އިންޖިނިއަރިންގ ދާއިރާއިން ތަހުލީލާއި ދިރާސާތައް ކުރެވޭ ފެންވަރުގެ ލެބޯޓަރީއެއް ތަރައްގީކުރުމުގެ މަސައްކަތް ކުރަމުން އަންނަ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މުޢިއްޒު މި މޭރުމުން ވިދާޅުވީ، މިއަދު ފާހަގަ ކުރާ އިންޖިނޭރުންގެ ދުވަހުގެ މުނާސަބަތުގައި ފޮނުއްވި ހާއްސަ ވީޑިއޯ މެސެޖެއްގައެވެ. އެމަނިކުފާނު ވިދާޅުވި ގޮތުގައި، އަލަށް ތަރައްގީކުރެވިގެންދާ މި ލެބޯޓަރީވެގެންދާނީ އެންމެ ޒަމާނީ ފެންވަރުގެ ހިދުމަތްތަކާއެކު ތަރައްގީކުރެވިގެންދާ ލެބޯޓަރީއަކަށް ކަމަށެވެ. އަދި މި ލެބޯޓަރީއަކީ އިންޖިނިއަރިންގގެ ހުރިހާ ދާއިރާއެއްގެ ހިދުމަތެއް އެއްތަނަކުން ލިބޭނެގޮތަށް ފަރުމާކުރެވިގެންދާނެ ލެބޯޓަރީއެއް ކަމަށް ވެސް އެމަނިކުފާނު ވަނީ ވިދާޅުވެފައެވެ.
އެގޮތުން މި ލެބޯޓަރީގައި ސިވިލް އިންޖިނިއަރިންގ، މެކޭނިކަލް އިންޖިނިއަރިންގ، އިލެކްޓްރިކަލް އިންޖިނިއަރިންގ، އިލެކްޓްރޯނިކް އިންޖިނިއަރިންގ، ސޮފްޓްވެއަރ އިންޖިނިއަރިންގ، އެއަރކްރާފްޓް އިންޖިނިއަރިންގ، އެއިރޮނޮޓިކަލް އިންޖިނިއަރިންގ، ރޮބޮޓިކްސްއާއި، އޭއައިގެ އިތުރުން، ޑިޖިޓަލް އިންޖިނިއަރިންގގެ ހުރިހާ ދާއިރާއެއް ފުރިހަމަވެފައި ހުންނާނެ ކަމަށް ރައީސް މުޢިއްޒު ވިދާޅުވިއެވެ.
”އެ ލެބޯޓަރީގައި ސިވިލް އިންޖިނިއަރުން، މެކޭނިކަލް، އިލެކްޓްރިކަލް، އިލެކްޓްރޯނިކްސް، ސޮފްޓްވެއަރ އިންޖިނިއަރިންގ، އެއަރކްރާފްޓް އަދި އެއިރޮނޮޓިކަލް އިންޖިނިއަރިންގ، ރޮބޮޓިކްސް، އޭއައި ޑިޖިޓަލް އިންޖިނިއަރިންގ ހިމެނޭހެން އެކި ކަހަލަ އިންޖިނިއަރިންގ ދާއިރާތަކުން ތަހުލީލުތައް އަދި ދިރާސާތައް ހެދޭނެ އިންތިޒާމު ހަމަޖެހިގެންދާނެ. އަދި އެތަނަކީ ރާއްޖޭގައި އެ ދާއިރާއިން ކިޔަވަމުންދާ ދަރިވަރުންނަށާއި، ރާއްޖެއިން ބޭރުން އައިސް ވެސް އެކި ފަރާތްތަކަށް ތަހުލީލުތައް ހެދޭނެ ފުރުސަތު އޮންނަ ފަދަ ލެބޯޓަރީއަކަށް ހަދާނަން.“ – ރައީސް މުޢިއްޒު ވިދާޅުވިއެވެ.
މި ލެބޯޓަރީ ތަރައްގީކުރުމަށް ބޭނުންވާ ފަންނީ މަސައްކަތްތަކާ އެހެނިހެން އިންތިޒާމުތައް، ސަރުކާރުން މިހާރު ހަމަޖައްސަމުން ގެންދާކަން ފާހަގަކުރައްވަމުން ރައީސް ވިދާޅުވީ، މި އިމާރާތް ތަރައްގީކޮށް، ދެމެހެއްޓެނިވި ގޮތެއްގައި ހިންގުމުގެ ހުރިހާ އިންތިޒާމެއް ހަމަޖައްސާފައިވަނީ، ދައުލަތުގެ ބަޖެޓުގައި ނުހިމަނާ ކަމަށެވެ. އަދި އިންޖިނިއަރިންގގެ ދާއިރާތަކުން އެކި ކަހަލަ ތަހުލީލުތައް ކުރުމަށް ބޭނުންވާ، ރާއްޖޭގެ ހުރިހާ ދަރިވަރުންނާ، ރާއްޖެއިން ބޭރުން ވެސް، މިފަދަ ތަހުލީލުތައް ކުރަން ބޭނުންވާ ފަރާތްތަކަށް، އެފަދަ ތަހުލީލުތައް ކުރެވޭނެ ފެންވަރުގެ ލެބޯޓްރީއަކަށް، ހެދުމަށް ސަރުކާރުން ގަސްދުކުރާ ކަމަށް ވެސް އެމަނިކުފާނު ވަނީ ވިދާޅުވެފައެވެ.
