ލަގެޖް ހިފައިގެން ސިނަމާލެ ބްރިޖުން ހިނގާފައި އެއަރޕޯޓަށް ދާން މަސައްކަތް ކުރި ބަޔަކު ހުއްޓުވާ ނަސޭހަތް ދީފިއެވެ.
މި މައްސަލައާ ގުޅިގެން ފުލުހުން މީޑިއާތަކަށް ހިއްސާކުރި މެސެޖެއްގައި ބުނެފައިވަނީ، އިއްޔެ ހަވީރު 17:00 ހާއިރު ސިނަމާލެ ބްރިޖް މަތިން އެއަރޕޯޓާ ދިމާލައަށް ހިނގާފައި ދިޔަ ދެ ބިދޭސީއަކަށް ފުލުހުން އެޓެންޑްވެފައިވާ ކަމަށެވެ. އަދި އެ ސަރަހައްދަކީ ހިނގާފައި ދިއުން މަނާ ސަރަހައްދެއްކަން އެ މީހުންނަށް އަންގައި ނަސޭހަތްތެރިވެފައިވާނެ ކަމަށް ވެސް ފުލުހުން ވަނީ ބުނެފައެވެ.
އަދި ދަތުރު ކުރިއަށް ގެންދިއުމަށް އެހީތެރިކަން ފޯރުކޮށްދިނުމުގެ ގޮތުން އެ ދެ މީހުންނަށް ޓެކްސީއެއް ހޯދައިދީފައިވާނެ ކަމަށް ވެސް ފުލުހުން ވަނީ އިތުރަށް ބުނެފައެވެ.
ލަގެޖް ހިފައިގެން ބްރިޖުން ހިނގާފައި އެއަރޕޯޓާ ދިމާލަށް ދާން މަސައްކަތް ކުރި ދެ މީހެއްގެ ވީޑިއޯއެއް މީސް މީޑިއާގައި އާންމުވުމާ ގުޅިގެން ގިނަ ބަޔަކު ވަނީ ކަންބޮޑުވުން ވެސް ފާޅުކޮށްފައެވެ. އަދި ހެދިފައިވާ ގަވާއިދުތަކާ ހިލާފަށް އުޅޭ ބިދޭސީންނާ މެދު ހަރުކަށި ފިޔަވަޅު އެޅުމަށް ވެސް ގިނަ ބަޔަކު އަންނަނީ ގޮވާލަމުންނެވެ.
ސިނަމާލެ ބްރިޖުގައި ހިނގުމަށް ދެ ލޭން ހާއްސަކޮށްފައިވީ ނަމަވެސް، ބްރިޖު ނިމޭ ހިސާބުން ކުރިއަށް ހިނގާފައި ދިއުމަކީ މަނާ ކަމެކެވެ.
