އިންޑިއާގެ އަސާމް ސްޓޭޓްގެ ސިލްޗާރުގައި ހުންނަ ކަޗާރު ކޮލެޖުގައި މުސްލިމް އަންހެން ދަރިވަރުންތަކަކަށް ޖިސްމާނީ ގޮތުން ހަމަލާދީ، އެކުދިންގެ ހިޖާބު ބޭލުވުމަށް މަސައްކަތްކޮށްފައިވާ ކަމުގެ ސީރިއަސް ތުހުމަތުތަކެއް ހިންދޫ ދަރިވަރުންގެ ޖަމާޢަތެއް ކަމަށްވާ އޭބީވީޕީގެ މައްޗަށް ކޮށްފިއެވެ. މި ހާދިސާ ހިނގާފައިވަނީ ކޮލެޖުގެ ހުއްދައާއެކު ކޭމްޕަސް ތެރޭގައި އެން.އެސް.ޔޫ.އައި އިން ކުރިއަށްގެންދިޔަ މެމްބަރޝިޕް ހަރަކާތެއްގެ ތެރެއިންނެވެ.
އަނިޔާ ލިބުނު މުސްލިމް ދަރިވަރުން ބުނެފައިވާ ގޮތުގައި، އޭބީވީޕީގެ ގްރޫޕަކުން ވަނީ އެކުދިން ތިބި ސަރަޙައްދަށް ގޮސް، ހިޖާބަށް ފާޑުކިޔައި، ޙިޖާބުގެ އަޑީގައި އިޔަރބަޑްސް ލައްވައިގެން ތިބިކަމަށް ބުނެ ދޮގު އިލްޒާމުތަކެއް އަޅުވާފައެވެ. މައްސަލަ ހޫނުވެ، އޭބީވީޕީގެ މެމްބަރުން ވަނީ މުސްލިމް އަންހެން ކުދިންގެ ޙިޖާބަށް ދަމައި، ޖިސްމާނީ ގޮތުން ހަމަލާދީފައެވެ. އަދި އެތަނުގައި ތިބި ބައެއް ފިރިހެން ދަރިވަރުންނަށްވެސް ވަނީ އަނިޔާކޮށްފައެވެ. މީގެ ބަދަލުގައި އެކޮލެޖުންވަނީ އޭގެ ޔުނީފޯމް ކޯޑު ތަންފީޒުކުރުމުގެ ނަމުގައި ޙިޖާބު މަނާކޮށްފައެވެ.
އޭބީވީޕީން ވަނީ މި ތުހުމަތުތައް ދޮގުކޮށްފައެވެ. ކަޗާރު ކޮލެޖުގެ ޕްރިންސިޕަލް ޑރ. އަޕްރަތިމް ނާގް ވަނީ އެން.އެސް.ޔޫ.އައި ގެ ހަރަކާތް ކުރިއަށް ގެންދިޔައީ ހުއްދަ ލިބިގެންކަން ކަށަވަރުކޮށްދީފައެވެ. ނަމަވެސް، މިހަމަނުޖެހުމާ ގުޅިގެން ކޮލެޖުން މިހާރު ވަނީ ކޮލެޖުގެ ރަސްމީ ޔުނިފޯމް ކޯޑު ވަރަށް ހަރުކަށިކޮށް ތަންފީޒުކުރުމަށް ނިންމާފައެވެ. މިހަމަނުޖެހުން ހިނގާފައި މިވަނީ، ކޮލެޖު ތެރޭގައި ޙިޖާބާއި ތާކިހާ އެޅުން މަނާކުރުމަށް އެދި ދަރިވަރުންގެ ބަޔަކު ކަޗާރު ޑިސްޓްރިކްޓް ކޮމިޝަނަރަށް ޕެޓިޝަނެއް ހުށަހަޅާފައިވާ ދަނޑިވަޅެއްގައެވެ.
