަލެއް ގެނައުމަށްޓަކައި ސަރުކާރުން ހާއްސަ އިސްކަމެއްދީގެން ކުރިއަށްގެންދާ މުހިންމު މަޝްރޫއެކެވެ.
