ޓެރަރިޒަމްގެ ކުށްތަކެއް ސާބިތުވެ 23 އަހަރަށް ޖަލަށްލާފައިވާ ހޫދު މުޙައްމަދު ޒާހިރުގެ ފަރާތުން ހައިކޯޓުގައި އިސްތިއުނާފުކުރި މައްސަލަ އެ ކޯޓުން ބަލައިގަނެފިއެވެ. މި މައްސަލައިގައި އޭނާގެ ފަރާތުން ފާހަގަކޮށްފައިވަނީ ނިމިދިޔަ އިބޫ ސޯލިހުގެ ސަރުކާރުގައި އޭނާ ހައްޔަރުކޮށް، ހައްޔަރުގައި އިތުރަށް ބެހެއްޓުމަށާއި، ކުށް ސާބިތުކުރުމަށް މައިގަނޑު އަސާސެއްގެ ގޮތުގައި ބޭނުންކުރި ފޯނުގެ ޗެއިން އޮފް ކަސްޓަޑީ ފުރިހަމަނުވާ ކަމަށާއި، އެއީ ޤާނޫނާ ހިލާފަށް ހޯދާފައިވާ ބާޠިލު ހެކިތަކެއް ކަމަށެވެ.
އިސްލާމިކް ސްޓޭޓް (އައި.އެސް)ގެ މެންބަރެއްގެ ގޮތުގައި ކްރިމިނަލް ކޯޓުން އޭނާ ކަނޑައެޅީ އިޖުރާޢަތްތަކާ ޚިލާފަށް ކަމަށްވެސް އިސްތިޢުނާފުގައި ބަޔާންކޮށްފައިވެއެވެ. ހޫދުގެ މައްޗަށް ސާބިތުވެފައިވަނީ ޓެރަރިސްޓު ޖަމާޢަތެއްގެ މެންބަރަކަށްވުމުގެ ކުށުގެ ދަޢުވާ އާއި އެފަދަ ޖަމާޢަތަކަށް ތާޢީދުކުރުމުގެ ކުށުގެ ދަޢުވާގެ އިތުރުން، އެފަދަ ޖަމާޢަތަކަށް ތާޢީދުކުރާ މީހެއްކަމަށް ދޭހަވާ ފަދަ ލިޔުމެއް ނުވަތަ ކުރެހުމެއް ނުވަތަ ފޮޓޯއެއް ގެންގުޅުމުގެ ކުށުގެ ދަޢުވާއެވެ.
ކްރިމިނަލް ކޯޓުގެ އެ ނިންމުން އޭނާގެ ފަރާތުން ދިވެހިރާއްޖޭގެ ހައިކޯޓުގައި އިސްތިޢުނާފު ކޮށްފައިވާއިރު، އިސްތިޢުނާފުގައި އޭނާގެ ފަރާތުން ފާހަގަކޮށްފައިވާ ގޮތުގައި، އޭނާގެ ފޯނު ފުލުހުން ހުޅުވީ ރާއްޖެއިން ބޭރަށް ފޮނުވައިގެން ކަމަށް ބުނާއިރު ރާއްޖޭއިން ބޭރަށް ފޯނު ފޮނުވިކަމުގެ އެއްވެސް ލިޔުމެއް ނެތެވެ. ކަންމިހެން އޮތްއިރު، މައްސަލައިގައި ރިޢާޔަތްކުރެވުނު ފޯނަކީ ހޫދުގެ އަތުން ނެގުނު ފޯނެއްކަން އެނގޭނެ ގޮތެއް ނެތްކަމަށް ހޫދުގެ އިސްތިޢުނާފުގައި ފާހަގަކޮށްފައިވެއެވެ.
