ސިޙުރުގެ ނުބައި ފާސިދު ޢަމަލު މިއަދު ވަނީ މުޅި މުޖުތަމަޢަށް ޢާންމުވެފައި ކަމަށް މިއަދުގެ ހުކުރު ޚުޠުބާގައި ބުނެފިއެވެ.
ސިޙުރުގެ ނުބައިކަމުގެ މައްޗަށް އަލިއަޅުވާލައި ޚުޠުބާގައި ބުނީ މިއަދު އަހަރެމެންގެ ތެރޭގައި ފެތުރިފައިވާ ކުށްތަކުގެ ތެރޭގައި، އެ ކުށްތަކަކަށް އަރައިގަތުމުން ދީނުން ބޭރުވާ ފަދަ ކުށްތައްވާ ކަމަށެވެ. އޭގެ ތެރެއިން އެއް ކަމަކީ ސިޙުރު ކަމަށާއި ސިޙުރު ސަބަބުން ޢާއިލާތައް ރޫޅި، ދެމަފިރިންގެ ޒަވާޖީ ޙަޔާތް ބަރުބާދުވާ ކަމަށެވެ. ރަޙްމަތްތެރިންގެ މެދުގައި ރުޅިވެރިކަމާއި ޢަދާވާތްތެރިކަން އުފެދޭ ކަމަށެވެ. ދަރިވަރުންގެ ތަޢުލީމަށް ހުރަސް އެޅޭ ކަމަށެވެ. ޞިއްޙަތު ސަލާމަތުން ހުރި މީހާ ބަލިވެ، ހިތާމަޔާއި ވޭން ތަޙައްމަލުކުރަން ޖެހޭ ކަމަށެވެ.
ސިޙުރު ހަދާ މީހެއްގެ ގާތަށް ގޮސް އޭނާގެ ބަސް ތެދުކޮށް، އޭނާގެ ކިބައިން އެހީތެރިކަން ހޯދައިފި މީހާ، ކީރިތި ރަސޫލާ ﷺ ގެ މައްޗަށް ބާވައިލެއްވި ތަކެއްޗަށް ކާފިރުވެފައިވާކަަން ޚުޠުބާގައި ވަނީ ފާހަގަކޮށްފައެވެ. މި ނުބައި ފާސިދު ޢަމަލު މިއަދު ވަނީ މުޅި މުޖުތަމަޢަށް ޢާންމުވެފައި ކަމަށް ހުކުރު ޚުޠުބާގައި ވަނީ ބުނެފައެވެ.
”މި ސުންޕާ ޢަމަލުގެ ސަބަބުން، ބަރުބާދުވެގެން ދަނީ ކިތައް ޒުވާނުންގެ ޙަޔާތް ހެއްޔެވެ؟ ވިއްސިވިހާލި ވެގެން ދަނީ ކިތައް ޒުވާނުންގެ އުންމީދުތައް ހެއްޔެވެ؟ ބަލިވެ، ދުނިޔެ ދޫކުރަމުން ދަނީ ކިތައް އަޚުންނާއި އުޚުތުން ހެއްޔެވެ؟ ޢަދާވާތްތެރިކަމާއި ނަފުރަތު އުފެދި، މުޅި އުމުރަށް ވަކިވެ ދަނީ ކިތައް ޢާއިލާ ހެއްޔެވެ؟ މުޖުތަމަޢުގެ ހަމަޖެހުމާއި އަމާންކަން ގެއްލި، ދުނިޔޭން މޮޔަވަނީ ކިތައް މީހުން ހެއްޔެވެ؟ މި ކަންކަން މި ހިނގަނީ، ބޮޑު ފާފައެއް ކަމުގައިވާ ސިޙުރުގެ ސަބަބުންނެވެ.“
ސިޙުރަކީ ޙަޤީޤަތެއްކަން ފާހަގަކޮށް މިއަދުގެ ޚުޠުބާގައި ބުނި ގޮތުގައި އޭގެ އެއް ބާވަތަކީ، އެކަންކުރާ މީހުންގެ ކުޅަދާނަކަމުން، މީސްތަކުންގެ ލޯމައްޗަށް އޮޅުވާލާ އޮޅުވާލުން ކަމުގައެވެ. ސިޙުރުގެ އަނެއް ބާވަތަކީ، ކެހިވެރިކަމުގެ ދައްކާލުމެއް ނޫން ކަމަށާއި އެއީ މީހުންގެ ހިތްތަކަށާއި ހަށިގަނޑަށް އޭގެ އަސަރު ފޯރާ ބާވަތެއް ކަމުގައެވެ. މި ބާވަތުގެ ސިޙުރު ހެދުމަށް މީހުންގެ އިސްތައްޓާއި ނިޔަފައްޗާއި ފުނަލުގެ ދަތާއި ފޭރާން ނުވަތަ ފައިވާން ފަދަ ތަކެތި ބޭނުން ކުރާ ކަމުގައެވެ. މީގެ ތެރޭގައި މީހުން މޮޔަކޮށްލާ ސިޙުރާއި ބަލިކޮށްލާ ސިޙުރާއި މަރާލާ ޞިހުރާއި ދެމަފިރިން ރުޅިކުރުވާ އަދި ދުރުކުރުވާ ސިޙުރު ހިމެނޭ ކަމުގައެވެ.
”ސިޙުރާއި ނޭދެވޭ ކަންކަމުން ރައްކާތެރިވުމަށް ކުރެވިދާނެ ކަންތައްތަކެއް އިސްލާމް ދީނުގައި އަންގަވާފައިވެއެވެ. އެންމެ މުހިންމު ކަމަކީ ފަރްޟު ފަސް ނަމާދަށް ރައްކާތެރިވުމެވެ. ދެވަނަ ކަމަކީ ޝައިޠާނާގެ ކިބައިން ރައްކާތެރިވުމަށް މާތް الله ގެ ޙަޟްރަތުގައި ދުޢާ ދެންނެވުމެވެ. ތިންވަނަ ކަމަކީ ޖިންނި ޝައިޠާނުންގެ ކިބައިން ރައްކާތެރިވުމަށް ކީރިތި ރަސޫލާ ﷺ ގެ އަރިހުން ވާރިދުވެފައިވާ ދުޢާތައް ކިޔެވުމާއި އެކަލޭގެފާނުގެ އަރިހުން ވާރިދުވެފައިވާ ގޮތަށް ޢަމަލު ކުރުމެވެ.“
ސިޙުރު އުނގެނުމަކީ ކާފިރުވާނެ ޢަމަލެއްކަން ޤުރްއާނުގެ ޞަރީޙަ ނައްޞުން އެނގޭކަން ފާހަގަކޮށް، ޚުޠުބާގައި ވަނީ މި ކުފުރުގެ ޢަމަލުކޮށް އުޅޭ މީހުން، ތައުބާވެ، މާތް ﷲ ގެ މަގަށް އެނބުރި ރުޖޫޢަވުމަށް ގޮވާލާފައެވެ. ޞިހުރަކީ ކާފިރުވާ ފަދަ ބޮޑު ފާފައެއް ކަމަށާއި އެއީ ދެދުނިޔޭގައި ގެއްލުމާއި ހަލާކަށް މަގުފަހިވާ ޢަމަލެއް ކަމަށެވެ. ސިޙުރުހާހޫރަ އާއި ދުރުހެލިވުމަށާއި މުޞީބާތްތަކުން މިންޖުވުމަށާއި ބޭނުންވާ ކަންކަމުގައި، އިޚްލާޞްތެރިކަމާ އެކު މާތް ﷲ ގެ ޙަޟްރަތުގައި ދުޢާ ދެންނެވުމަށް ވެސް ހުކުރު ޚުޠުބާގައި ވަނީ ގޮވާލާފައެވެ.
