މަސްކިރުވާތާ 48 ގަޑިއިރުގެ ތެރޭގައި މަސްވެރިންނަށް ފައިސާ ދޫކުރުމަށް ސަރުކާރުން ގެންގުޅޭ ސިޔާސަތުގެ ދަށުން، މިހާތަނަށް މަސްވެރިންނަށް ޖުމްލަ 2.2 ބިލިއަން ރުފިޔާ ދޫކުރެވިފައިވާ ކަމަށް ފިޝަރީޒް މިނިސްޓަރު އަޙްމަދު ޝިޔާމް ވިދާޅުވެއްޖެއެވެ.
ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މިނިސްޓަރު ޝިޔާމް ވިދާޅުވީ، މި ސަރުކާރުން ވެރިކަމާ ހަވާލުވިއިރު، ނިމިދިޔަ އެމްޑީޕީ ސަރުކާރުން މަސްވެރިންނަށް ނުދީ އޮތް 250 މިލިއަން ރުފިޔާގެ ބޮޑު ބެކްލޮގެއް އޮތެވެ. ނަމަވެސް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެކަމަށް ދެއްވި ހާއްސަ އިސްކަމާއި ސަމާލުކަމުގެ ދަށުން، އެ ބެކްލޮގް އެއްކޮށް ހަލާސްކޮށްފައިވާ ކަމަށް މިނިސްޓަރު ވިދާޅުވިއެވެ.
އަދި އޭގެ ފަހުން، ރައީސް މުޢިއްޒުގެ ވައުދާ އެއްގޮތަށް މަސްކިރުވާތާ 48 ގަޑިއިރުގެ ތެރޭގައި މަސްވެރިންނަށް ފައިސާ ދިނުމުގެ ނިޒާމު ކާމިޔާބުކަމާއެކު ގާއިމުކުރެވިފައިވާ ކަމަށް ވެސް މިނިސްޓަރު ވިދާޅުވިއެވެ. މިނިސްޓަރު ހާމަކުރެއްވި ގޮތުގައި، 48 ގަޑިއިރު ތެރޭގައި ފައިސާ ދޫކުރަން ފެށިފަހުން، ނިމިދިޔަ އޮގަސްޓު މަހުގެ 27 ވަނަ ދުވަހުގެ ނިޔަލަށް އެކަނިވެސް މަސްވެރިންގެ އެކައުންޓުތަކަށް ޖުމްލަ 2.2 ބިލިއަން ރުފިޔާ ވަނީ ޖަމާކޮށްދެވިފައެވެ.
ކިރާ މަހަށް ގަވާއިދުން ފައިސާ ނުލިބި ދިގުލައިގެން ދިއުމަކީ މަސްވެރިންނާއި އެ ފަރާތްތަކުގެ އާއިލާތަކުން އަބަދުވެސް ކުރަމުންދިޔަ ބޮޑު ޝަކުވާއެކެވެ. މީގެ ކުރީގެ ސަރުކާރުތަކުން ގެންގުޅުނު ސިޔާސަތުތަކުގެ ސަބަބުން މަސްވެރިކަމުގެ ސިނާއަތަށް ނުކުންނަ ދިވެހި ޒުވާނުންގެ އަދަދު ދުވަހެއް ދުވަހަކަށް ދަށްވަމުން ދިޔަނަމަވެސް، މި ސަރުކާރުން މަސްވެރިންނަށް ވެފައިވާ ވައުދު ފުރިހަމައަށް ތަންފީޒުކޮށް، މަސްވެރިކަމުގެ ދާއިރާއަށް ދިމާވެފައިވާ ގޮންޖެހުންތަކަށް މިވަނީ އަމަލީ ދާއިމީ ހައްލެއް ހޯދައިދޭން ފަށައިފައެވެ.
މީގެއިތުރުން، މަސްވެރިކަމުގެ ސިނާއަތް މިހާރަށްވުރެ ބޮޑަށް ފުޅާކޮށް، އެންމެ ބޮޑު އާމްދަނީއެއް ލިބޭ ސިނާއަތަށް ހެދުމަށްޓަކައި ސަރުކާރުން ގިނަ މަސައްކަތްތަކެއްވެސް ކުރަމުން އަންނަކަން ފާހަގަކޮށްލަންޖެހެއެވެ.
