މާމައަކަށް ނުވަތަ ކާފައަކަށް ވުމަކީ އިންސާނެއްގެ ހަޔާތުގައި ލިބޭނެ ވަރަށް ހާއްސަ އަދި އެހާމެ ބާއްޖަވެރި އިހުސާސެއް ކަމަށާއި، އެއީ ކޮންމެ އާއިލާއަކަށްވެސް އަގުނުކުރެވޭނެ ފަދަ ބޮޑު ނިޢުމަތެއް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އަނބިކަނބަލުން، ފަސްޓް ލޭޑީ ސާޖިދާ މުޙައްމަދު ވިދާޅުވެއްޖެއެވެ.
މެޑަމް ސާޖިދާ މި މޭރުމުން ވިދާޅުވީ، މިއަދު ފާހަގަކުރަމުންދާ ރާއްޖޭގެ މާމަ ކާފަ ދުވަހުގެ މުނާސަބަތުގައި ފޮނުއްވި ތަހުނިޔާގެ ހާއްސަ މެސެޖުގައެވެ. އެކަމަނާގެ މެސެޖުގައި ވަނީ ދިވެހި ކޮންމެ މާމައަކާއި ކާފައަކަށް ފުރިހަމަ ސިއްހަތާއި ދުޅަހެޔޮކަމާއި އުފާފާގަތި ކަމަށް އެދިވަޑައިގެން، މި އުފާވެރި ދުވަހުގެ އިހުލާސްތެރި ހެޔޮއެދުމާއި ތަހުނިޔާ އަރިސްކުރައްވައިފައެވެ.
މާމައަކަށް ނުވަތަ ކާފައަކަށް ވުމަކީ ޙަޔާތުގެ ވަރަށް ޚާއްޞަ އަދި ބާއްޖަވެރި އިޙްސާސެއް. ކޮންމެ ޢާއިލާއަކަށް އަގުނުކުރެވޭނެ ބޮޑު ނިޢުމަތެއް. ފުރިހަމަ ޞިއްޙަތާއި އުފާފާގަތިކަން ދިވެހި ކޮންމެ މާމައަކާއި ކާފައަކަށް އެދެމުން، މި އުފާވެރި ދުވަހުގެ މަރްޙަބާއާއި ތަހުނިޔާ ދަންނަވަން. pic.twitter.com/sRFaHFvZWF
— First Lady Sajidha Mohamed (@sajidhaamohamed) September 1, 2026
ރާއްޖޭގައި މާމަ ކާފަ ދުވަސް ގައުމީ ފެންވަރުގައި ރަސްމީކޮށް ފާހަގަކުރަން ފަށާފައިވަނީ 2020 ވަނަ އަހަރުން ފެށިގެންނެވެ. ކޮންމެ އަހަރެއްގެ ވެސް ސެޕްޓެމްބަރު މަހުގެ 1 ވަނަ ދުވަސް މާމަ ކާފަ ދުވަހުގެ ގޮތުގައި ފާހަގަކުރަމުން އަންނައިރު، މިއީ މުޖުތަމައުގައި ތިބި އުމުރުން ދުވަސްވީ ފަރާތްތަކަށް އަދާކޮށްދޭންޖެހޭ ޒިންމާތަކުގެ މަތިން ހަނދާން އާކޮށްދޭ ނުހަނު މުހިންމު ދުވަހެކެވެ.
މިފަދަ ދުވަހެއް ފާހަގަކުރުމުގެ މައިގަނޑު މަގުސަދަކީ އުމުރުން ދުވަސްވީ ފަރާތްތަކުގެ ބައިވެރިވުން އާއިލާއާއި މުޖުތަމައުގައި އިތުރުކުރުމާއެކު، އެ ފަރާތްތަކުގެ އަގުވަޒަންކޮށް، އެ ފަރާތްތަކަށް އަދާކުރަންޖެހޭ ހައްގުތަކާއި ޒިންމާތައް އެންމެ ފުރިހަމަ ގޮތުގައި އަދާކުރުމަށް ބާރުއެޅުމެވެ.
