ރާއްޖޭގައި އަމިއްލަ ބިން އޮވެ ގެދޮރު އިމާރާތް ނުކުރެވިފައިވާ ފަރާތްތަކަށާއި، ހައުސިން ޔުނިޓް ގަތުމަށް މާލީ ތަނަވަސްކަން ނެތް ރައްޔިތުންނަށް އެހީތެރިވުމުގެ ގޮތުން އިތުރު ފައިނޭންސިން ޕްރޮގްރާމްތަކެއް ތައާރަފުކުރުމުގެ އެންމެ ފަހުގެ ތައްޔާރީތައް ސަރުކާރުން ފަށައިފިއެވެ.
ޕީއެސްއެމްގެ ”ރާއްޖެމިއަދު“ ޕްރޮގްރާމުގައި ވާހަކަދައްކަވަމުން އިމާރާތްކުރުމާއި ގެދޮރުވެރިކަމާއި ބިނާރާ ބެހޭ ވުޒާރާގެ ސްޓޭޓް މިނިސްޓަރު އަލްއުސްތާޛު އަޙްމަދު ނާޒީމް މުޙައްމަދު ވިދާޅުވީ، ބޭންކުތަކުން ލޯނު ދޫކުރުމަށް ކަނޑައަޅާފައިވާ ޝަރުތުތައް ހަމަނުވުމުގެ ސަބަބުން ގިނަ އަދަދެއްގެ ރައްޔިތުންނަށް ގެދޮރު ބިނާކުރުމުގައި ބޮޑެތި ގޮންޖެހުންތަކާ ކުރިމަތިލާންޖެހިފައިވާ ކަމަށެވެ. އެހެންކަމުން، މި މައްސަލައަށް ހައްލެއް ހޯދައިދިނުމުގެ ގޮތުން ބޭންކުތަކާ ގުޅިގެން ކުރިއަށް އޮތް ދެ މަސްދުވަހުގެ ތެރޭގައި މުޅިން އައު ދެ ސްކީމެއް އިފްތިތާހުކުރަން ނިންމާފައިވާ ކަމަށް އޭނާ ވިދާޅުވިއެވެ.
ނާޒިމް ފާހަގަކުރެއްވި ގޮތުގައި، މި އައު ޕްރޮގްރާމުގެ ދަށުން ސަރުކާރުން މައިގަނޑު ގޮތެއްގައި އެހީތެރިވެދޭނީ ބޭންކު ލޯނު ނެގުމަށް ކޮންމެހެން ބޭނުންވާ އިކުއިޓީ ފައިސާ ހަމަޖައްސައިދިނުމަށެވެ. އެގޮތުން އަމިއްލަ ބިމުގައި ގެދޮރު އެޅުމަށް އެދޭ ފަރާތްތަކަށް އިކުއިޓީގެ ގޮތުގައި 2 ލައްކަ ރުފިޔާ ސަރުކާރުން ދޫކޮށް، 1 މިލިއަން ރުފިޔާއާ ހަމައަށް ބޭންކު ލޯނު ލިބޭނެ މަގު ފަހިކޮށްދެވޭނެއެވެ. މީގެއިތުރުން، ރަށްރަށުގައި ތަރައްގީކުރާ ހައުސިން ޔުނިޓްތައް ގަންނަން ބޭނުންވާ ފަރާތްތަކަށް އިކުއިޓީގެ ގޮތުގައި 2.5 ލައްކަ ރުފިޔާ ހަމަޖައްސައިދިނުމަށް ވެސް ވަނީ ހަމަޖެހިފައެވެ.
މި އެހީތެރިކަން ރައްޔިތުންނަށް ފޯރުކޮށްދިނުމަށްޓަކައި ހަތަރު ބޭންކަކާއެކު ފަހުމުނާމާ (އެމްއޯޔޫ) އެއްގައި ސޮއިކުރުމުގެ މަސައްކަތް ކުރަމުންދާއިރު، އަމާޒަކީ އަންނަ ނޮވެމްބަރު މަހުގެ ތެރޭގައި މި ފުރުސަތު އާންމުންނަށް ހުޅުވާލުން ކަމަށް ވުޒާރާއިން މައުލޫމާތުދެއެވެ.
ހަމައެއާއެކު، ސަރުކާރުން ކުރިއަށްގެންދާ ’އެފޯޑަބަލް ހޯމް އޯނަޝިޕް މޮޑެލް‘ ގެ ދަށުން ފްލެޓް ގަންނަން ބޭނުންވާ މީހުންނަށް، ސޯޝަލް ހައުސިންގެ އިމުން ބޭރުން ތަންތަން މިލްކުކުރެވޭނެ މާލީ އެހީގެ އިންތިޒާމެއް ވެސް ތައާރަފުކުރާނެއެވެ. މި ފުރުސަތު ހުޅުމާލެ ފޭސް 3 ގެ 1000 ހައުސިން ޔުނިޓުގެ އިތުރުން، އައްޑޫ ސިޓީގައި ގާއިމުކުރާ 550 ޔުނިޓާއި ފުވައްމުލައް ސިޓީގައި ޕްރައިވެޓް ސެކްޓަރާ ގުޅިގެން ކުރިއަށްގެންދާ މަޝްރޫއުތަކަށް ވެސް ލިބިގެންދާނެއެވެ.
ގެދޮރުވެރިކަމަށް ހުރި ހުރަސްތައް ނައްތާލުމަށް ސަރުކާރުން ކުރިން ތައާރަފުކުރި ’ހިޔާވެހި ފައިނޭންސިން ސްކީމް‘ އަށް ބޮޑު ތަރުހީބެއް ލިބިފައިވާއިރު، އެ ސްކީމުގެ ދަށުން 1.1 ބިލިއަން ރުފިޔާ ދޫކުރުމަށް ވަނީ ނިންމާފައެވެ. އަމިއްލަ ބިން އޮވެ އިމާރާތް ނުކުރެވިފައިވާ ފަރާތްތަކަށް މާލީ ފުރުސަތުތައް ފަހިކޮށްދީ ގެދޮރުވެރިކަން ކަށަވަރުކޮށްދިނުމަކީ ސަރުކާރުގެ އެންމެ އިސް އެއް ސިޔާސަތެވެ.
