ސްރީލަންކާގެ ކޯޓަކުން މަރުގެ ހުކުމެއް އިއްވާފައިވާ ދިވެހި ރައްޔިތެއް ކަމަށްވާ ޔުގީތު އިބްރާހީމް މިނިވަންކުރުމަށް އެ ގައުމުގެ އިސްތިއުނާފު ކޯޓުން އަމުރުކޮށްފި އެވެ.
މި މައްސަލައަކީ 2018 ވަނަ އަހަރުގެ މެއި މަހުގެ 22 ވަނަ ދުވަހު ބަންޑާރަނަޔަކެ އިންޓަނޭޝަނަލް އެއާޕޯޓުން ޔުގީތު ހައްޔަރުކުރުމާ ގުޅިގެން ފެށުނު މައްސަލައެކެވެ. ފުލުހުންގެ ނާކޮޓިކްސް ބިއުރޯއަށް ލިބުނު މައުލޫމާތަކާ ގުޅިގެން ހިންގި މި އޮޕަރޭޝަނުގައި އޭނާގެ ފޮށީގެ ތެރޭގައި ހެރޮއިން ހުރިކަމަށް ތުހުމަތުކޮށް ދައުލަތުން ވަނީ ދައުވާ އުފުލާފަ އެވެ.
ނިގަމްބޯ ހައިކޯޓުގައި ކުރިއަށްދިޔަ ޝަރީއަތަށްފަހު، މަސްތުވާތަކެތި ގެންގުޅުމުގެ ކުށް ސާބިތުވާ ކަމަށް ކަނޑައަޅައި އޭނާ މެރުމަށް ހުކުމްކުރި އެވެ. ނަމަވެސް އެ މައްސަލަ އިސްތިއުނާފު ކޯޓުގައި މައްސަލަ ބެއްލެވި ފަނޑިޔާރުންގެ ބެންޗުން ވަނީ ދަށު ކޯޓުގެ ނިންމުމުގައި ގާނޫނީ އަދި އިޖުރާއީ ބޮޑެތި ގޯސްތަކެއް ހުރިކަމަށް ކަނޑައަޅާފަ އެވެ.
އިސްތިއުނާފު ޝަރީއަތުގައި ފާހަގަކކުރެވުނު ކަންކަމުގެ ތެރޭގައި ތުހުމަތުކުރެވޭ މީހާ ދެނެގަތުމަށް ބޭނުންކުރި ލިޔެކިޔުންތައް ފުރިހަމަނުވުމާއި، އަތުލައިގަތް ކަމަށް ބުނާ ތަކެތީގެ ބަރުދަނާއި އެނަލިސްޓަށް ލިބުނު ބަރުދަނާ ދެމެދު ފުށުއެރުންތަކެއް ހުރުން ހިމެނެ އެވެ. އަދި ހެކީގެ ރައްކާތެރިކަން ގެއްލިފައިވުމާއި، ތަކެތި ސީލްކޮށް ބަރުދަން ކިރާފައި ނުވުން ފަދަ އިޖުރާއީ ބޮޑެތި މައްސަލަތައް ފަނޑިޔާރުން ފާހަގަކުރެއްވި އެވެ.
މި ސަބަބުތަކާ ހުރެ ކުށުގެ ނިޔަތް ޔުގީތުގެ މައްޗަށް ސާބިތުކޮށްދިނުމަށް ދައުލަތް ނުކުޅެދިފައިވާ ކަމަށް އިސްތިއުނާފު ކޯޓުން ނިންމާފައިވެ އެވެ. އަދި 2018 ވަނަ އަހަރުން ފެށިގެން އޭނާ 8 އަހަރުގެ މުއްދަތަކަށް ބަންދުގައި ހުރުމާއި، މުހިންމު ހެކިތައް ނެތުމުން އަލުން ޝަރީއަތް ހިންގުމަކީ އިންސާފަކަށް ނުވާނެ ކަމަށް ކަނޑައަޅައި، ނިގަމްބޯ ހައިކޯޓުގެ ހުކުމް ބާތިލުކުރުމަށްފަހު އޭނާ ވަގުތުން މިނިވަންކުރުމަށް ވަނީ އަމުރުކޮށްފަ އެވެ.
