ހުސްވި އޮގަސްޓް މަހުގެ 29 ވަނަ ދުވަހުގެ ރޭ ހުޅުމާލޭ ވިނަރެސް ސަރަހައްދުގައި ހިނގި ނުރައްކާތެރި އެކްސިޑެންޓްގައި ސީރިއަސް އަނިޔާތަކެއް ލިބުނު 9 އަހަރުގެ އަންހެން ކުއްޖާ ނިޔާވެއްޖެއެވެ.
ހޮނިހިރު ދުވަހުގެ ރޭ 21:04 ހާއިރު ހިނގި މި އެކްސިޑެންޓުގައި އަނިޔާވި ކުއްޖާ ނިޔާވެފައިވާކަން، އާއިލާގެ ފަރާތުން ވެސް މިހާރު ވަނީ ކަށަވަރުކޮށްދީފައެވެ. އެގޮތުން ކުއްޖާގެ ބައްޕަ ވަނީ މީސް މީޑިއާގައި މި ހިތާމަވެރި ހަބަރު ހިއްސާކޮށްފައެވެ. ކުއްޖާ ނިޔާވެފައިވަނީ ރޭ ފަތިހުގެ ވަގުތެއްގައެވެ.
މި އެކްސިޑެންޓާ ގުޅިގެން އެ ސަރަޙައްދުގެ ސީސީޓީވީ ފުޓޭޖްތައް ބެލުމަށްފަހު ފުލުހުން ބުނެފައިވަނީ، މި އެކްސިޑެންޓް ހިނގުމަށް މެދުވެރިވީ ހިތިގަސްމަގުން ދުއްވާފައި ދިޔަ ސައިކަލެއް، ވިނަރެސް 7 ގެ ކައިރީގައި މަޑުކޮށްފައި އޮތް ކާރަކަށް އަރަން މަގާވީ ފަޅިން ހިނގާފައި ދިޔަ މީހެއްގެ ގައިގައި ޖެހިގެން ކަމަށެވެ. އަދި މި އެކްސިޑެންޓުގައި ސައިކަލު ދުއްވަން އިން 18 އަހަރުގެ ދިވެހި އަންހެން މީހާއަށް ވެސް އަނިޔާތަކެއް ލިބިފައިވާ ކަމަށް ފުލުހުން ބުނެފައިވެއެވެ.
އަދި އެކްސިޑެންޓުގައި އަނިޔާވި ކުއްޖާއަށް މިހާތަނަށް ވެސް އެކްސިޑެންޓަށްފަހު ކުއްޖާއަށް ފަރުވާ ދެމުން ދިޔައީ ވެންޓިލޭޓަރުގައެވެ.
